Январ 31-öд лунö челядьлысь енби сöвмöдан районса керкаысь велöдысь В.В.Потоцкая котыртлiс Афганистанын вöвлöм служитысьяскöд аддзысьлöм. 
Афганистанö войскаясöс пыртiсны 1979-öд вося декабр 25-öд лунö. Пыртiсны сы вöсна, мый Афганистанса веськöдлысьяс шыöдчисны СССР дорö отсöгла. Кремльын дыр мöвпалiсны, но векжö шуисны отсавны. Ковмис 18-19 арöса том зонъяслы быть мунны. Вöлi сьöкыд: луннас жарыс пöдтiс, а войяс вöлiны кöдзыдöсь, дöзмöдчисны лыа турöбъяс, змейяс, скорпионъяс, кöвъясьлiсны лёк висьöмъяс. Афганистанö медводдза нырын веськалысьяслы вöлi торйöн сьöкыд, весиг некöн вöлi овны да узьлыны. Тышкасьны ковмис верстьö айловъяскöд, кодъяс сэнi олiсны нэмыс, тöдiсны быд гуран и мыльк, нинöмысь эз повны, киныс эз дзöр томиник зонъясöс лыйлiгöн. 
Афганистанса война мунiс 10 во, öти тöлысь да 19 лун. Тышъяс пыр мунiс 540 сюрсысь унджык, доймалiс 50 сюрсысь унджык, кулiс 13 сюрсысь унджык, вермытöмöн лоис квайт сюрсысь унджык морт. Коми республикаысь гортаныс воисны 3760-öн. Кулöмдiн районысь Афганистанö ветлiсны 143-öн, куимöн усисны. Тайö Ичöт Кужйысь Сергей Егорьевич Тарабукин, Скöрöдумысь Александр Алексеевич Шомысов, Бадьёльйылысь Андрей Алексеевич Уляшев. Миян районсаяс мукöдъяскöд тшöтш вуджисны став сьöкыдлунсö да петкöдлiсны асьнысö сöмын бур боксянь. 
Витöд да квайтöд классъясын велöдчысь кадетъяс водзын сёрнитiсны Зимстанысь Е.А.Кочанов, Кулöмдiнысь А.Н.Кондрашкин да В.В.Литвинов — ставöн пыдди пуктана йöз. Казьтылiсны армияын служитöм да Афганистанын тышкасьöм йылысь. 
— Кор ми петiм Афганистанысь, медводз ковмис разöдны страна пасьта цинкысь гортъяс. Лун дас лэбалiм самолётъясöн, колльöдiм ёртъяснымöс. Ставныс сэтшöм томöсь… Зэв сьöкыд казьтывны ставсö тайöс, — висьталiс А.Н.Кондрашкин. 
Сёрнитiсны сiдзжö В.В.Литвинов да Е.А.Кочанов. Бöръяыс шыöдчис челядь дорö, мед быдтор, мыйö кутчысьöны, вöчисны кывкутöмöн да помöдз. 
В.В.Потоцкая синва пыр висьталiс тайö война вылын юрсö пуктысь рöдвуж йывсьыс: 
— Сергей полiс висьтавны мамыслы, кöнi сiйö. Вевъялiс гижны сöмын некымын письмö, кöнi корис мамсö, мед эз шогсьы, арталiс регыд локны. Но эз артмы, вайисны гортйын. Лыйöмаöсь сьöлöмас. Кор ме видзöдлi Афганистан йылысь «Ограниченный контингент» книга, аддзи вок йылысь сыкöд öтлаын служитысь А.Ф.Булышевлысь татшöм гижöд: «Торъя автобатын миян районысь ми вöлiм квайтöн: ме, Югыдъягысь Н.Игнатов, Ярашъюысь М.Шахов, Ичöт Кужйысь С.Тарабукин, Дереваннöйысь А.Ульянов, Керчомъяысь В.Булышев. Комиысь ставöн ми вöлiм 11-öн. Бура ёртасим да кыдз вермим отсасим öта-мöднымлы. Казьтыла тышсö, кор усис Сергей ёртным. Лыйлыны босьтчисны видзчысьтöг, колоннаöс быттьö косялiсны кык пельö. Водзын мунысь машинаяс вермисны петны, а миянлы «сюралiс». Водительöс лыйны медся кокни, а кор нуö нöшта мыйкö ыпнитантор, ловъяöн кольны зэв сьöкыд. Воштöмыс эз вöв уна, но медся сьöкыдторйыс — Сергейлöн пöгибнитöм». 
Кужса школаын öшалö Сергейлы сиöм пас. Неважöн, январ 19-öд лунö, кулiс Сергейлöн мамыс, кодi бöръя здукöдз эз эскы, мый пиыс абу ловъя, пыр виччысис сылысь локтöм. 
Усьöмъясöс казьтыштiсны сувтлöмöн. А сэсся челядь юасисны. Тыдалiс, мый налы сьöлöмас йиджис «афганечьяслöн» висьталöмыс. А.Н.Кондрашкин помалiс аддзысьлöмсö татшöм кывъясöн: 
— Кора пыдди пуктыны велöдысьясöс да бать-мамöс. Пыр мöвпалöй водзö олöм йылысь. И мед эськö тiян олöмын эз вöв некутшöм война. 
Афганистанса война йылысь челядьлы висьталiс и челядьлöн лыддьысянiнын уджалысь А.В.Мишарина. Сiйö вöзйис тöдмасьны Афганистан йылысь «Ограниченный контингент» да «Книга памяти Республики Коми. Афганистан 1979-1989» книгаясöн, кытысь позьö лыддьыны казьтылöмъяс да тöдмасьны сэнi служитлысьяскöд. 

Галина Клюжева. 
Гижысьлöн снимок вылын: аддзысьлiгöн.