РАЙОНЛÖН АСКИÖ ВОСЬКОВЪЯС

Май 24-öд лунö районса юралысь Дмитрий Александрович Шатохин аддзысьлìс республикаса юралысь Вячеслав Михайлович Гайзеркöд да вочавидзис сылöн юалöмъяс вылö.

Вячеслав Гайзер:

— Дмитрий Александрович, неважöн тырис во, кыдзи Тì босьтчинныд уджö. Тìянлы вичмис разьтöм мытшöдъяслöн вель ыджыд гöрöд. Колìс унатор бергöдны, гöгöрвоны, туявны, лöсьöдны. Талун окота кывны, кыдзи, Тìян серти, мунö районын удж, кутшöм падмöгъяс эмöсь, мый сямминныд вöчны, мый оз лэдз восьлавны водзö.

Дмитрий Шатохин:

— Вячеслав Михайлович, ме чайта, мый быд юралысь лыддьö, мый районыс торъялана, но Кулöмдìн район збыльысь аслыспöлöс. Торъялö мукöдъясысь и йöз лыдöн (унджык сöмын Емдìн районын), и ыдждаöн, и уна вöрöн. Бöръя воясын йöз век чинìс, но 2011 воын кулöмаяс серти чужысь лоис 7 процентöн унджык. Асланым уджын ми мыджсям шöр документъяс вылö. Медводз тайö районлöн 2020-öд воöдз сöвман туйвизь. Медтöдчанаясöн лоöны экономика сöвмöдöм, йöзöс социальнöя дорйöм да олöмнысö бурмöдöм. Ми дасьтìм 13 программа. Водзö вылö, кыдзи и Коми республикалöн, миян лоас программаяс подув вылын дасьтöм бюджет. Районлöн тавося бюджетыс — миллиардысь унджык шайт. Кольöм воын вöлì 700 миллион гöгöр. Содö сы вöсна, мый асланым доходным лоис унджык, пырöдчам республикаса да федерацияса программаясö. Районса бюджетысь медся уна сьöм, 67 процент, мунö велöдан юкöн вылö. Миян медся уна велöдан учрежде- ние — 73. Та кузя кутшöмсюрö мöвпъяс эмöсь нин.

Содö асланым сьöм. 2010-öд воын кö вöлì 167 миллион, то таво медводдза кварталын лоис 205 миллион. Содìс подоходнöй вот весьтö. Кольöм воын вель уна сьöм воис асэмбуралöмысь. Вермим содтыштны сьöм экономика да социальнöй юкöнъяс вылö.

Сöвмöм вылö вынсьöдìм куим шöр туйвизь: йöзлысь олöм бурмöдöм, выль ног сöвмöм да экономика выльмöдöм, районöн бура веськöдлöм. 2012-öд во вылö бюджет примитìгöн ми депутатъяскöд сёрнитчим, мый медтöдчанаöн лоöны экономика боксянь сöвман программаяс. Кольöм воын «Ичöт да шöр предпринимательстволöн сöвмöм» программа вылö торйöдлìм 1700 сюрс шайт, таво — куим миллион шайт. Таво пыртìм грантъяс. Ставыс лоис 1200 сюрс шайт. Нöшта öти миллион шайт миянлы вичмис республикаса конкурсö пырöдчöм бöрын. Район уджалö лизинг кузя регионлöн программа серти. Район республикаын öтнас пырöдчис том йöзлöн предпринимательство кузя федерациялöн программаö, миянлы вичмис сьöм.

Районлöн медшöр юкöнöн лоö вöр овмöс, бюджетö 60 процент сьöм воö сэтысь. Та вöсна вöр овмöслöн сöвмöм лоö шöр туйвизьöн. Лёк, мый бöръя кык воöн кызь процент вылö чинìс вöр заптöм. И эз сöмын «Монди СЛПК»-лöн, но и вöр овмöсын уджалысь районса котыръяслöн. Тайö артмö сы вöсна, мый абу заптöм вылö вöр. Ми пырöдчим вöр видзöм да рöдмöдöм кузя республикаса программаö. Но миян предпринимательяс зэв öдйö тыртöны урчитöмасö. Кольöм воын вöлì 72 сюрс кубометр, таво — 48. А предпринимательяс дасьöсь вöчны медся этшасö 100 сюрс. Ми гижим вöр комитетö да экономика министерствоö, медым содтìсны квотаяс, и зэв окота, медым вöзйöмнымöс кылìсны.

Районлöн эм пескöн могмöдöм кузя торъя программа. Предпринимательяс, дас кымын морт, вöчöны пес öтувтчöмöн. Ми отсалам вöрын уджалысьяслы и «Мондикöд» социальнöй ёртасьöм кузя сёрнитчöм серти. Тайö пöдрад кузя сёрнитчöм да сьöма отсöг. Ме пыра республикаса торъя котырö, кодì уджалö вöр колясъяс иналöм вылын. Сёрнитìм нин кутшöмсюрö ломтысянìнъяс вуджöдны на вылö.

Программаяс веськöдöма «Усть-Куломский лес» котырöн пиломатериалъяс, мукöд котыръясöн арболитöвöй плитаяс, профилируйтöм брус вöчöм, вöр пыдìсянь переработайтöм вылö. Удж котыртысьяс вермисны дорйысьны экономика сöвмöдан министерствоын да босьтìсны грант. Öнì ставныс уджалöны. Районын лэдзöны ломтысян брикетъяс, кодъясöс иналöны Сыктывкарын, босьтöны весиг карса кутшöмсюрö пывсянъяс. Неважöн на, тöлысь джын сайын, видлìм ломтыны брикетъясöн Помöсдìнса котельнöй, видзöдлìм, ыджыд-ö бурыс. Кывкöртöдъяс юöртìм котырлы, кодì уджалö вöр колясъяс иналöм вылын.

Видзöдлыны кö лизинг кузя, ми отсалам ичöт да шöр бизнеслы. Пример пыдди позьö вайöдны предприниматель С.Мастюгинöс. Ми отсалìм сылы ньöбны трактор-погрузчик. Сьöм сетìс «Монди СЛПК», пуктìс тшöтш и ассьыс. Öнì лöсьöдö уджалöм могысь туйяс. Ми сыкöд кырымалìм социальнöй ёртасьöм кузя сёрнитчöм, и сìйö весалö тшöтш Тимшер вожысь туйяс.

«Монди СЛПК»-кöд социальнöй ёртасьöм кузя сёрнитчöм серти кольöм воын Помöсдìнса кооперативлы ньöбим кöрым заптан техника. Таво ньöбим Пожöглы. Зэв бур программа, кор видзöм сьöм бергöдöны бöр. Таво «Пожöг» кооператив сыысь кындзи, мый ньöбис кöрым заптан техника, сьöм вылö, кодöс бергöдìс видз-му овмöс министерство, ньöбис МТЗ трактор. Водзö воысь сьöм ми сìдзжö пуктам ньöбны техника, и тадзи вочасöн вужвыйöн вермам вежны важмöмсö.

Депутатъяскöд сёрнитìгöн ми воим кывкöртöдö, мый колö сöвмöдны выль производствояс. Видз-му овмöс сöвмöдöм лоö шöр могъясысь öтиöн. Помöсдìнын нянь пöжалан заводысь вöчам йöв переработайтанìн, Зимстанын выльмöдам яйысь вöлöга вöчанìн. Зимстанын уджалöны нин, лэдзöм вöлöга вузалöны кыдзи районын, сìдзи и Сыктывкарын «Рублик» рынок вылын да «Дары Севера» лавкаын. Кöсъям вужвыйöн дзоньтавны Пожöгдìнын да Скöрöдумын фермаяс. Бизнес-планъяс дасьöсь. Ми уджалам республикаса инвестиция фондкöд, кодì вичмöдö отсöг. Котыртìм видз-му овмöс кооператив, кытчö пырис видз-му овмöсса öкмыс предприятие. Вöлöга иналöны Кулöмдìнын видз-му овмöс рынок вылын. Кооператив ньöбö лишалана йöв сиктса олысьяслысь да крестьянин овмöсъяслысь. Тайö кооперативыс уджалö бюджетса котыръяскöд, могмöдö вöлöгаöн пöшти став учреждениесö. Видз-му овмöслы сьöма отсöг бöрын кольöм воын пöшти кык пöв унджык заптìм кöрым, унджык лысьтöны йöв.

Миянлы выльтор — туризм сöвмöдöм. Татчö ковмас уна сьöм. Районса öткымын предприниматель уджалö нин тайö юкöнын. Пример вылö, Н.А.Гичев сöвмöдö туризм Кадамын. Кутасны кö уджавны кывкутöмöн, бергöдам сьöм, кодöс видзисны основнöй средствояс ньöбöм, дзоньтасьöм вылö.

Ыджыд тöждлун вайö жилищно-коммунальнöй овмöс. Зìлям пырöдчыны республикаса кыдз позьö унджык программаö. Шуам, «Сöстöм ва» программа серти торйöдìсны 57 миллион шайт. Таысь кындзи, эмöсь вöзйöмъяс, медым босьтны сьöм федерациялöн программаяс серти. Кольöм воын «Сöстöм ва» бала дасьтöм вылö торйöдìм сьöм Югыдъяглы да Кужлы, öнì кöть кор вермам пырöдчыны программаö.

Районын шуим вужвыйöн дзоньтавны да кыпöдны гырысь 23 стрöйба. Кык вежонöн öтчыд чукöртчывлö торъя котыр. Вöчам лöп-ёг да шыбласъяс иналанìн. Ме чайта, мый балаыс таво лоас дась. Тырвыйö дась нин бала Кулöмдìнын 120 местаа сад кыпöдöм вылö. Кырымалìм сёрнитчöм, код серти сьöм вичмöдасны республикалöн бюджетысь. Июльын вермам нин босьтчыны уджö. Помавны колö локтан вося август öтиöд лунöдз, мед вöлì дась выль велöдчан во кежлö.

Колö дзоньтавны Дон вискысь ва кутан мытшöд. Республика вичмöдìс нин 350 сюрс шайт, отсалìс В.А.Тукмаков. Баласö дасьтìм. Нёльöд кварталын виччысям мытшöд дзоньталöм вылö 1900 сюрс шайт республикаса программа серти. Нöшта воас сьöм федерацияысь.

Кулöмдìнын кыптас дзоньвидзалун ёнмöдан комплекс. Балаыс дась, сетìм видлалöм вылö. Тöлысьöн-джынйöн мысти кымын петам аукцион вылö. Тайö комплексыс лоас вель ыджыд. Кор сìйö кутас уджавны, нöшта унджыкöн пырöдчасны спортö. Кольöм воын кö районъяскостса спартакиадаын ми босьтìм сизимöд, то таво — нёльöд места. Миян район пырöдчис дзик став ордйысьöмö.

Миян районын сьöкыд туйясöн. Республикаса туй агентство водзö вылö кöсйö вужвыйöн дзоньтавны посъяс. Бур сìйö, мый районлöн лоö асфальт да бетон вöчан выль завод. «ДорКоми» вештысьöма нин сыысь. Мед эськö «Монди СЛПК» ёнджыка дзоньталìс туйяс, кытì петкöдö вöр. Транспорт кузя вот ми веськöдам сöмын туйяс вылö. Тайö вотсö юклам овмöдчöминъяс костын, кодъяс дасьтöны сметаяс да дорйöны найöс. Таво на костын юклìм 2,3 миллион шайт. Кутам лача туйяс дзоньталöм могысь субсидия вылö.

Урчитöмторъяс лыдын Немдìнын 198 велöдчысь вылö школа кыпöдöм. Баласö дасьтылìсны 2004-öд воын да ковмис выльмöдны. Лоас конкурс да тыдовтчас, кодì кыпöдас школасö. Сьöм кузя сёрнитчöм министерствокöд ми кырымалìм нин.

Нöшта кутам кыпöдны Мысын 40 места вылö школа-сад. Та вылö эм 24 миллион шайт. Ми выльысь видзöдлìм смета, мед чинтыны сìйöс. Кутшöмсюрö уджъяс вермам вöчны асьным. Шуам, разьны важ школасö, вöчны ва видзанìн. Лоас аукцион, эм нёль котыр, кодъяс кöсйöны лэптыны сìйöс. Контракт серти школасö колö помавны 2013-öд волöн июнь öтиöд лун кежлö.

Донын колö кыпöдны культура керка. Сìдзжö сэнì абу спортзал. Таво торйöдìм сьöм, медым дасьтыны бала. Кöсъям, медым сы вылö мунìс этшаджык сьöм, арталам кыпöдны 37 миллионысь. Артмас кö, кутам кыпöдны и мукöдлаын.

Колö кыпöдны выль поликлиника. Та кузя сёрнитìм В.Стахановкöд да Я.Бордюгкöд. Эскам, мый 2014-öд либö 2015-öд воясын кутшöмкö программаö веськалам. Дзоньвидзалун юкöнын вöчам вужвыйöн дзоньтасян уджъяс. Июнь шöрын помаласны дзоньтавны Пожöгса больнича.

Таво районö воис машинаöн новлöдлан кык комплекс: маммограф да флюорограф. Флюорограф босьтчис нин уджавны. Найö кутасны могмöдны йöзöс и орчча Кöрткерöс да Мылдìн районъясысь.

Но социальнöй юкöнын абу ставыс тыр-бур. Велöдан 25 учреждениелöн абу лицензия. Дерт, та вылын уджалам. Бöръя кык воöн тырмытöмторъяс бырöдöм вылö сьöм торйöдìм кык пöв унджык. Арталам, мый во помöдз лицензия босьтас дас кымын учреждение. Уджалам кык судта керкаяс кузя — дасьтам торъя техусловие. Сьöм вичмöдìс республика. Кутшöмсюрö удж вöчим тувсов каникулъяс дырйи, öнì уджалам водзö. Но медся ёна майшöдлö сìйö, мый оз тырмыны садъясын местаяс. Тайö мытшöдсö вермам разьны: Кулöмдìнын кыпöдам 120 места вылö сад. Мартын восьтìм лунся öти группа, та могысь дзоньталìм патера. Волывлö 15 кага.

Районса администрация восьса районса став йöзлы. Ветлöдлам район пасьта, волìм районса став овмöдчöминö. Ветлìгъясöн аддзысьлам йöзкöд, гижам став вöзйöмъяс. Протоколъяс петкöдам районса администрациялöн сайт вылö. Пыр видзöдам, кыдзи вöчсьöны тшöктöмторъяс. Чукöртам сиктъясын да посёлокъясын социально-экономическöй олöм йылысь юöр. Пример вылö, республикаысь Общественнöй палатаса юрнуöдысьöс вежысь Е.Вологин кайлìс Ягкöджö, ветлìс «Помöсдìнса лесхозлöн» пилорама вылö, мебель вöчанìнö, аддзысьлìс йöзкöд. Администрациялöн сайт вылысь ссыл-ка кузя позьö аддзыны ветлöмлысь про-токол, кöнì пасйöма, мый йылысь сёр-нитìсны, кутшöм кывкöртöдö воисны.

Миян чукöртчис депутатъяслöн бур сöвет. Мый вöчсьö районын, став бöрсяыс эм видзöдлас. Топыда уджалам и овмöдчöминса юралысьяскöд. Отсалам налы быдторйöн, торйöдам сьöм, и, дерт жö, видзöдам, кыдзи найö уджалöны. Таво юасим олысьяслысь, кыдзи найö донъялöны ассьыныс юралысьсö, сэсся тöдмöдìм юралысьясöс вочакывъясöн. Тайö сетìс позянлун бöрйысьöмъясöдз нин гöгöрвоны, кодì эськö вермас лоны сиктса юралысьöн, кутшöм лоас веськöдлан котыр.

Уджалам общественнöй котыръяскöд. Пыртìм налы субсидияяс сетöм. Та кузя став юöр восьса, уджалö конкурснöй комиссия.

Медтöдчана туйвизьясысь öтиöн лоö том йöзлысь во пасйöм. Восьтìм сìйöс районъяскостса «Йиркап» ворсöмöн. Волìсны Кöрткерöс да Мылдìн районъясысь ныв-зон. Том йöзлы сиöм во нуöдöм кузя эм торъя план, кодì артмö öкмыс балаысь. Том йöзлы, кодъяс сюртчасны во чöжöн, во помын сетам сертификат.

Вячеслав Гайзер:

— Быд балалöн эм аслас веськöдлысь?

Дмитрий Шатохин:

— Да. Таысь кындзи, ми котыртìм торъя комитет, кодì видзöдö, кыдзи пöртсьöны олöмö тайö балаясыс. Том йöзлöн во вылö торйöдìм 168 миллион шайт. Татчö ми пыртìм и гырысь стрöйбаяс кыпöдöм, шуам, дзоньвидзалун ёнмöдан физкультурнöй комплекс. Сìдзжö стрöитчöм вылö том семьяяслы му юкöнъяс сетöм.

Таво ми дасьтìм том специалистъяслы отсалöм могысь, кодъяс локтасны уджавны районö, торъя программа. Сы серти вичмöдам 600 сюрс шайт. 300 сюрс шайт артыштöма Помöсдìнö локтысь педиатрлы оланìн ньöбöм вылö. Коляссö 50 сюрсöн кутам сетавны том специалистъяслы оланìн дзоньталöм могысь.

Отсалìм том йöзлы шöрин восьтìгöн, сетìм налы жыр да дзоньтасьны сьöм. Найö асьныс пырöдчисны республикаса программаö, код серти вичмис оргтехника ньöбöм вылö сьöм. Сёрнитчöмаöсь предпринимательяскöд, найö вичмöдìсны том йöзлöн кафе улö жыр. Пожöгын воссяс тир.

Миян синъяс улынöсь унасикас котыръяс. Кебанъёльын, 15-öд номера училище подув вылын, котыртчисны ас окотаöн биысь дорйысьяс. Котыртам пöрадок бöрся видзöдысьясöс да неминуча суöмысь дорйысьясöс. Кöсъям, медым татшöм сяма общественнöй котыръяс, кыдзи «Том кад», вöлìны гырысь сикт-посёлокъясын, шуам, Помöсдìнын, Зимстанын, Югыдъягын.

Уджалö проводтöм Wi-Fi йитöд. Прöст кадö том йöзлы позьö юксьыны выльторъясöн, вöзйыны ассьыныс мöвпъяс.

Вячеслав Михайлович, эмöсь кутшöмсюрö мöвпъяс, кодъясöн кöсъя юксьыны Тìянкöд. Кыдзи ме шулì нин, районлöн экономика кызвыннас кутчысьö вöр вылын. Сэкжö эмöсь мукöд ыджыд позянлунъяс. Тöдсаöсь мупытшса тöдчана куйланìнъяс. Шуам, Вапöлын — мраморит, Белоборскын — щебень да известняк, Пузлаын — боксит. Ме серти, промышленнöй позянлунъясöн ми помöдз ог вöдитчöй, и колö бергöдчыны та дорö. Мед эськö республикаса правительство отсалìс миянлы восьтны Белоборскысь мупытшса куйланìн. Декабрын «Комиизвесть» котыр босьтìс лицензия, медым видлавны да перйыны тайö куйлöдсö. Ми эськö вермим лэдзны щебень. Изйыс зэв мича да ён. Артыштны кö нöшта, мый миян районын ёна ковмас дзоньтавны да вöчны туйяс, гашкö, Коми республикаса инвестиция фондлöн лоас позянлун отсыштны. Администрация боксянь та кузя вичмö зэв ыджыд отсöг. Тайö баласö зэв бура тöдö А.Буров. Ми сìдзжö видзöдлìм уджалысьяс кузя. Лоас 70 уджалан места, таысь кындзи, ковмасны йöз Белоборскса туй лöсьöдöм вылö. Тайö бала вылö миян ыджыд лача.

Ыджыд мытшöд эм предпринимательясöс вöрöн могмöдöмöн. Лоас кö «ЦентроВудКом» кузя ясыд кывкöртöд, прöстмысь вöрсö ми сетам асланым предпринимательяслы. Мöд мытшöд, код йылысь талун казьтылì нин, вöр рöдмöдöм. Колö та вылö кыпöдны квотаяс.

Колö кыпöдны школа-сад Помöсдìнын. Дерт, гöгöрвоана, мый 2013 ни 2014 воын тайö оз ло. Но водзö вылö мед вöлì та кузя ясыд. Тайö вермас лоны сэтшöм школа, кодì кутас сетны зумыд, бур тöдöмлунъяс. Танì зэв бур велöдысьяс, и котыртны кö челядьöс новлöдлöм, ёнмöдны материальнöй подув, лоас вына школа.

Локтан «Василей» мунас кызьöдысь, лоас тшупöдаöн. Миян эм мöвп культура да туризм сöвмöдöм могысь кыпöдны районса музей. Тайö тшöтш и бöрйысьысьяслöн тшöктöм. Миян чукöрмис 1300 сюрс шайт. Видлалìм нин балаяс, юрсиктысь корсим бур места. Эм кö позянлун, кора туристалан да экономика программаяс пыр отсыштны пöртны олöмö тайö баласö. Кызьöд «Василейлы», сìйöс котыртысьяслы тайö лоас бур козинöн.

2010-öд воын Тì сетлìнныд индöдъяс. Öтиöс 24 патераа олан керка кыпöдöм кузя. Помалìм медводдза секция. Сэнì олö кöкъямыс семья — киссьöм керкаысь вуджысьяс. Мöд-кö, колìс чукöртны бизнес сöвмöдöм кузя выль мöвпъяс. Ме висьталì нин нёль программа йылысь, кодъясöс пöртам олöмö. И быдлаö зìлям кыскыны том йöзöс. Öнì дон босьттöг велöдам 30 том мортöс, кыдзи пырöдчыны бизнесö. Котыртны отсалìсны вöр институт да «Монди СЛПК». Отсалìм котыртны «Том кад», медым пыртны выльторъяс том йöзлöн олöмö. Коймöд тшöктöм — тайö «öти öшиньлысь служба» котыртöм. Тайö службаыс уджалö воддза восянь. Февральса сессия вылын торйöдìм сьöм, медым дзоньталìсны жырнысö. Став корöмлы лöсялöмöн, «öти öшиньлöн служба» кутас уджавны июнь шöрсянь.

Вячеслав Гайзер:

— Босьтчöмыс бур. Районын том йöзкöд уджалан опытöн колö юксьыны мукöдъяскöд. Тìян эм и вина юöмкöд тыш нуöдан бур опыт. Колö юксьыны и тайö опытнас.

Дмитрий Шатохин:

— Вöлì Госсöветлöн социальнöй политика кузя «гöгрöс пызан», кöнì гöгöрбок видлалìсны кыдзи республикалысь, сìдзи и миянлысь опыт, кыдзи пöртны олöмö вина юöмкöд тышкасян программа. Районын куим во кежлö торйöдìм 1300 сюрс шайт. Татчö пырö и йöзöс кодируйтöм, и предпринимательяскöд удж. Сёрнитчöм серти чинтöны вузасян кад шойччан лунъясö, оз вузасьны курыдторйöн культура учреждениеяс дорын. И, дерт жö, социальнöй реклама, том йöзöс унасикас уджö кыскöм. Бурланьö вежсьöмъяс эмöсь. Кольöм воын кö медводдза кварталын юöмысь кулìс 198 морт, то таво 160.

Тайö программаö сюртчöны Луздор, Сыктыв районъяс. Аддзысьлìм Сыктыв районса веськöдлысьöс вежыськöд, сёрнитчим, мый волам на дорö, котыртам семинар-аддзысьлöм Кулöмдìн, Луздор да Сыктыв районъяс костын. Сёрнитам, мый нöшта позьö вöчны.

Вячеслав Гайзер:

— Правительстволöн чукöртчылöм вылын ми кутам сёрнитны тöв кежлö дасьтысьöм йылысь. Кыдзи тì донъяланныд районлысь тöв кежлö дасьлунсö, мый вöчанныд гожöмын, медым лоны тырвыйö дасьöн? Эм-ö могмöдысьяс водзын бюджетлöн уджйöз?

Дмитрий Шатохин:

— Компания торйöдìс сьöм дзоньтасьöм да мыйсюрö вужвыйöн дзоньталöм вылö. Муниципальнöй ломтысянìнъяс кузя мытшöдъяс абуöсь. Бюджетса учреждениеяслöн уджйöз бöрся ми видзöдам сюся. Асьным кö ог вештысьöй ас кадö, мый и сёрнитны йöзлöн вештысьöм йылысь. Талун кежлö эм уджйöз би кузя. Тайö гöрöдсö кутам разьны. Учреждениеяслöн, кодъяс вуджисны биöн шонтысян приборъяс вылö, би кузя рöскод содìс пöшти куим пöв. Тайö артмö ёнджыкасö сы вöсна, мый важöсь керкаяс. Выль стрöйбаясын ставыс колана ног.

Вячеслав Гайзер:

— Медым пуктыны конвектор либö пöрт, колö медводз вöчны ставсö, медым шоныдыс кутчысис, эз артмы ывласö ломтöм.

Бöръяпомыс сувтла тìян велöдан учреждениеяс вылö. Тìян вывтì уна лицензиятöмыс. Тадзи оз позь, колö уджавны та вылын ёнджык. Сìдзсö меным зэв нимкодь, мый Тì бура гöгöрвоанныд, кыдзи бырöдны тырмытöмторъяс. Ставсö урчитöма да пасйöма.

Ме серти, районса олысьяс эз сорсьыны, мый бöрйисны Тìянöс юралысьöн. Ассянь сиа уджаныд водзö вермöмъяс. Ми, дерт, кутам отсавны. Но а тìянлы менсьым став корöмъяс да тшöктöмъяс, кодъяс йылысь сёрнитìм, колö вöчны водзö уджалöмöн. Пырöдчыны государственнöй, дыр кад кежлö артыштöм программаясö. И аттьö Тìянлы бур уджысь.

Сёрни серти дасьтìс

Лидия ЛИПИНА.