Талун Лебежнöйын

[ A+ ] /[ A- ]


*Лебежнöй пуксьöма Эжва ю бокö кыр йылö. Сiйö пырö «Парч» овмöдчöмин улö.
*Сиктын 52 овмöс, 140 олысь. Налöн лыдыс вочасöн чинö.
*Йöз уджалöны садйын, «Нем» лавкаын, Парчын, öткымынъяс ветлöны Жешартса фанера вöчан заводö.
*Уджтöмалö 31 морт. Найö кутчысьöны ас овмöс кутöм, вотчöм да чери кыйöм отсöгöн.
*Садйö ветлö куим кага. Сэнi уджалöны воспитатель Любовь Григорьевна Булышева, сылы отсасьысь Евдокия Петровна Булышева, пусьысь Екатерина Васильевна Булышева да пач ломтысь Тамара Александровна Булышева.
*Школа абу. 12 челядь ветлöны велöдчыны Немдiнса шöр школаö, найöс сэтчö новлöдлöны автобусöн.
*Сиктын 36 пенсионер, на лыдысь уджвывса вит ветеран. Медся олöма, 1932-öд воын чужлöм, Георгий Николаевич Булышевлы да Роза Дмитриевна Булышевалы отсасьöны пенсия фонд пыр медасьöм йöз.
*Иван Никифорович Булышев вöлiс Чернобыльын, Вячеслав Кимович Булышев — Афганистанын.
*Афиноген Ефремович Булышев кутö крестьянин овмöс, видзö вит мöскöс да тшöгöдöм вылö нёль öшкöс.
*Сиктын воысь воö чинö скöт видзöм. Талун ставыс артавсьö куим мöс, сизим öш, öти ялавич да кроликъяс. Медся ыджыд овмöс кутö Нина Альфатовна Булышева, кодлöн кык мöс да кык öш. Пуктысьны видз-му тырмымöн. Муяс вöдитöны мотоблокъясöн.
*Эмöсь киподтуя йöз. Григорий Егорович Булышев мичаа гижсьö, вöчалö куранъяс, тусь вотан комбайнъяс, дадьяс, сяммö тшöтш сваритчыны. Бура сваритчö и Александр Петрович Кузнецов. Мария Егоровна Гарбузова целлофан пакетъясысь кыö мичаа серлöдлöм джодждöраяс.
*Сикт оз ёна быдмы да паськав, стрöитчöны омöля. Бöръя воясын выль керкаяс кыпöдiсны Александр Петрович Кузнецов да Михаил Васильевич Куратов.
*Векжö йöзлысь олöм бурмöдöм могысь мыйкö да вöчöны. Регыд на югзьöдiсны кык сикт костысь 800 метр кузя улича, кытчö сувтöдiсны сюръяяс, öшöдiсны 29 лампа.
*Бöръя вит воöн чужис кöкъямыс кага. Тайö жö кадöн таво ворсiсны медводдза кöлысь. Босьтны кö кольöм вося лыдпасъяс, чужис куим кага, кулiс нёль морт.
*Лебежнöйын уна челядя кык семья: Василий Иванович да Майя Александровна Булышевъяслöн нёльöнöсь, Наталья Николаевна Булышевалöн — куимöнöсь.
*Эм фельдшерско-акушерскöй пункт, кодöн веськöдлö Станислав Евгеньевич Попов. Сiйö жö могмöдö парчсаясöс. Аптека абу, бурдöдчанторъяс босьтöны юрсиктысь.
*Сиктын öти лавка — «Нем» котырлöн, кодöн веськöдлö Николай Юрьевич Игнатов. Вузöсын сёян-юан да мукöд посни коланторъяс.
*Лебежнöйса олысьяслы газет-журналъяс Парчса почталöн юкöнысь ваялö сэтчöс олысь Елена Витальевна Попова да разöдö-пукталö кывтыдын да катыдын лöсьöдöм кудъясö.
*Сиктын квайт ас овмöс кутысьлöн эм трактор. Найö ас сиктсаяслы отсалöны ытшкыны, вайны пес, куйöд да горт овмöсъяслы мукöд колантор.
*Уджалö «Мегафон» операторлöн сотöвöй йитöд. Эм и интернет.
*Туйяс могмöдö «Темпдорстрой» котыр.
*Йöзöс юрсиктö да Сыктывкарö лун кост мысьт вежласьöмöн новлöдлö асшöр уджалысь Н.Е.Иванова.
*Лебежнöйсаяс кызвыныс кутчысьöны важся коми йöзлöн оласногö: ёна вотчöны, вöралöны, кыйöны чери. Вöр-вакöд ичöтсяньыс топыд йитöдаöсь Иван Дмитриевич да Вячеслав Кимович Булышевъяс, кодъяс вексö вöралiсны да кыйисны чери, а сiдзжö Николай Самсонович Напалков, кодi пыр жö ю вылын, и кыйдöстöг некор оз волы гортас.
*Сиктсаяслöн тöдчана майшöг, мый абу удж. Буретш та вöсна том йöз школа бöрын мунöны велöдчыны водзö и бöрсö оз бергöдчыны ас сиктас. Клуб абу, некöнi коллявны прöст кад.
*Но векжö йöз оз майшасьны, олöны асланыс тöждъясöн да могъясöн, нимкодясьöны сиктöс кытшалысь мойдын кодь мича вöр-ваöн, торйöн нин Эжва дорса кыр йывсянь тыдалысь Лебяжье тыöн, кытчö тшöкыда пуксьывлöны юсьяс.
Галина НЕСТЕРОВА.

Комментарии:

Добавить комментарий

Свежий выпуск: 28 марта

Осторожно — мошенники!