Трелюйтчан трактор торъя установка отсöгöн 15 кымын минут йирис-кодйис кын му, вöчис 2,5 метра судта розь. Сэсся тросъяс отсöгöн кыпöдiс 11 метра кузьта сюръя да сувтöдiс коланаинö.

Электромонтёръяс бура тойлiсны-топöдiсны мусö сюръя гöгöр, мед сiйö сувтiс веськыда, и тулыснас, лым сылöм бöрын, эз жö легзьы. Та бöрын кайисны сюръя вылö йитлыны би провод. Мастер Олег Михайлович Дёминлöн веськöдлöм улын Кулöмдiн районса электрическöй сетьяслöн Помöсдiнса участокысь вит морта бригада, кöдзыд вылö видзöдтöг, вежлалiс Кекурын электролиниялысь сiсьмöм сюръяяс. Гожöмнас вужвыйöн вежисны электролиния Бадьёльйылын. О.М.Дёминлöн бригада лыддьыссьö Кулöмдiнса РЭС-ын медбурöн, гашкö, тшöтш и та вöсна тшöкыда ковмывлö ветлыны уджавны республикаса мукöд районъясö. Бригадаын зiльысьяс — кывкутысь, ассьыныс удж бура тöдысь, велöдчöм йöз, кодъяслöн киясын — Пожöг да Помöсдiн вожын куслытöм бияс.
Лидия ЛИПИНА.
Авторлöн снимок вылын: Помöсдiнса участокысь бригада вежлалö сюръяяс Кекурын (шуйгавывсянь: Алексей Николаевич Денисов, Иван Валерьевич Пашнин, Владимир Павлович Дёмин, Олег Михайлович Дёмин, Николай Иванович Пашнин, Иван Александрович Мингалёв (трактор кабинаын).