Совхоз тупкысьöм бöрын миян грездын унаöн колисны уджтöг. Том йöз кодкö да мунö бокиö удж корсьöм могысь, кодкö лэдзчысьö да оз нин эскы аскиа лунö. Оз чужанiнын, а районлöн ылi пельöсын Пузлаын зiльö и менам Владислав Дёмин вок.

Ичöт классъясас велöдчис грездса школаын, сэсся Ярашъюын, помалiс Пожöгын. Быдмис шань да сибыд зонкаöн. Сылöн вöлi уна ёрт, накöд ворсiс футболысь, ышöдiс и мукöдöс. Весиг петкöдчисны ордйысьöмъясын. Миян бать-мам век олiсны уна скöтöн, видзлiсны кöкъямыс куканьöдз, и дерт, ас овмöсад уджыд вöлi юр выв тыр. Эз ков индыны, вокöй ачыс гидö пыртлiс турун, петкöдiс куйöд, юктöдiс скöтöс. Рытъядорыс вайöдлiс йирсянiнысь. Ас овмöсöн да ас керкаын олiгöн пыр колö кыткö да дзоньтавны либö вежны-выльмöдны. Тайö уджъяс дырйи век вöлi орччöн Филипп Евлогиевич батькöд. Майбыр, батьлöн зарни киясыс, ставсö кужö, велöдiс и Владиславöс. Öтлаын кыпöдiсны выль пывсян, гид да мукöд стрöйба. Ас местаын став инструментъясыс, батьöй кö абу гортын, наöн зэв сюся вöдитчö и Владислав, колiгöн пыр жö кыткö да лöсьöдыштас.

Менам пöль зэв бура гудöкасьлiс. Ворсiгöн ас дорас пуксьöдлiс и ичöт Владиславöс. Велöдiс, чайтiс, мый и внукыс кутас сяркöдны рöдвуж чукöртчылiгöн да гажöдчылiгöн. Но эз тай ло сiдзи. Но век жö тыдалö шылад радейтöмыс пукалiс пытшкöсас, ачыс велöдчис ворсны гитараöн, медводдзаысь сьылöм-ворсöмöн петкöдчис школа помалысьяслöн бöръя звöнок дырйи.

Ёна кöсйис мунны армияö. Школа помалöм бöрын военкоматсянь ыстылiсны велöдчыны ДОСААФ-лöн Сыктывкарса юкöнö, кöнi босьтiс водительлысь С категория. Служитны веськалiс Мурманск обласьтö, но чорыда висьмöм вöсна кык тöлысь мысти лэдзисны. Бурдöдчöм бöрын содтöд велöдчис Д категория вылö да пырис уджаны Ярашъюса школаö. Кык во новлöдлiс челядьöс автобусöн. Тулыс-арын шогмытöм туйясöн ёна жугласис техника, пыр колiс дзоньтавны либö вежны запчасьт, мед быд лун вöлi дась петны туйö. Ёна отсасис батьыс, öд сiйö машинаяслысь тöдiс гуг и бан. Сэсся вок мунiс Пузлаö. Квайт во нин зiльö «Комилесбизнес» котырын. Медводз ыджыд машинаöн грузла ветлöдлiс Ухтаö да Сыктывкарö, а таво Выль во водзын сылы сетiсны выль машина. Ачыс сыла ветлiс Москваöдз.

Лун и вой сiйö туйын. Ачыс сiйö зэв шань, пыдди пуктö йöзöс, кадöн оз артась. Меным да ичöтджык Богдан воклы радейтана да зэв тöждысьысь вок, бать-мамлы муса пи. Сиам Владиклы став бурсö, мед туйын да олöмын вöлi ставыс лючки-ладнö.
Марина Дёмина.
Великополье.
Гижысьлöн чукöртöмысь снимок вылын шуйгавывсянь Владислав Дёмин ёртыскöд.