Унаысь нин кывлi Зимстанса «Юнармейцы» клуб йылысь, кытысь том йöз тшöкыда петкöдчылöны чужан му радейтöмлы сиöм аддзысьлöмъяс вылын. Юрнуöдö котырöн вежавидзысь да челядьöс став сьöлöмнас радейтысь ОБЖ велöдысь, кадетъяслöн классöн веськöдлысь Евгений Андреевич Кочанов. Подулöн лоис 2008-öд воын котыртöм кружок. Клубын 5-11 класса челядь. Чукöртчылöны вежонын кык час кежлö куимысь. Быд во Победа лунö сулалöны почёт караулын, петкöдчöны Победалы сиöм гажын. Ветлöны ёнмöдчан туйвизя районса став ордйысьöм да чукöртчылöм вылö. Топыд йитöдаöсь кусöдчанiнса уджалысьяскöд да петкöдчöны наöн котыртöм ордйысьöмъясын. Ветлöны и республика тшупöда ордйысьöмъяс вылö. Дасьтiсны воин-интернационалистъяс, Афганистанса да Чечняса войнаяс, а сiдзжö Климовскысь, Фроловскысь да Лöгинъягысь Великöй Отечественнöй война вылö ветлысьяс йылысь кинофильмъяс. Районын медводдзаяс лыдын нуöдiсны «Кувлытöм полк». 
Школаын эм став коланаторйöн тöдмöдан ОБЖ-лöн жыр, а коридорын — уналаын мунысь тышъясын усьöмъяс йылысь юöръяс. Восьтiсны тир, кытчö окотапырысь ветлöны клубö пырысьяс. 
— Во куим сайын ми ветлiм ордйысьöмъяс вылö Помöсдiнö. Ставсö котыртöмаöсь бура, но вöлi зэв сьöкыд. Бöрыннас видзöдлiм карта серти да, вöлöмкö, ордйысян лунö челядь мунöмаöсь 22 километра. Казьтыланаöн колис сiйö, мый вермим помöсдiнсаясöс, кодъяслы гортаныс тöдса ставыс. Челядьöс ордйысьöмъяс кежлö дасьта ёна. Век вежлала вермасьöм вылö мунысьясöс, мед быдöн видлiс ассьыс вын. Вöча ставсö, мед челядь кывзысисны, коркö ошка, коркö вида. Клубын челядь вежсьöны бурлань. Бать-мамлы нимкодь, мый зонпосни ме дорынöсь, весиг гижöдöны асьныс. Сьöкыдлунъяс, дерт, эмöсь, унатор колö ньöбны, а сьöм абу. Шуам, ордйысигъясöн колö разьны да тэчны автомат. Медым вöчны тайöс бура, колö дасьтысьны гортын, а миян сiйö сöмын öти. Сэк жö Помöсдiнын эмöсь лыжиöн бур котраланiн, унапöлöс ёнмöдчанiнъяс, нёль-вит автомат, каскаяс да уна мукöдтор. Бур сiйö, мый ас кадö унатор ньöблiс школаса директор Г.А.Кичун. 
Бöръя кадö ветлiм Помöсдiнö, кытчö чукöртчылiсны военно-патриотическöй клубъяс. Кольöм вося ноябрын вöлiм Шойнатыын том кусöдчысьяслöн вермасьöм вылын. Кольöм воын жö «Гренада» лагерö ветлiсны дасöн. Эз сöмын шойччыны, но и велöдчисны. На дорö волiсны мездан службаса уджалысьяс да ГИБДД-са инспекторъяс. 
«Юнармейцы» котырö волö 30 гöгöр морт. Коркö важöнкодь нин ньöблiм петкöдчан паськöм да сы кежысь пыр на. 
Меным нимкодь, мый миян котырын «быдмöм» челядь водзö служитöны право доръян органъясын, армияын контракт серти. Санкт-Петербургын нёльöд курсын велöдчö зон, кодi витöд классянь ветлöдлiс мекöд быдпöлöс ордйысьöмъяс вылö. Мöд зон служитö Дагестанын морскöй часьтын, капитан-лейтенант. Николай Васильевич Воробьёв йылысь эм весиг «Есть такая профессия» кино. Сiйö помалiс военнöй институт, нёльысь вöлi Афганистанын, кыкысь Чечняын. Ёна доймавлiс, но ловъя, — висьталiс Евгений Андреевич. 
Сiйö аттьöалiс велöдан управлениеöс, кодi 2018-öд воын козьналiс автогородок да позьö велöдны челядьöс туйвыв правилöясö. 

Галина Клюжева. 
Велöдан управлениеысь том йöзлöн юкöнлöн снимок вылын: «Юнармеец» котырсаяс.