Дасьтöны ас вылö уджалысьясöс

Кулöмдiнса культура керкаын пызанъяс вылын вöлiны быдсямапöлöс вöчöмторъяс: кыöм кöлуй, мичмöдöм вундасян пöвъяс, дöра вылын серпасъяс, бисерöн мичмöдöм шылльö-мылльö, а джоджын — лабич-улöс. Челядь вöчöмторъяснысö вöзйисны ньöбны кывбуръясöн-сьыланкывъясöн. Куш киöн некод эз мун.

Велöдчысьяс тадзи петкöдчисны «Том предприниматель» конкурсын. Кольöм воын асшöр уджöн найö вермылiсны весиг республикалöн тшупöдын. Вермöмлöн подулын — быдлунъя удж. Кольöм воын челядь творчестволöн керка паськыда тöдмöдiс челядьöс предпринимательлöн уджöн, велöдiс лöсьöдны бизнес-планъяс. Вöчасисны сюмöдысь, пуысь да мукöдторйысь во гöгöр чöж. Петкöдчисны конкурсъясын, выставкаясын, гажъяс дырйи вузасисны. Тавося апрельын чукöртчылiгöн том предпринимательяс öтувтчисны котыръясö. Сэки жö найöс велöдiсны сёрнитны ньöбасьысьяскöд, вöзйыны вöчöмтор. Быдöн дорйис ассьыс бизнес-план.

— «Том предприниматель» конкурсö пырöдчöмöн, тi петкöдлiнныд киподтуй да сям. Быдманныд, водзö велöдчанныд да, гашкö, кодкö тiян пиысь и лоас предпринимательöн. Кутам виччысьны асланым райо- нö, — шуис районын сьöм управлениеöн веськöдлысь Елена Алексеевна Стяжкина.

— Морт шуда сэк, кор вöчö радейтана удж. Тi вöчасянныд став сьöлöмсянь. Гашкö, та серти тi бöръянныд аслыныд специальносьт. Сöвмöй водзö. Ме вöзъя челядьöс доръян лунö асланыд вöчöмторъясöн петкöдчыны ярмарка вылын, — корис районса администрацияöн веськöдлысьöс вежысь Наталья Анатольевна Левченко.

Кулöмдiнысь А.Н.Поповлöн велöдчысьяс вöчöмаöсь лабичьяс, пуклöсъяс, снимокъяслы рамаяс. Ньöбисны ставсö. Козин вылö сувениръяс зэв бура артмöмаöсь челядьлöн, кодъясöс велöдöны Озъягысь Е.Л.Сурнина, Кулöмдiнысь О.М. Игнатова да М.Х.Пулатова, Мысысь А.Е.Портнягина, Кебанъёльысь В.В.Астафьева, Паспомысь Н.С.Кипрушева, Кужйысь Е.А.Юшкова, Зимстанысь П.Н.Ишенин.

— Зэв бур, мый школаын велöдчигöн на миянöс велöдöны унаторйö. Тайö ковмас водзö вылö. Котырнымлöн нимыс «Мастер». И велöдö, и отсалö, и туйдö Павел Николаевич Ишенин. Пуысь вöчасям и урокъяс, и кружок вылын. Ме кöсъя лоны предпринимательöн, та вöсна и велöдча вöчасьны, — висьталiс Зимстанса школаын велöдчысь Степан Жикин.

— Ме веськöдла «Кодзувкотъяс» котырöн. Зэв нимкодь, мый ньöбасьысьяс миянöс окшöны, аттьöалöны, юасьöны, кыдзи да мыйысь вöчасим. Кутам и водзö петкöдчыны татшöм конкурсъясын, — радпырысь висьталiс медся ичöт арлыда вермысь котырöн веськöдлысь, Паспомса школаысь нёльöд класса велöдчысь Вадим Лодыгин.

— Зэв бур, мый школасянь дасьтöны ас вылö уджалысьясöс. Вöчалöмаöсь зэв коланаторъяс, сюся вöзйöны найöс да вузасьöны. Татшöм челядьысь петасны бур предпринимательяс, — тöдчöдiс Кулöмдiнса предприниматель Татьяна Андрияновна Рассыхаева.