Пукалам библиотекаын нывбабаяс, вöчасям да варгам-сёрнитам. Юала, пионерад ставнытö примитлiсны? И заводитчис…

• Примитiсны, а сэсся во джын мысти галстуктö став школалöн линейка вылын двойкаяс босьтöмысь менсьым да нöшта кык зонкалысь бöр разисны сьылiысь. Сулалам строй водзас да бöрдам. А сэсся исправитiм оценкаястö, да бöр примитiсны пионеръяс радö. Уна и синва кисьтi сэки гортын, — казьтыштiс Кужйын быдмöм Анна Михайловна Зезегова. А Лина Александровна Порошкина содтiс:
• Пионер лунö эг велöдчöй, ворсiм «Зарницаысь» да ставöн сьылiм ыджыд бипур дорын. Миян Кужйын школа сайса эрд вылын бипур местасö вöлi кодйöма звезда мыгöрöн, сэнi и гажöдчим.
• Ме пыр бура велöдчи, а юркарын тайö лунас пионеръясöс сувтöдлiсны почётнöй караулö Куслытöм би дорö. Киров паркын тайö лунас став ворсанiныс, карусельыс уджа-лiс дон босьттöг. Караулын сулалöм бöрын лэччам да сэнi лунтыр гуляйтам. Öтчыд чегъялiм зэв мичаа дзоридзалысь яблоня. Миянöс казялöмаöсь, да ёна и янöдiсны, — бергöдчылiс челядьдырас Надежда Михайловна Подюкова.
  Менам дум вылö уси, кыдзи школаад вöлi юöртасны бумага да кöрт чукöртан лун. Медуна чукöртысь классъяслы местаяс сеталасны. Быд керкаö, уджаланiнъясад пыравлам – медым медуна чукöртны. Ме катыдса да велöдчи «а» классын, а кывтыдсаяс — «б» классын, вот накöд вöлi и вермасям. Керчомъяыд кузь, а миян классын велöдчысь Степан Тимушевлöн батьыс конюкалiс да пыр миянлы доддявлiс вöвтö. Ок и гажа вöлi!
  Водзö лыддьöй май 14-öд лунся газетысь.
  Екатерина Ульнырова.
  Снимокъяс гижысьлöн чукöртöмысь.