Таво армияö мунысьяс пиын и Уллянаысь крестьянин овмöс кутысь Данил Тарабукин. Ылi туйö петiс ноябр 13-öд лунö, кыдзи и батьыс веськалiс морфлотö. Эскö, мый во коляс зэв öдйö. Зiль да техника бура тöдысь механизатор оз пов сьöкыдлунъясысь, видз-му овмöсын зiльысьяс уджалöны лун и вой, шойччан да праздник лунъяс тöдтöг. Бать-мамыслы колис ассьыс овмöс. Пасъям, Данил вермис видз-му овмöслöн «Агростартап» конкурсын, грант вылö ньöбис трактор да турун куртан-бергöдлан агрегат. Елена Евгеньевна мамыс тшöтш шедöдлiс грант, семьяöн кыпöдiсны 50 юрлы скöт карта, орччöн лэптiсны и Даниллы. Сэнi том мортлöн вит мöс да сы мында жö кукань.
Том фермер нёль во велöдчис Коми республикаса агропромышленнöй техникумын, лоис механизаторöн. Бать-мам вылö видзöдöмöн и бöрйис тайö туйвизьсö. Öд быдмигас пыр вöлi орччöн Игорь Михайлович батьыскöд, и овмöс бергöдiгöн, техника дзоньталiгöн да мукöд удж вöчигöн. Та вöсна и кокниа сетчис велöдчöм. Улльянаын и практика вылын матыссаяслы петкöдлiс уджалан сям, стöчджыка кö, пöсь кадö батьыскöд заптiс кöрым, бергöдiс овмöс. Волывлiс шойччан лунъяс кежлö, танi жö коллялiс каникулъяс. Сэки овмöсын вöлi öти трактор, грант вылö босьтöм техниканад и уджыс пуис. Майбыр, эм и ытшкан, куртан, гöрддзымö да плёнкаöн гартан. Уна скöт юрнад уна и заптöны. Пуктысьöны Уллянаын, Кулöмдiнын, Кулöм ю бокын, Кулöмдiн весьтса Эжвалöн мöдлапöлын. Сьöкыд удж бöрся гöгöр бок видлалiс техника, мыйкö да вежис, кыткö да зэлöдiс, мед техника вöлi пыр дась.
— Тöв кежлö кöрым дасьтiм тырмымöн, дерт, кос гожöмöн омöльджык да этшаджык. Гöгöрвоа, менам служитiгöн бать-мамлы лоас сьöкыд, ковмас медавлыны уджалысьöс. Но армияö колö мунны быть, тайö быд зонлöн мог, — тöдчöдiс Данил.
Марина Дадашова.
Снимок Данил Тарабукинлöн.