Менам видзöдлас вылö, комсомолъяслöн вояс вöлiны, кöть и уджавлiм ёнакодь, медся кыпыдöсь. Тыдалö сы вöсна, мый вöлiм томöсь, уджалöм кындзи и гажöдчылiм сьылöм-йöктöмöн, кывъясыс да шыладъясыс öнi на юрынöсь, став сертиыс, оз вунны таладор югыдысь мунтöдз. 
Тайö фотокарточка вылын «Ручевскöй» совхозса комсомолечьяс 1975-öд вося октябрын, кор порсь гид дорын кырссисны кер. 
Медвылi визяс ёсь шапкааыс — миян комсомол котырöн юрнуöдысь Александр Васильевич Попов, кодöс ас костаным шулiм секретар Шурикöн. Дерт, тайö фото вылын абу став комсомолечыс, кодсюрö удж вылынöсь, кöть и шойччан лун. 
Ми ёна отсасьлiм совхозлы: арнас керавлiм лыс (вöчлiсны лыс пызь), пуктiм турун да ваялiм сiйöс тöлын ылi видзьяс вылысь тракторöн, арнас идралiм картупель. 
Сой выланыс гöрд дöра кöртöдаöсь, сикт кузя ветлöдлiсны дружинникъяс. Найö пыравлiсны картаясö, лавкаясö, торйöн нин праздник лунъясö, вöлiны клубын кино петкöдлiгöн да йöктан рытъяс дырйи. 
Йöзöс гажöдiгöн медводзын петкöдчисны бара жö комсомолечьяс. Пуктiм ворсöмъяс, та могысь ёна дасьтысим. Чукöртчылiгъясöн корлiм сёрни вылö и аныбса да дереваннöйса том йöзöс, корсюрö тшöтш юлiм чай. Асьным ветлiм жö на дорö. Зэв гажа вöлi, кор олöмнысö йитлiсны кык комсомолеч да ворслiм кöлысь. 
Медыджыд гажöн вöлi октябр 29-öд лун, кор пасйим комсомоллысь чужан лун. Таво сылöн котыртчöмсянь тырис 100 во. Пöся чолöмала вöвлöм комсомолечьясöс тайö тöдчана пасöн. Кöть ыджыд нин арлыд, сьöлöмъясным век на томöсь! 
Татьяна Тарабукина Сыктывкар. (Расова). 
Гижысьлöн чукöртöмысь 
снимок вылын: 
Руч совхозса комсомолечьяс.
Читать далее →

Пожöгдiнса клубын октябр 28-öд лунö гажаа мунiс комсомоллы 100 во тырöм пасйöм. Гаж видзöдан жыр тыр вöлi йöзöн. Матыстчöмаöсь абу сöмын пожöгдiнсаяс, но и орчча грезд-посёлокъясысь олысьяс. Клубöн веськöдлысь Е.Н.Лопыревалöн сёрнитöм бöрын йöз водзö медводдзаöн петiс Пожöгдiнысь дас морта «Тöждысьысь сьöлöмъяс» котыр. Тöдмöдiсны, кыдзи чужис комсомол, быдмис-сöвмис да мыйöн колис йöзлöн вежöрö. Петкöдлiсны гимнастикалысь «пирамидаяс», кодъяс йылысь ми вунöдлiм нин. «Прокати нас, Петруша, на тракторе» сьыланкыв улын петкöдлiсны ворсантор. Вомынбöжысь нёль морта «Кусыньттöмъяс» котыр уськöдiс тöд вылö комсомолечьясöс, кодъяс пуктiсны уна вын, лэптiсны вылi тшупöдö «Пожегодскöй» совхозöс. Видзöдысьяс пöвстысь кыпöдлiсны А.М.Третьяковаöс да О.В.Курочкинаöс. Öтиыс фермаын юрнуöдiс комсомолечьяслöн котырöн, а мöдыс сэтысь жö нималана кукань видзысь, бур уджсьыс ыстывлiсны том йöзлöн гаж вылö Кубаö. Казьтыштiсны и найöс, кодъяс абуöсь нин миянкöд, но ас кадö нимöдiсны эз сöмын Пожöг сиктöс, но и Кулöмдiн районöс. Лыддьöдлiсны орденъясöн пасйöмъясöс. И, дерт жö, юргисны комсомол кадся сьыланкывъяс.
Кекурсаяс пырджык петкöдчöны асланыс гижöм ворсанторъясöн. Со и öнi «Миян томлун» котырысь кык пöчö лабич вылын пукалiгмоз казьтылiсны томдырсö да висьталiсны, кыдзи кылöны асьнысö öнi.
Пожöгса культура керкаысь «Воськов» котыр петкöдчис комсомолечьяслöн чукöртчылöм йылысь серамбана ворсанторйöн. Сямныс ыджыд, йöз водзын кутчысьöны бура.
Ставлысь сьöлöм вöрзьöдiс «Нёльлöн сьöлöмъяс» котыр. Пожöг школаса велöдысьяс дасьтысьöмаöсь бура. Вурöмаöсь будёновкаяс, пилоткаяс, гöрд косынкаяс, кыпöдöмаöсь стройотрядö пырысьяслысь уна значока формаяс, вöчöмаöсь ППШ автоматлысь бала, сабляяс, дасьтöмаöсь уна чуксалан гижöд. Лов кыпöдан шылад улын комсомоллöн став кольöм кадыс мунiс йöктöмöн, збодера восьлалöмöн.
Став комсомолечыс вöлi еджыд дöрöма-ковтаа, сьöд гача-юбкаа, морöс выланыс Ленин мыгöра значокъяса. Видзöдан да кыпалан ловнад.
Ставсö тайöс видзöдiгöн збыльысь бергöдчылiм важас. Пожöгдiнын йöз водзö петкöдчылiс томлун.
Владимир Шомысов.
Гижысьлöн снимок вылын: вöвлöм комсомолечьяс.
Читать далее →

Читать далее →

Читать далее →

Пошаговая инструкция настройки приема цифрового эфирного телевидения

Читать далее →