Кольöм воын «Парма гор» пасйис тшупöда пас — газетлöн медводдза номер петöмсянь 85 во тырöм. Уна семьяын газет коставлытöг судзöдöны да лыддьöны некымын поколениеын нин. Ми, дерт, газет лэдзысьяс, кывлам лыддьысьысьяссянь и ошкан, и кулитан кывъяс. Ставсö босьтам матö сьöлöм бердö да зiлям уджавны нöшта на кывкутöмöнджык. «Парма гор», дерт, ёнджык лöсялö верстьöяслы. Но миянлы окота тöдны, кутшöмджыкöн аддзöны газетнымöс томъяс — аскиа лыддьысьысьяс. Такöд йитöдын ми корим районса гырысь класса велöдчысьясöс донъявны «Парма горнымöс». Ставыс воис Помöсдiнса, Скöрöдумса, Кулöмдiнса, Ручса, Керчомъяса, Ярашъюса да Шöръягса школаясысь 9-11 классъясын велöдчысьяслöн 14 удж.
Со мый артмис челдяьлöн гижöдъяс серти:
«Парма горлöн» нимыс мича, небыд, гора, кыпыд да юргана, дзик миян районса олысьяслы и лöсялана. Газетлöн быд номерын медводдза гижöдöн лоö «Кузь нэм да бур шуд!». Тадзи газет лöсьöдысьяс бур сьöлöмöн чолöмасьöны, сибöдчöны асланыс лыддьысьысьяс дiнö. Бара жö, быд номерын эм коми шусьöг. Шусьöг-кывйöз отсöгöн йöз важысянь велöдiсны мöвпавны, аслыспöлöса шуны, сэтчö пуктывлiсны джуджыд мывкыдлун.
Газетысь позьö тöдмавны районлысь олöм, удж, могъяс, тырмытöмторъяс, мый вöчсьö видз-му овмöсын, бурдöдан, велöдан, культура да мукöд юкöнын. Сiдзжö верман тöдмавны, мыйöн районлы позьö ошйысьны да тшапитчыны, а мыйкöд, мöдарö, колö тышкасьны да öтвылысь корсьны мытшöдысь петан туй. Газетлöн шöр мог — мöвпавны оз сöмын майшöдланторъяс йылысь, а зiльны петкöдлыны олöмысь аддзана, стöч серпасъяс да восьтны йöзлысь талунъя дойяссö.
Газет чужтö да сöвмöдö коми кыв да литература дорö муслун, ышöдö да кыскö гижан уджö томъясöс. Öд кутшöм гажа, кутшöм озыр, кутшöм уна рöма миян коми кывным!
Медся нин ёна шензьöдöны районса войтырлöн кывбуръяс, кутшöм мичаа артмöмаöсь строкаяс да ладмöмаöсь рифмаяс. Уна висьт да кывбур «Парма гор» газетысь ылöджык оз мунны, мöдлаын оз юргыны, ни оз печатайтны. Но найöс лыддям ми, районса прöстöй йöз, кылам налысь сьöлöмкылöмъяссö. И кöть, гашкö, унджык гижöдыс лыддьöм бöрын йöзлöн вунö, но гижысьлöн «кодзулыс» векжö дзирдыштлö öти здук кежлö. «Парма горö» гижöны верстьö и челядь, пöрысь и том. Но газетлöн аскиалуныс, дерт жö, том войтыркöд ёртасьöмын, найöс журналистика уджö ышöдöмын. Найöс кö он велöд — газет кусас. Газет лоö бур подулöн, сы помысь коми мортыс зумыда на сулалö му вылас да кутö лача, мый водзö вылö ставыс лоас бур.
Уна мича кывбура, мывкыд мöвпъяса, серамбана, сьöлöм вöрзьöдана висьтъяса — татшöм миян «Парма гор», Эжва йывлöн рöмпöштан. И водзö вылö эскам, мый газетын кутасны петны ловтö кыпöдан гижöдъяс. Газет велöдö овны сöстöма, зiля, бур мöвпъясöн, ютöг, радейтны вöр-ва, Коми мунымöс, коми кывнымöс».
Татшöмöн аддзисны «Парма горöс» Помöсдiнысь Анастасия Уляшёва, Наталья Королёва, Людмила Доценко, Ксения Уляшёва, София Игнатова, Скöрöдумысь Артём Пашнин, Марина Уляшёва, Люция Пашнина, Носимысь Наталья Зезегова, Керчомъяысь Михаил Дудников, Ярашъю-ысь Ирина Нехорошева, Елена Попова, Шöръягысь Марина Напалкова, Ручысь чужан му туялан кружокö ветлысьяс. Н.Зезегова «Парма горöс» донъялiс весиг кывбурöн.
Велöдчысьяслöн гижöдъяс збыль мöвпаланаöсь, тыдалö, мый найö сёрнитöны и мöвпалöны комиöн, абу на сетчöмаöсь рочланьыс. Таысь ыджыд аттьö коми кыв да литература велöдысьяслы — О.В.Шебыревалы, Т.В. Уляшёвалы, Д.А.Гребенюклы, Л.А.Кочановалы, И.А.Кузнецовалы, Г.Н.Напалковалы, А.И.Лажаневалы, М.А.Шебыревлы. Öд буретш налöн, коми кыв велöдысьяслöн зiльöмöн, позьö шуны, и кутчысьö на сöстöм коми кывйыс, найö оз сетны ляпкавны-кусны кывйыслы, а, сiдзкö, и коми вужйыслы.
Лидия ЛИПИНА,
газетса главнöй редактор.

ЭЖВА ЙЫВСА ГАЗЕТ ЙЫЛЫСЬ МÖВЪЯС
Öнiя олöмад колö унатор тöдны. Шуласны тай: кодлöн киын медуна юöр, сылöн киын — став мирыс. Юöръястö ми босьтам быдлаысь: телевизорысь, радиоысь, но медсясö — интернетысь. Но сувтöдам юалöм: а кытысь босьтны «медся свежöй» юöръяс ас районлöн олöм йылысь, орччöн олысь йöз йылысь? Дерт жö, районса газетысь, «Парма горысь». И таысь «районкалы» зэв ыджыд аттьö. Морт медводз кöсйö тöдны асгöгöрса олöмсö, татчöс тöжд-могъяссö. А сэсся нин — бокиса олöм, код йылысь тэ омöля тöдан. Районса газетлöн коланлуныс буретш таын. Уна вояс нин сiйö висьталö Эжва йывса войтырлы миян олöм-вылöм йылысь, ошкö бур йöзöс, эрдöдö кутшöмкö тырмытöмторъяс. Вежсьö олöм- ыс — вежсьö газет. Вежсьöны могъяс. Но «Парма гор» öнöдз кольö зэв тöдчанаöн да коланаöн. Зэв бур, мый «районка» оз нуöд сiдз шусяна «кольквиж прессалысь» туйвизьсö. Сiйö оз вöтлысь некодлы ковтöм шемöсö уськöданторъяс бöрся, оз пыр мортыслы «питшöгас» либö «кöлуй пиас», сiйö зiльö висьтавны збыльсö. И нöшта — висьтавны бурсö. Талун гырысь газет-журналъяс тшöкыда пöдтöны прöстöй мортлысь юрвежöрсö «няйт» да сьöкыд юöръясöн, и мортыслöн лолыс пыксьö, аскиа лунас эскöмыс вошö. А «Парма горлöн» пыр на тыдалö сiдз шусяна «позитив», буртор вылö мыджсьöм. Сiйöс лыддьöм бöрын ми гöгöрвоам, мый районным вочасöн сöвмö, мый кöнкö бурмöдöны туйяс, восьтöны выль школаяс да садъяс… Медшöрыс — эмöсь бурланьö вежсьöмъяс! И тайö мортсö водзö вылö ышöдö бур вылö мортыс кисö оз лэдз. Медводдза лист бокын пасйöма: «Парма гор» — Эжва йывса войтырлöн газет». Буретш тадзи и эм. «Районкалöн» зэв ыджыд тöдчанлун сыын, мый эз «рочмы», а öнöдз сёрнитö лыддьысьыськöд сöстöм коми кывйöн. Öнiя кадö тайöс сьöкыд вöчны, вылiсяньыс газет-журналъясöс ёнакодь топöдöны, «рочмöдöны». Уна «районка», кодi водзын петавлiс комиöн, воштiс нин ассьыс чужан кывсö, «саялiс» роч газетъяслöн вуджöрын. «Парма гор» эз сетчы. И таысь бара жö юркопыр газет лэдзысьяслы. Пыр на позьö лыддьыны сöстöм коми кыв вылын енбиа челядьлысь кывбуръяс, висьтъяс да мукöдтор. Сэтшöм жö сöстöм кывйöн гижöны и верстьöяс. Та вöсна окота шуны: эн рочмы, миян газет, эн сетчы сьöкыдлы, панлась да водзсась! Воштам кö чужан кывнымöс — вошам асьным кыдз асшöр йöз, кыдз войтыр. Сэки пöльяс да пöчьяс миянöс оз прöститны.
«Парма гор» нимыс газетлы лöсялö. Ми буретш пармаын олам, ог гöраясын либö жар пустыняын. Газет гöгöрвоö пармаса олысьяслысь ловшысö, гöгöрвоö, мый збыльысь майшöдлö районса олысьясöс. Сiдзкö, сылöн туйвизьыс — веськыд, колана нога. Сiдзкö, аскиа луныс эм на. Но унатор — лыддьысьысь сайын, миян сайын. Быдлунъя сьöкыдлунъяскöд колö вермасьны öтув. Медводз, колö судзöдны ассьыд районса газеттö… Газетыд — лыддьысьысьлы. Мöд ногыс некыдз. Кор пыдiсянь гöгöрвоам тайöс — ставлы лоас кокньыдджык. И мед миян некор эз вош ас газетлы эскöм. Мед «Парма гор» газет пыр вöлi прöстöй мортлы отсасьысьöн да ёртöн. Сэк ставыс лоас лючки-бур. Ме сьöлöмсянь эска, мый буретш тадз и лоас.
Анастасия УЛЯШЁВА.
Помöсдiн.