Январ 28 лунö районса администрацияын вöлi туйяс вылын видзчысьтöм лоöмторъястöг ветлöм вöсна кывкутысь комиссиялöн чукöртчылöм.
Вöлiны районса юралысь Д.А.Шатохин, туй агентствоöн веськöдлысьöс вежысь В.А.Пронин, райадминистрацияöн веськöдлысьöс вежысь И.В.Попов, ГИБДД-лöн районса юкöнысь начальниклысь могъяс олöмö пöртысь В.А.Игнатов, велöдан управлениеса начальник О.А.Холопов, асшöр уджалысь И.В.Ракин, овмöдчöминъясса юралысьяс, мукöд кывкутысь йöз. Ёсь сёрни мунiс тöвся туйяс лёка дöзьöритöм йылысь. Та вöсна кывкутысь «Коми дорожная компания» котырöс петкöдлысь В.П.Кочнев ыстысис, мый налöн этша техника (уджалö нёль грейдерысь кыкыс), а районын колö весавны матö 400 километр. Республикаса туй агентствоöн веськöдлысьöс вежысь В.А.Пронин öлöдiс, мый компаниялöн мытшöдъясыс мед эз инмыны йöзлы, да сетiс районса став туйяс весалöм вылö вежон.