[ A+ ] /[ A- ]

Нималö киподтуйöн

Уджöн могмöдан шöринысь 58,8 сюрс шайт босьтöм бöрын во мысти öткымынъяс дугöдчöны асшöр уджысь, сы вöсна мый сöвмöм вылö содтöд сьöм оз аддзыны. Őткымынöн сюртчылöны «Шöр да ичöт бизнес сöвмöдöм» республикаса программаö, но грантъяс вичмöны лыдалы. Сiйöс, пример вылö, эз сетны Кулöмдiнысь А.Э.Битнерлы, кодi асшöр уджö босьтчис 2011 вося мартсянь.

— Шöр школа помалöм бöрын велöдчи водительö, — висьталiс Алексей Эрихович, — но армияöдз уджалi сöмын тöлысь. Армия бöрын пыр вöлi машиналöн руль сайын. Бöръя 9 восö вöлi ас вылö уджалысь дорын. Сьöм мынтiс, но книжкаö уджöс эз пасйы. Тайö коркö тöдчас пенсия вылö. А сiдзсö уджалан стажöй тырас. Őд меным сöмын на 42 арöс.

— А мыйла тi босьтчинныд вöчасьны пуысь?

— Менам батьöй, Эрих Эрихович, зэв киподтуя морт. Нэмсö уджалiс райсельхозтехникаын. Радейтiс вöчасьны кöртысь да пуысь. Őнi пенсия вылын, но весь оз ов: вöчалö кöрзинаяс. Водзтi вöчавлiс дадьяс, пу зыръяс да мукöдтор. Менö бать дас арöс тыртöдз на велöдiс вöчасьны пуысь. Школаын вöлiны труд урокъяс. Велöдiс В.И.Тарабукин, кодi вöлi зэв киподтуя мортöн. Школаын велöдчигöн унатор нин сяммим вöчны. Менö весиг мöдöдлiсны юркарö конкурс вылö. Велöдöм ёна лöсялiс. Кыпöдi керка. Пач тэчис Т.И.Туркина, а ставсö сэсся вöчи ачым, весиг мебель.

— Мый вылö видзинныд 58,8 сюрс шайтсö?

— Сьöм тырмис сöмын öти станок вылö. Мебель вöчалöм вылö видзи ассьым сьöм — 100 сюрс шайт. Ковмис босьтны и мукöд инструментъяс да оборудование. Кöсйи паськöдчыны, и медым вичмöдiсны сьöм, пыри республикаса программаö. 300 сюрс шайт грант вылö кöсйи ньöбны «Газель» автомашина да содтöд станок. Но сьöм эз вичмы. Лолöн эг усь, кута корсьны петан туйяс.

А.Э.Битнер вöчалö сiдзжö куричьяс, öдзöсъяс, öшинь рамаяс, улöсъяс, пызанъяс да с.в. Удж пыр эм. Корлöны йöз и гортаныс. Аскöдыс босьтлö станок. Эм «Жигули» автомашина.

Кулöмдiнын ёна стрöитчöны, дзоньталöны оланiнъяс. Алексей Эрихович дорö шыöдчысьыс уна. Быдöнлы мунö воча. Кöсйö босьтны аскодьыс жö киподтуя отсасьысьöс.

Николай ЛЮТОЕВ.

 

Вежон мойдын

Районысь ас вылö уджалысьяс опыт босьтöм могысь ветлöны суйöр сайö. Роберт Васильевич Третьяков да Сергей Андреевич Цгоев вöлiны Китайын. Елена Васильевна Широкова, Лидия Серафимовна Торлопова, Алексей Михайлович Сладкоштиев, Светлана Владимировна да Виктор Васильевич Белый гозъя ветлiсны Объединённöй Арабскöй Эмиратъясö. Ветлöмсö котыртiс Екатеринбургысь региональнöя сöвмöмлöн «Перспектива» фонд. Тöдмасисны, кыдзи государство отсалö сöвмöдны ичöт да шöр бизнес. Миян районсаысь кындзи вöлi нöшта 29 республикаысь да обласьтысь ас вылö 39 уджалысь. Ылi государствоын вöлiны вежон. Бöрйисны тайö государствосö сы вöсна, мый бöръя 40 воöн сiйö ёна сöвмис. Котыртчис 1971 вося декабр 2 лунö 6 эмиратысь. Сизимöдыс öтувтчис 1972 воын. Португалия ыджда. Медся ичöт Аджман эмират сöмын 250 квадратнöй километр. Государствоöн веськöдлö президент. Столицаыс Абу-Даби. Олысьыс 4,8 миллион морт. Вужвойтырыс мусульман-сунит. Сёрнитöны араб кывйöн. Сьöмыс дихрам. Служитöны армияын ас кöсйöм серти кыдзи зонъяс, сiдзи и нывъяс. Государство озыр нефтьöн, мыйысь воö уна сьöм. Сiйöс веськöдöны промышленносьт, видз-му овмöс сöвмöдöм, экономикалысь прöст зонаяс котыртöм вылö. Президент олö аскиа лунöн, воысь воö чинтö мусир вузалöм, а сöвмöдö туризм, ёнджык вузасьö, кыскö сьöм бокысь. Быдногыс отсалöны сöвмöдны ичöт да шöр бизнес. Ас вылö уджалысьяс ньöти оз вештыны вот.

— Арабскöй Эмиратъясö ветлöм сетiс ыджыд бур, — висьталiс С.В.Белый. — Вöлi семинар, «гöгрöс пызан». Висьталiсны, кутшöм отсöг вичмöдö, вöчö кокньöдъяс государство ас вылö уджалысьяслы. Сэтчöс ас вылö уджалысьяс юксисны опытöн, вочавидзисны миян юалöмъяс вылö. Вöлiны экскурсияяс.

— Мый чуймöдiс медся ёна?

— Сiйö, мый ас вылö уджалысьяс оз вештыны некутшöм вот. Олöмыс сэнi вывтi бур. Некытысь он аддзы важ стрöйба. Уличаяс сöстöмöсь, лöньöсь, йöз вежавидзысьöсь. Вежон чöжöн эг аддзылöй код юра йöзöс. Зэв донтöм таксиöн ветлöм. Сёян-юан, тöвар вылö донъяс миян кодьöсь. Медся ичöт пенсияыс, вуджöдны кö миян сьöм вылö, 60 сюрс шайт. Жаль, мый татшöм бур олöмыс миян Россияын дыр на оз ло.

— Государствоыс ёна тöждысьö йöз вöсна, — шуис Е.В.Широкова. — Кöсйö, медым олысьяс вöлiны бура велöдчöм йöзöн. Садъясын куим арöса челядьöс велöдöны нин, восссьöны мирса тшупöда велöданiнъяс, наукалöн шöринъяс. Том гозъялы öтлаасигöн дон босьттöг сетöны олан керка да 70 сюрс шайт. Видзöны йöзлысь дзоньвидзалун, лавкаясын курыдторйöн оз вузасьны. Позьö юны сiйöс сöмын ресторанын да отельын. Лавкаясын абу öчередь, ньöбасьысьясöс оз венны, лёк тöвар да сёян-юан оз вузавны. Йöз оз гусясьны. Гусяласны кö, то керыштöны кисö. Вöчны кö кывкöртöд, то меным зэв завидь.

Николай ЛЮТОЕВ.

Комментарии:

Комментарии запрещены.

Свежий выпуск: за 7 ноября