Кулöмдiнса шöр школаын гажаа мунiс «Ми öтлаын» конкурс, кодöс сиисны мамлöн лунлы.

Школалöн тайö гажыс — абу нин выльтор, кодöс, душ-мöд во коставлöм бöрын, шуисны ловзьöдны бöр. «Ми öтлаын» — сiдзкö, бать-мам, велöдысь да челядь — класса öтувъя семья. Татшöмъясыс и петкöдчисны конкурсын, 1-11 классъясысь кызь котыр. Быд класс-лы колiс пуктыны ним, вöччыны-пасьтасьны, висьтавны лов кыпöд, дасьтыны пас да ыдждöдлыны-нимöдны мам-öс — семья кутысьöс да челядь вöсна тöждысьысьöс. Петкöдчысьяс лолiсны пионеръясöн, морякъясöн, вöрса пемöсъясöн, öшкамöшкаöн, сьылiсны, висьталiсны кывбуръяс, пуктiсны ворсöмъяс. Донъялысьяслöн кывкöртöд серти медбура петкöдчисны медся ичöт классъяс. Медся уна, 67,3 балл, чукöртiс медводдза «в» класс — «Вöрса вокъяс», кодъяс пасьтасьлiсны вöрса олысьясö да петкöдчисны збыль артистъяс моз, зэв яра сяркöдiсны частушкаяс. Мöдöн лоисны мöдöд «в» классысь «Морякъяс», коймöдöн — нёльöд «д» классысь «Ыджыд семья» котыр. Петкöдчисны бура и мукöд классъяс, дзирдыштiсны аслыспöлöс мичлунöн. «Ми öтлаын» конкурслöн тайö гажыс вöлi медводдза юкöнöн, водзö мунас нöшта кык. Кывкöртöд вöчасны локтан вося майын, гажсö сиасны Победа лунлы.
Галина НЕСТЕРОВА.
Гижысьлöн снимокъяс вылын:  витöд «а» классысь «Пионеръяс» котыр;  медводдза «в» классысь «Вöрса вокъяс» котыр.