Февраль 11-13 лунъясö Кулöмдiнса шöр школаын мунiс «2014 вося велöдысь» конкурс. Районса школаясысь петкöдчис 11 велöдысь Том специалистъяс да да дыр уджалысьяс вермасисны торйöн. Найö сетiсны урок, висьталiсны асланыс удж да олöм йылысь, кыдзи содтöны сям, петкöдчöны школаса да сиктса олöмын, коллялöны прöст кад. Быдöн ставсö вöчис бура, но том велöдысьяс пöвстысь медся сяммысьöн жюри шуис Кулöмдiнса шöр школаысь история, обществознание да право велöдысь Елена Юрьевна Власюкöс. Зэв кыпыд лола да водзмöстчысь морт. Олö да уджалö, кыдзи ачыс шуö, олöмысь кольччытöг, уджö выльторъяс пыртöмöн, велöдчысьяслы сетö бур тöдöмлунъяс. Найö быд во петкöдчöны олимпиадаясын. Таво район тшупöдын «югнитлiсны» сизимöн, куимыс петiсны респулика тшупöдö. Ёртасьö спорткöд, ышöдö и уджъёртъяссö.
Мöдöн да коймöдöн лоисны Керчомъяысь Алексей Сергеевич Паньков да Кулöмдiнысь Анна Александровна Потоцкая.
Уна во велöдысьяс пöвстысь медводдзаöн лоис Дереваннöйса школаысь роч кыв да литература велöдысь Елена Борисовна Малева. Челядькöд 19 во. Найö петкöдчöны олимпиадаясын, конкурсъясын да шедöдöны вермöмъяс, гожöмнас пелькöдöны да мичмöдöны школа йöр да посёлокса уличаяс. Мöдöн да коймöдöн лоисны Кулöмдiнысь Ольга Васильевна Ямщикова да Кебанъёльысь школаысь Наталья Сергеевна Шубёнкина.
Районса юралысь Д.А.Шатохин чолöмалiс вермысьясöс да вичмöдiс дипломъяс, мукöдъяслы сетiс аттьöалан гижöдъяс. Видзöдысьяс медвылö донъялiсны, кыдзи и жюри, Кулöмдiнса шöр школаысь Елена Юрьевна Власюкöс.
Галина НЕСТЕРОВА.
Авторлöн снимокъяс вылын: Е.Ю.Власюк; Е.Б.Малева.