Октябр 25-öд лунö Сыктывкарын вöчисны «Папа-квест» республикаса конкурслы кыв-кöртöд. Сiйöс сиисны батьяслöн лунлы, кодöс пасйöны октябрлöн бöръя вöскресенньöö. Петкöдчисны республика пасьтаысь 13 бать. Миян районысь ветлiс Сергей Александрович Батманов. Медводдза юкöнын колiс вöчны быдпöлöс корöмъяс наука да технология кузя. Ордйысисны программированиеын, авто да авиамоделированиеын, велосипед чукöртöмын да туй вылын асьтö видзны кужöмын. Мöд юкöныс мунiс «Скала» спорткомплексын. Танi батьяслы ковмис петкöдлыны ассьыныс ёнлун, винёвлун. Кöть и миян Сергей эз ло вермысьöн, сылы ордйысьöмыс ёна воис сьöлöм вылас, унатор босьтiс аслыс. Вермысьясöс да став петкöдчысьясöс чолöмалiс Коми республикаса удж, уджöн могмöдан да социальнöя дорйöм кузя министр Илья Васильевич Семяшкин.
Сергей Александрович ветлiс тайö ордйысьöм вылö Анна Фёдоровна гöтырыскöд да челядьыскöд. Юлиялы кöкъямыс арöс, Семёнлы нёль. Унаöн нин, кöнкö, аддзылiсны батя-нылаöс гажъяс вылын, кор найö öтув сьылöны. Сергей дзолядырсянь пыр сьылiс, петкöдчис конкурсъясын. Сьывны радейтöм вуджöма нылыслы, да во кык сайын нывсö нуöдiсны сьылöм велöдысь М.В.Попова дорö. Анна Фёдоровна пасйис, мый «Папа-квест» конкурс медся нин воис сьöлöм вылас челядьныслы. Коляс дыр казьтыланаöн.
— Ми верöскöд öтлаын 10 во. Сергей зэв шань, радейтö челядьнымöс, найö пыр бергалöны сы дорын. Вермас мыйкö дасьтыны сёйны, и челядь пыр орччöнöсь. Быд гаж кежлö, шуам Выль во, чужан лун, ми дасьтысям ставöн öтув, — висьталiс Анна.
Татьяна Напалкова,
Галина Клюжева.
Снимок интернетысь.