Войтырöс доръян удж

[ A+ ] /[ A- ]

 

Октябрь 4-öд лунö Россияса войтырöс доръян да виччысьтöмторйысь видзан службаясын уджалысьяс пасйöны ассьыныс профессиональнöй лун. Таво тырö 81 во гражданскöй оборона чужöмсянь. 5-öд во нин тайö уджсö нуöдö тшöтш и республикаса биысь видзчысян служба да войтырöс доръян веськöдланiн. Талун ми неуна висьталыштам, мыйсянь чужис Комиын гражданскöй оборона.

Комиын ГО-лöн сöвмöмыс заводитчис 1940-öд воясö. Дас во мысти коттыртöма местнöй противовоздушнöй обороналöн медицинскöй служба. А сэсся Коми АССР-са Министръяслöн Совет лэдзис шуöм, код серти Сыктывкар, Ухта да Печора кар исполкомъяс бердын лöсьöдiсны местнöй противовоздушнöй оборона.

1962 воын вöлi урчитöма Коми АССР-са гражданскöй обороналöн штабыс, котыртöма йöзöс доръян комиссия. Штабöн веськöдлысьнас индiсны Никита Макарович Умрихинöс. Сэкся кадö республикаса веськöдлысьяс пуктiсны ыджыд пай йöзöс велöдöмö, нуöдiсны уна сикас учениеяс, йöзöдiсны небöгъяс, методическöй пособиеяс, инструкцияяс да памяткаяс. Кар-районъясын заводитiсны котыртавны ГО штабъяс, а на бердын — велöдчан курсъяс.

Недыр кад мысти республикаса штаб нимтiсны Комитет ГОЧС-öн, а карса штабъяс лоины администрацияс бердын Управлениеясöн. Öнi войтырöс доръян да виччысьтöмторйысь видзан уджыс вичмö тшöтш и республикаса биысь видзчысян служба да войтырöс доръян управлениелы.

Управление бердын эм велöдчан шöрин. Сэнi босьтöны содтöд тöдöмлун йöзöс дорйöм да виччысьтöм лоöмторъяс кузя велöдан программаяс серти сикт-посёлокса администрацияын да предприятие-организацияясын уджалысьяс. Йöзöс да вöр-ва дорйöм могысь 2010 восянь управлениын уджалö аварийно-спасательнöй химическöй юкöн. Сыктывкар бердын воссис ртуть лампа да мукöд омöль сорас бырöдан цех. Эжва районын вöлi восьтöма сiдз шусяна убежище. Нöшта на сэтчö лöсьöдöма и гражданскöй обороналысь музей, кодi воссис колян во октябрь 5-öд лунö. Комиын татшöмыс дзик öти. Öнi музейлöн джаджъясысь позьö аддзыны 100 сайö экспонат да архивнöй документ. На пöвстын дозиметрическöй да медицинскöй, йитöд кутысь да юöртан приборъяс, архивнöй документъяс, значокъяс, фотояс да уна мукöдтор, мый висьталö республикаын йöзöс доръян история йылысь. Медся важ экспонатыс – 1957 вося дозиметр ДП-1-А. Сы отсöгöн öнöдз на позьö мерайтны радиациялысь ыдждасö. А медваж документыс пасйöма 1941-öд воöн. Тайö и мукöд интереснöй документыс ваöдöма музейлöн стендъяс вылын.
Биысь видзчысян служба да войтырöс доръян республикаса веськöдланiн

Комментарии:

Добавить комментарий

Свежий выпуск: 22 февраля

https://www.gosuslugi.ru/help/faq/mobile_election/2100910

Осторожно — мошенники!