«Российская охотничья газетын», «Охота и охотничье хозяйство» журналын, вöралöмлы сиöм мукöд петанторъясын бöръя кадö ёна сувтöны тулысын кыйсьöм дор, бöрыньтöны Африкаысь да Евразияысь вавывса да нюрвывса пöткаясöс дорйöм кузя сёрнитчöм дiнö миян страналысь сюртчöм, мый вöралысьяс серти, вайöдас тулысын кыйсьöм дзикöдз тупкöмöдз, а тайö, вежöртны кö паськыдджыка, нэмöвöйся культура, олöмлöн подувъясысь öти. Ыстысьöны нималана йöз, медсясö гижысьяс вылö, кодъяс шулöмаöсь, мый тулысын кыйсьöм во кежлö кыпöдö лов. Но öнiясö да воддзасö öткодявны оз ков. Йöз вежсисны дзикöдз, лоисны пöтлытöмöсь, мый легö, сiйöс и лыйöны, энь кöть ай. Районса öти охотовед став бöрсяыс видзöдны оз вермы. Водзтi вöлiны местаяс вылын вöралысьяслöн ас окота серти чукöртчöм котыръяс, районса ыджыд котыр, кодъяслöн медыджыд могöн вöлi буретш вöрын колана ногöн кутчысьöм вужйöдöм, а öнi найö абуöсь, колис джын кымын йöзыс сöмын Помöсдiнса котырын. Вöч, мый окота. Видзöдлыны кö мöд боксянь, воддза серти пöтка ёна чинiс. Водзтi кö любительлöн сьöлöмыс бурмылiс матiгöгöрö петалöмöн, то öнi колö мунны ылö, видзны уна лун, вöчны ыджыд рöскод. Со и гыпкöны, быттьö мунö война. Ме гижлi нин, кыдзи тулыснас, пыжö вына мотор пысалöмöн, кыйсьöны Воч ю вылын. Öти веськöдлö пыжнас, а кыкöн лыйлöны. Тадз жö, кöнкö, и мукöдлаын. Та вöсна ме сы дор, медым дугöдны тулысын кыдзи вöрса, сiдзи и вавывса пöткаöс кыйöм. Тадзи жö лыддьö и Помöсдiнса вöралысьяслöн котырöн веськöдлысь М.В.Курочкин, кодкöд ме сёрнитi регыд на.
-Тулысыс водзö рöдмöм-содöм вылö и вöр-валысь лöнь олöмсö торкны оз ков. Но миян вöралан котырысь кызвыныс лыддьöны, мый тупкыны колö сöмын вöрса пöтка вылö, а уткаяс да дзодзöгъяс, кодъяс лэбöны водзö, лыйлыны, — шуис Михаил Васильевич. — Ог кö пö лыйлöй ми, уськöдасны мукöдъяс. Оз кутны тöдвыланыс, мый лыйлам кö ми, вавывса пöткаыс лоö нöшта этшаджык. Оз öд уткаясыс локны кыськö мöд планета вылысь, а öтарö-мöдарö лэбöны Му планетавывсаяс. Öтарö — быдтысьны, мöдарö — тöвйыны.
Районса охотовед Павел Дмитриевич Кузнецов сулалö сы дор, медым тувсовъя кыйсьöмсö восьтны, но сöмын вавывса пöткаяс вылö — кыйны уткаясöс да дзодзöгъясöс.
-Тулысыс сёрмö, ме вöзйи ас районын восьтны вавывса да нюрвывса пöткаясöс кыйöм май 9 лунсянь. Тайö лоö оз водз ни сёр, дас луннас позьö кыйсьыны бурпöт. Вöрса пöткаöс кыйны дугöдöм — буртор. Чукчи-дозмöр, тар да байдöг колис зэв этша, эмышт сöмын сьöла. Абу тшыгъялан кад, позьö бергöдчыны татöг, — тöдчöдiс районса охотовед.
-Менам батьöй некор эз кыйсьывлы тулыснад и ме ог кыйсьы, ва вылö да вöрö петалiгöн весиг ружьеöс ог босьтлы, — висьталiс бур тöдса, Керчомьяысь Иван Андреевич Лютоев. — Ме öтведайтлi да, кызвыннас восьтöны кыйсьöмсö сёрмöмöн, кор пöтка поз вылын нин. Зывöк кывзыны, кор висьталöны, мый лыйлывлöны кыксё уткаöдз. Йöзлöн дзикöдз бырис сöвестьыс. Йöв йылын, кодöс ме кöртымалi да видзöда сэнi пöрадок бöрся, уткаясыд быд куръяын, а горувджык лэчча да öтиöс ог аддзыв ин борд шы ог кывлы. Менам угоддьöö яндысьтöм синъясыд сюйсьöны мырдöн да ковмывлö сёрнитны чорыдкодь. Регыд на йи улö öти неморт «двадцатка» кулöмъяс вöлi вöйталöма, синмас чунь весиг оз тöр.
Тулысын кыйсьöм йылысь сёрни мунö паськыда. Медсясö «турунвижъяслöн» (вöр-ва дорйысьяслöн) водзмöстчöмöн. Кыдзи юöртiс «Российская охотничья газета», тавося март 18 лунö тулысын кыйсьöм дугöдöм йылысь сёрни вöлi Россия Федерациялöн Общественнöй палатаын. Сёрнисö кыпöдiс водзмöстчысь котыр, кодi чукöртiс 39780 кырымпас. Алтай крайысь вöр-ва дорйысьяслöн Геблерса котырöн веськöдлысь Алексей Грибков висьталiс, мый Алтайын вавывса пöткалöн лыдыс бöръя дас воöн чинiс кык пöв, а бöръя вит воöн дозмöръяслöн — öтиöн-джынйöн пöв. Сылöн кывъяс серти, тулысын полошуйтчöмöн вавывса пöтка оз вермы лöсьöдны весиг позсö.
-Öнiя йöзлöн абу некутшöм кутöд да дзик та вöсна и оз позь восьтны тувсовъя кыйсьöмсö, — тöдчöдiс А.Грибков. — Весиг оз тöдны, кутшöм пöтка лэбö, а лыйöны. Виöны ставсö, мый легöдчö. Тайö абу кыйсьöм, а ме ог тöд мый.
Вöр-ва дорйысь петкöдлiс браконьеръяслысь фотографияяс, кодъяс лыйлiсны эз сöмын сёйны шогман вöрса да вавывса пöткаясöс, но и сюзьясöс да варышъясöс. А.Грибков кывкöртiс, мый тулыснас ружьеöн ветлöдлöны сöмын браконьеръяс.
Наукаяс академиялöн вöр-валысь озырлунъяс сöвмöдöм да босьтöм кузя лабораторияса уджалысь Софья Розенфельд юöртiс, мый тувсовъя кыйсьöм дугöдöма Европаса уна странаын. Нинöм лёкыс оз ло, дугöдлам кö кутшöмкö воясö и ми, мед содiс пöткаяслöн ёна нин чинöм лыд. Лёк сiйö, мый путёвкаысь этшаника вештöмöн кыйсьысьлы позьö лыйлыны пöткаясöс кöть кöнi, поводдялöн шондöдiгмоз лунвывсянь надзöникöн мунны войвылö да кыйсьыны мартсянь июнь шöрöдз 10 лун пыдди 3,5 тöлысь. Учёнöй корис дзикöдз тупкыны кыйсьöм Сибирын да Ылi Асыввылын, кöнi вавывса пöткаяслöн лыд бöръя 10 воöн чинiс вывтi ёна.
«Вöралысьяслы йöзöданторъяс» öтувтöм редакцияса медшöр редакторöс медводдза вежысь Александр Лисицын висьталiс, мый газетъясö да журналъясö вöралысьяссянь воис унаысь уна майшöдлана гижöд, найö вöзйисны уна буртор, но кыйсьöм кузя департамент быттьö пельтöм да синтöм.
Миян районын кыйсьысьяс бура унаöн жö, охотовед П.Д.Кузнецовлöн висьталöм серти, официальнöя куим сюрс, а сiдзсö, вермас лоны, куим пöв унджык. Чукöртлiсны кö быттьö районлöн тшупöдын, дерт жö, вöзйисны ассьыныс мöвпъяссö, кодъяс лöсялöны буретш да ас районлы. Но миянöс, кыдз шулöны, сё во нин некод некытчö эз чукöстлы, быттьö абуöсь. Чукöртчылöны сöмын Помöсдiнса вöралан котырö пырысьяс. Кодъяслыкö ёна колö, медым помыс вöрын да ва вылын öнiя бардакыслы эз волы.
Мöвпалöны чукöртлыны странаса вöралысьяслысь съезд, а сэтчöдз чукöртны кырымпасъяс, медым шыöдчыны президент В.В.Путин дорö, кодi эськö лöсьöдiс тайö юкöнас ставсö морт ногöн.
Татчöдз ылын на, а утка-дзодзöг кыян кад матын нин. Чайтöны, мый миян районын воссяс май 9 лунö. Виччысьöны юралысь Вячеслав Гайзерлысь индöд. Вай ог босьтöй кианым ружьенымöс, ог мунöй юяс да тыяс вылö.
Василий ЛОДЫГИН.