Талун ме тöдмöда тiянöс индöдъясöн, кодъясöс быть колö тöдны тöвся кадö ю либö шор вуджигöн.
Колö вöдитчыны йöзлы лöсьöдöм вуджанiнъясöн. Некор оз позь вуджны йи вывтi пемыд кадö, а сiдзжö зэригöн либö ёна лымъялiгöн.
Некор энö видлалöй йилысь ёнлунсö кокнаныд зымнитöмöн. Зорйöн либö лызь беддьöн вачкöй йиас. Тыдовтчас кö ва, сiдзкö йиыс вöсни:в вуджны сэтi оз позь. Лои кö тiянкöд татшöмтор, пыр жö бергöдчöй бöр асланыд кок туйöд чорыд веркöслань. Мунöй видзчысьöмöн: кокъяснытö пельпом пасьта сувтöдöмöн исковтöм воськовъясöн. Татшöм ногöн мунiгöн тiян сьöктаныд юксьö паськыджыка. Дзик жö тадзи колö вöчны, кыланныд кö йи потлаян шы либö аддзанныд потöминсö.
Быть кö колö тiянлы вуджны и йöзлы лöсьöдöм туй матын абу, лёк торйысь тiянöс вермас видзны, сюрас кö трöпа либö лыжйöн талялöм туй. Татшöм отсöгыс кö абу, вуджтöдзныд колö матыстчыны йи дорöдзыс, зэв сюся гöгöрбок видзöдлыны да бöрйыны вуджан туй аслыныд. Оз позь мунны сэтi , кöнi йи вылас эм лым тола. Лым улас йиыс вöсниджык мукöдлаын серти. Овлö, восьса местаясын йиыслöн кызтаыс дас см, а лым улас куим. Медся ёна колö виччысьны местаясöн лоöны юö ва киссянiнъяс, лым ва визувтанiнъяс. Татшöм местаясас юыс вермас тöвбыд не кымыны либö вермас сöмын саявны вöсни йиöн да лымйöн. Повтöг вуджны позьö сэки, кор йиыслöн кызтаыслы колö лоны дас см не этшаджык. Котырöн вуджысьяслы колö мунны öта-мöдсяньыс вит-квайт метраа костöн.
Бать-мам, тiян дорö эм ыджыд корöм: энö лэдзöй верстьö йöзтöг челядьöс йи вылö: чери кыйны либö исласьны лызьöн, даддьöн да конькиöн.
Виччысьтöг кö веськаланныд йиа ваö, энö шöйöвошöй. Тiян эм дас вит – кызь минут, медым дорйыны асьнытö. Та бöрын морт вермö кувмöныс кынмавны. Энö воштöй дона кадсö. Оз позь швачöдны кияснад ваö, став тушанад öшöдчыны вöсни йи дорышö, сы вöсна мый тушалöн сьöкта улын сiйö кутас чирйысьны.
Паськыда шевкнитöй кияснытö, медым юрныд вöлi пыр ва веркöсас. Гырддзяяснаныд мыджсьöй йи дорышас да öти кокнытö йöткыштöй йи вылас кыдз верманныд ылöджык юкмöссяньыс. Бергöдчигмоз перйöй мöд кокнытö да öдйö тупыльтчöй став тушананыд йи вылас. Верманныд кö вöчны, ньöжйöник кыссьöй юкмöсьсянь кыдз позьö ылöджык. Корöй йöзöс отсöг вылö.
Тiян син водзын кö кодкö веськалiс йи улö, босьтöй кианыд бедь, зор, пöв, мый сюрö ки уланыд. Вдзчысьöмöн кыссьöй вöйысь дорö. Матыстчыны позьö сэтшöм местаöдз, кысянь верманныд шыбитны сылы тасма, кöвъя сумка либö нюжöдны лызь бедь. Кор ваö веськалöм морт кватитас нюжöдöмторсö, видзчысьöмöн кыскöй сiйöс ий улысь. Юкмöсысь перйöм мортыскöд видзчысьöмöн кыссьöй ылöджык.
Мортöс вöйöмысь дорйöм бöрын колö сiйöс шонтыны. Абу кö матын шоныдiн, колö аслыныд сетны медводдза отсöг: медводз пöрччöдны да пыдзравны кöлуйсö. Пестыны бипур да шонтысьны-косьтысьны либö вöрöдны ки-коксö. Зыралöй кынмысьöс кинаныд, кос небыд дöраöн, но оз позь лымйöн.
Видзöй асьтö да матыссаяснытö! Неминуча суигöн звöнитöй гортса телефон пыр 01 (ноль öти), сотовöй телефонсянь: 112 (сё дас кык) номеръяс вылö.
Отдел подготовки и информирования населения
по вопросам гражданской защиты
ГКУ РК «Управление противопожарной службы и гражданской защиты».