Волiсны Помöсдiн вожö

[ A+ ] /[ A- ]

Кык во нин районö волывлö пытшкöсса делöяслöн министерствоысь уна морта котыр да районса юкöнкöд öтув уджалöны кутшöмкö да овмöдчöминын. Тöдмасьöны сикт-грездса йöзлöн тöжд-могъясöн, кытшовтöны видзöдлас улö веськалöмъясöс, видзöдлöны вöралысьяслысь öружие видзöм, лавкаясын вузасьöм да с.в. Волiсны Югыдъягö, Пожöгö да Помöсдiнö. Таво ноябр 30-öд лунö бара вöлiны Помöсдiн вожын. 
ГИБДД-лöн управлениеысь да сылöн районса юкöнысь инспекторъяс видзöдлiсны 76 техника, казялiсны туйяс вылын урчитöмторъяс 20-ысь торкöм да лöсьöдiсны на кузя гижöдъяс. Воöмаяс пыравлiсны 15 лавкаö. Öти асшöр вузасьысьлысь босьтiсны йöзлöн паса вузаланторъяс. Сикт-грездъяс кытшовтiгöн уна йöзаинын казялiсны код юра вит мортöс. Сёрнитiсны Помöсдiнса шöр школаын 10-11-öд классъясса велöдчысьяскöд, висьталiсны, кутшöм лёк вайöны дзоньвидзалунлы дурмöдчанторъяс. Висьталiсны и сiдз шусяна насвай йылысь, кодi вайö зэв ыджыд лёк, да кодöс казялiсны Помöсдiн вожын. Гырысь класса велöдчысьясöс да велöдысьясöс öлöдiсны, мед найö эз шедны интернет пыр ылöдчысьяслöн налькйö. 
Рытнас культура керкаын кывзiс йöзлысь тöжд-могъяс да вочавидзис юалöмъяс вылö пытшкöсса делöяс кузя республикаса министр Виктор Николаевич Половников. 
Помöсдiн вожын 3,5 сюрс кымын морт, а абу участокса уполномоченнöй. Андрей Александрович Пахомов петiс шойччöг вылö, колис сöмын уполномоченнöйлы отсасьысь Алексей Адольфович Печеницын. Кад кежлö лöнь олöм вöсна тöждысьны индiсны Пожöг участокса уполномоченнöй Эдуард Васильевич Лажанёвöс, но сылöн аслас уна сикт-грезд. Ыджыд вожö колö кык уполномоченнöй. Министр корис ышöдны тайö уджö кывкутысь да бур мортöс Помöсдiн вожсаяслы аслыныс. Танi паськалöма спирт сораса юанторъясöн гортсянь вузасьöм. Уна керкаысь коддзöдантор позьö босьтны лун кöть вой. Юöм вöсна 40 арöсöдз уна морт нин кыз му улын. В.Н.Половников тöдчöдiс, мый тайö майшасьöмыс абу сöмын помöсдiнсаяслöн, мырсьöны уналаын. Оз повзьöд гортсянь вузасьысьясöс 5 да 15 сюрс шайта штрап, кор найö нажöвитöны дас пöв унджык, а уголовнöй кывкутöмö кыскыны зэв сьöкыд, сы вöсна мый мырддьöм коддзöданторъясын метанол да мукöд лёк сорас, кодъяс вайöны мортлöн дзоньвидзалунлы ыджыд лёк, абуöсь. 
Но код юрöн йöз вöчöны мыж. Россияын пытшкöсса делöяс кузя министерстволöн районса юкöнын веськöдлысьлысь могъяс олöмö пöртысь Дмитрий Владимирович Ших висьталiс, мый районын тавося 11 тöлысьöн лоöмторъяс да административнöй торкалöмъяс кузя воис кольöм вося тайö жö кадын серти 16,2 процентöн унджык шыöдчöм. Пасйöма 297 мыж вöчöм, а кольöм воын вöлi 285. Помöсдiн вожсянь вöлi 403 шыöдчöм да юöр. «Помöсдiн» овмöдчöминын код юрöн вöчисны 11 мыж, куимöс водзтi пукавлысьяс. Мыждiсны 11 мортöс, но эз пуксьöдны. Куимыс вöлiны административнöй видзöдлас улын. Квайт мыж вöчисны тыр арлыдтöмъяс, öтиöс код юрöн. Видзöдлас улö босьтiсны öти котырöс, кöнi кык тыр арлыдтöм вермасны мунны йöзлы паныд. Тыр арлыдтöмъяслöн делöяс кузя котырлöн видзöдлас улын татысь вит томулов да дас бать-мам. 
Помöсдiн вожысь нёль мортöс кыскисны административнöй кывкутöмö гортсянь курыдторъяс вузалöмысь. На вылö дасьтöм гижöдъяс видлалiсны судын да сылöн кывкöртöдöн öтилы урчитiсны вештыны вит сюрс, кыклы дас вит сюрсöн да нöшта öтилы 30 сюрс шайт. 
— Ми коставлытöг водзсасям курыд юанторъясöн вузасьысьяскöд. Помöсдiн вожын öнi уджалам нöшта нёль морт кузя, — висьталiс Д.В.Ших, — Вузасьысöс кö кутам мöдысь, сiйöс кыскам уголовнöй кувкутöмö, код серти вермасны штрапуйтны 50 сюрссянь 80 сюрс шайтöдз либö перйыны 3-6 тöлысся удждон, либö уджöдны воöдз. 
Помöсдiн вожын сизим туйвывса лоöмторйын доймалiсны кöкъямысöн, öти кувсис. ГИБДД-лöн юкöнса инспекторъяс танi казялiсны 210 административнöй торкöм, 22-öн пуксисны руль сайö код юрöн. 
Сёрнитiс Помöсдiнса юралысь Анатолий Егорович Уляшев: 
— Ми тöдiм, мый министерствоысь воласны миян вожö. Ме налöн локтöдз чукöртлi уджалан, асвеськöдлан, томъяслöн, олöмаяслöн, Енлы эскысьяслöн, «Зумыд ош» котыръясöн веськöдлысьясöс. Сёрнитiм, мый медся ёна майшöдлö йöзöс да мый юалам министрлысь да сыкöд локтысьяслысь. Кор локтiс министр, медводз сёрнитiс сиктса юралысьяскöд (ме кындзи вöлiны Вöльдiнса да Пожöгса юралысьяс), сэсся водзмöстчысьяслöн котыръясöн юрнуöдысьяскöд. Вочавидзис став юалöм вылö. 
Медся ёна майшöдлö гортсянь курыдторъясöн вузасьöм. Миян овмöдчöминын öти айловлысь ручка кузьта сизим ком кыйöмысь инспекторъяс мырддисны и пыжсö, и моторсö, а гортсянь курыдторйöн вузасьысьöс места вылö пуксьöдны оз вермыны. Оз ков вунöдны бурсö сöвет кадся олöмысь, кор лавкаясын коддзöданторъяс вузавлiсны 11 чассянь 19 часöдз. Гожöмын да мартын, кор туйяс тшыксьытöдз колiс петкöдны уна вöр, позис ньöбны сöмын рытнас 19 чассянь 21 часöдз. Миян асшöр вузасьысьяс дасьöсь чинтыны коддзöданторйöн вузасян кад, но на пыдди зепъяссö тыртасны гортсянь вузасьысьяс. Колö чорзьöдны законсö, содтыны штрап, быть уджöдны. 
Тайö лунö лöнь олöм вöсна тöждысьысьяс да кывкутысьяс кытшовтiсны 500 кымын семья. Уджалiсны сёр рытöдз. Волiсны и мöдысь. Волiсны сiдзжö оперуполномоченнöйяс, öдйö тöдмалiсны, кодi велöдчысьясöс могмöдö насвайöн. Тадзи колö уджавны пыр, сэки, гашкö, серпасыс вежсяс бурланьö, — кывкöртiс А.Е.Уляшев. 

Марина ДАДАШОВА. 
Пытшкöсса делöяс кузя министерствоысь районса юкöнлöн снимокъяс вылын: кывкутысь йöз (В.Н.Половников шуйгавывсянь мöдыс); 
туй вылын инспекторъяс; чукöртчылысьяс.


Комментарии:

Добавить комментарий

Свежий выпуск: за 13 июня