Россия пасьта быд во мунö «Ловъя классика» конкурс, тшöтш и миян районын. Воысь воö петкöдчöны унджыкöн. Воддза воын кö район тшупöдö кык школаысь петалiс квайт, кольöм воын куим школаысь öкмыс, то таво вит школаысь 11 ныв-зон. Ордйысисны март 11-öд лунö челядьлöн районса библиотекаын, лыддисны радейтана гижысьяслысь висьтъяс либö юкöнъяс. Быдöн пуктiс став сямсö, мед лыддянторйыс йиджис кывзысьяслы сьöлöманыс. Жюриöн веськöдлысь И.И.Ногиев пасйис, мый бöрйыны медбур лыддьысьысьöс вöлi сьöкыд. Медвылö донъялiсны Кебанъёльса школаысь Татьяна Чувьюроваöс, кодi зэв мичаа лыддис Лидия Чарскаялысь «Записки маленькой гимназистки» висьтысь юкöн. Мöдöн лоис Югыдъягысь Арина Попова, коймöдöн — Тимшерысь Ксения Сазанова. Найö апрель пансигöн петкöдчасны Сыктывкарын регионъяскостса татшöм жö конкурсын. Видзöдысьяс медбурöн лыддисны Кулöмдiнысь Илья Федюнёвöс Лев Толстойлöн «Анна Каренинаысь» геройöс петкöдлöмысь. Конкурсын вермысьяслы вичмисны дипломъяс, а петкöдчысьяслы Кулöмдiн йылысь книгаяс.
Галина НЕСТЕРОВА.
Авторлöн снимок вылын: Татьяна Чувьюрова.