Тöдмасьöй, кодi абу на тöдса – Илья Карманов. Тайö Вöльдiнса визув зонкаыс зэв на том, а уджалö-артисталö нин карса театрын. Колян во сiйö помалiс Сыктывкарса В.Т. Чисталёв нима культура колледж, велöдчигас на босьтчис ворсны Коми Республикаса вужвойтырлöн шылада-драмаа театрын. А öнi на сöмын Илья локтiс армияысь да бöр пырöдчö уджö, öд сiйöс виччысьöны сылöн рольяс.
Зон ворсö шмонитана роль «Льӧм пу дорын аддзысьлӧмъяс» тешын – порсь видзысь Карпöс, кодi радейтö кукань видзысь Соловейöс (Шура Соловьёваöс). Томиникöсь да асныраöсь, найö некыдз оз вермыны лöсявны – нывка пыр зонмöс дэльöдö, а зон босьтö примитö зэв матö сьöлöм бердас. «Кабаре «Сыктывса кань» мича спектакльын авторыс Сергей Журавлёв петкöдлö, кыдзи 1812 во бöрын Усть-Сысольскын овлiсны французъяс. Илья ворсö коми зонмöс, сьылысь-йöктысьöс. «Йöкты, муслун» (Лопе де Вегалöн «Учитель танцев») комедияын И. Карманов – испанияса йöктысь.
Öнiя кад кежлö медыджыд рольяс Ильялы вичмисны Владимир Тимин серти пуктöм кык спектакльын: «Эжва Перымса зонка» да «Ыджыд Перым да Мӧскуа» этно-мюзиклъясын. Медводдза юкöнас, кодi шусьö кыдзи и повесьтыс, Илья ворсö Ирьянкоöс – шöр геройлысь ёртсö. «Ыджыд Перым да Мöскуа» юкöнын том артист ворсö Чердiнса мужичöй Бисярöс да Мöскуаса пирöг вузалысь Провöс.
«Эжва Перымса зонкаын» действиеыс мунö Емдiнын 15 нэмын. Тикö (ворсö Александр Канев) да Ирьянко (Илья Карманов) мунöны ылi вöр керка дорö кыйны чери, а збыльвылас кö, налы окота тöдмавны, мыйсяма гöгöрвотöмтор керсьö сiйö вöръясын. И збыль, найö тöдмалöны, мый вöрöгъяс-йöграяс гусьöн локтöны, мед уськöдчыны Емдiн вылö. Йöграяс öдва оз вины том йöзöс асьнысö, а öд накöд мöдöдчис и Тикöлöн ичöтджык чойыс Кыйва (ворсö Анна Попова)… Тайö спектакльын том йöз да Емдiнса став олысьяс пырыс петкöдчö миян вöр-ва дiнö пыдi муслун, топыда сыкöд йитчöм, сылысь законъяссö тöдöм. 15 нэмын вöр-ваыс збыль вöлi коми йöзлы оланiнöн, и кöть эськö Перымса Степан неважöн на комиясöс пыртiс Кристос эскöмö, выль эскöмыс эз торкав вöр-ва вынъясö эскöмсö.
Колö шуны, мый тавося ноябрын «Эжва Перымса зонка» повесть серти мюзикл-дилогияыс лоис «Лучшие товары и услуги Республики Коми» конкурсын лауреатöн. И зэв регыд тайö мича спектакльсö театр вайö и Кулöмдiнö – «Эжва Перымса зонка» позяс аддзыны декабрь 19 лунö районса культура керкалöн сцена вылын.
Евгения Удалова.