«Туган» — Кулöмдiнса зон

[ A+ ] /[ A- ]

«Пожöма яг» турбазаын квайтöдысь мунiс том вöралысьяслöн «Туган» вермасьöм. Таво петкöдчис сизим зон: Дереваннöйысь Аркадий Бондоренко, Помöсдiнысь Дмитрий Филиппов, Керчомъяысь Антон Лодыгин, Кулöмдiнысь Илья Чаланов, Пожöгысь Владислав Курочкин да Вочысь Сергей Кочанов да Юрий Ширяев.
Вермасьöм водзын найöс вочаалiс районса юралысь Д.А.Шатохин да сиис бура петкöдчыны ордйысьöмын. Зонъяс петкöдлiсны вöралöмын да гажöдчöмын сямлун. Медводдза юкöн мунiс ывла вылын. Том вöралысьясöс виччысис сьöкыд кузь туй. Налы медводз колiс вöчны лямпа вылын мунöмöн кытш, лыйны пасö шыöн — «кыйны йöраöс», кыссьöмöн мунны пасъяс уськöдтöг «сук вöрöд», лыйны пасö черöн — «кыйны ошкöс», лыйлыны пасö кытшъяс — «кыйны кöчьясöс», лямпанысö дадь вылö пуктöмöн да аслыныс сöлöмöн мунны индöм туйöд — «ош нуöм вылö вöчны дадь», пилипызь тыра мешöк — «ош туша» ас выланыс босьтöмöн — вöчны кытш да бöр воöдчыны «гортаныс». Медводзын «туйö» петiс Кулöмдiнысь Илья Чаланов. Кокниа котöртiс лямпаöн кытш, öтчыд лыйöмöн черöн и шыöн веськалiс пасö. Ставсö вöчис кокнипырысь и стöча. Тöла поводдя вöсна сöмын эз веськав пасö кытшъясöн — «кöч эз шед». Жюрилöн донъялöм серти вöралöмын, спорт юкöнын сiйö лоис вермысьöн. Мöдöн лоис Помöсдiнысь Дмитрий Филиппов, коймöдöн — Дереваннöйысь Аркадий Бондаренко.
Творчество юкöнын зонъяс медводз висьтасисны ас йывсьыныс. Илья Чаланов ичöтсянь радейтö вöр-ва, кыйö чери, ёртасьö спорткöд. Дмитрий Филиппов чужис да быдмис Ижмаын, öнi олö да уджалö Помöсдiнын, сiдз жö радейтö спорт, сьылö да ворсö гитара вылын, мыйö велöдö талун и челядьöс творчество шöринын. Мукöдъяслы вöлi жö мыйöн юксьыны, быдöн аслыспöлöс йöз. Жюри медбурöн донъялiс Илья Чалановлысь висьтасьöм.
Медся кыпыда мунiс коми обрядъяс петкöдлöм. Илья Чаланов юксис нянь пöжалöмын гусяторъясöн, Владислав Курочкин висьталiс, кыдзи кужöмöн бöрйыны кыйсян пон, Аркадий Бондаренко аслас отсасьысьяскöд петкöдлiс, кыдзи коравны нылöс верöс сайö, Юрий Ширяев велöдiс пуктавны капканъяс. Быд петкöдлöм видзöдысьяслы восьтiс кутшöмкö да выльтор, кöть ставсö тайöс босьтöма пöль-пöчьяслöн олöмысь. Жюри медвылö донъялiс петкöдчöмсö бара жö Илья Чалановлысь. Öтувъя ордйысьöмын сiйö петiс вермысьöн да лоис «Туганöн». Мöдöн лоис Аркадий Бондаренко, коймöдöн — Дмитрий Филиппов.
«Коми войтыр» районса представительствоöн веськöдлысь Г.Е.Пашнина ордйысьöмын бура петкöдчöмысь зонъяслы вичмöдiс аттьöалан гижöдъяс да юмов козинъяс. Жюриöн веськöдлысь И.И.Ногиев «Туганлы», Илья Чалановлы, сетiс диплом да козин.
-Вермöмыс шедiс эз ёна кокниа, — висьталiс Илья Чаланов. — Торйöн сьöкыд вöлi спорт юкöнын: вöралысьлысь ордымсö лöсьöдöмаöсь кузьджыка, та вöсна вöлi сьöкыд артыштны вын. Вермöм вылö, дерт жö, тöдчис ичöтсянь спорткöд ёртасьöм.
-Вермасьöм мунiс кыпыда, тöдчö зонъяслöн бура дасьтысьöмыс. Водзö вылö колö, медым сюртчисны сикт-посёлокъясысь унджык том йöз, кодъясöс мед ышöдiсны овмöдчöминъясса юралысьяс да клубса уджалысьяс, — кывкöртiс Г.Е.Пашнина.
Галина НЕСТЕРОВА.
Авторлöн снимокъяс вылын: вермасьöмын пекöдчысьяс; «Туган» ним шедöдысь Илья Чаланов.DSC07275 DSC07235

Комментарии:

Добавить комментарий

Свежий выпуск: 18 апреля

Осторожно — мошенники!