Лöнь олöм, шуда кад. И таысь ыджыд аттьö пöрысь ыджыд бать Василий Арсентьевич Третьяковлы, Великöй Отечественнöй войнаса ветеранлы. 
Мый ми, öнiя челядь, тöдам вир кисьтана тыш йылысь? Унатор. Вöлi сьöкыд, миян салдатъяс мунiсны би пыр и ва пыр. Но ми эг тöдлöй сiйö олöмлысь курыд кöрсö.Миян синъяс водзын оз кулавны матыссаяс, мамъяс оз воштыны пиянöс да нывъясöс, ог кылöй бомбитöм, ог юксьöй салдатлы сетöм пайöн. Миян пöрысь ыджыд батьяс да пöльяс вöлiны геройясöн. Лымъялiгöн кöть зэригöн, ёна кöдзыдöн ассьыныс олöм жалиттöг повтöг тышкасисны вöрöгкöд. 
Менам пöрысь ыджыд бать чужлiс 1926-öд вося апрель коймöд лунö Пожöгдiнын колхозникъяслöн семьяын. Челядьдырсянь тöдлiс сьöкыд удж, зiлис верстьöкöд тшöтш. Отсалiс гортас бергöдны овмöс, видзис ичöтджык вок-чойяссö. Уджалiс и колхозлöн муяс вылын. 
Война пансьытöдз помалiс сизим класс. Жалитiс, мый 1941-öд воын шыбитiс велöдчöм. Буретш сэки школаын кутiсны велöдны немеч кыв, да сiйö лыддис, мый салдатлы колö тöдны вöрöглысь кыв. 
Василий Арсентьевичöс фронт вылö босьтiсны 1943-öд воын. Сылы вöлi 17 арöс. Ёна кöсйис тышкасьны тшöтш ыджыдджык Кирилл вок вöсна, кодi юрсö пуктiс 1942-öд воын Калуга обласьтса Зайцевоын. Сiйöс ёна радейтлiс, унаторйö велöдчылiс сы вылысь. 
Пöрысь ыджыд бать веськалiс Ленинградса медводдза фронт вылö. Мездiс карсö вöрöглöн кытшысь. Ёна доймалiс. Госпитальын бурдöдчöм бöрын бара тышö. Мездiс и Латвияса да Литваса каръяс да сиктъяс. Сэнi сiйö доймалiс мöдысь. Куйлiс госпитальын. Сэсся веськалiс Белоруссияса мöдöд фронт вылö, мездiс Украина, Белоруссия, воис Германияöдз. Вöлi Берлинса стен дорын, кор юöртiсны Победа йылысь. 
Пöрысь ыджыд бать тшöкыда казьтылiс сiйö кадсö. Эз повзьöдлы, эз висьтавлы вир кисьтана косьяс, тшыгъялöм, салдатъяслöн кулöм йылысь. Казьтывлiс ёртъяссö, кодъяскöд артмывлiс ылöдлыны немечьясöс да кольны ловъяöн сьöкыд тышъясын. И 1945-öд вося апрель 25-öд лунö Эльба ю вылын тöдчана аддзысьлöм йылысь: «Эльба дорö матыстчигöн ми тöдiм, мый аддзысям Англияса да Америкаса миянкöд öтсöгласа войскаяскöд. Быд лун виччысим налöн миянланьö локтöм йылысь юöр. Эгö тöдöй, мыйöн ставыс помасяс. Но миянöс дасьтiсны, кыдзи кутчысьны, тшöктiсны, мед ставыс лючки-бур кöм-пасьын. Быттьö лöсьöдчим парад кежлö. Весиг сетiсны сутки шойччыны. Кутшöм кузьöсь америкаса салдатъясыд!» 
Война бöрын Василий Арсентьевич служитiс водзö Брестын. Босьтiс водительлысь право да лоис шофёрöн. Гортас бергöдчис 1950-öд воын. Уна медальöн пасйисны повтöм коми зонмöс. Сiйö вöлi век медводзын, эз дзебсяс ёртъяслöн мышъяс сайын. Весь эз ов. 1951-öд воын велöдчис электромеханикö. Уджавлiс техник-механикöн, токарöн, слесарöн, шофёрöн. Аддзис ассьыс шудсö. Ульяния гöтырыскöд чужтiсны-быдтiсны öкмыс челядьöс. Сöмын водз кулiс менам пöрысь ыджыд мам, а пöрысь ыджыд бать сэсся эз и гöтрасьлы. Ачыс быдтысис. Ставнысö петкöдiс ас олöмö, ставныс лоисны пыдди пуктана йöзöн. 
Пöрысь ыджыд бать важöн нин абу ловъя. Но ми сiйöс ог вунöдöй. Видзам сылысь медальяс, пыр казьтылам сiйöс да сылысь висьталöмсö. 
Ульяна да Милана УЛЯШЕВАЯС. 
Дiасёръя.