Июнь 2 лунö районса культура керкаын вöлi школаöдз арлыда челядьлöн «Чуймöдана мойд» петкöдчöм. Вöлiны Кулöмдiнса, Кебанъёльса, Югыдъягса да Помöсдiнса ичöтъяс, ставыс кöкъямыс садйысь. Енби петкöдлiсны эз сöмын найö, но и туйдысь-видзысьясныс да мамъясныс. Ворсöмъяс да петкöдчöмъяс вöлiны коми кыв вылын. Кулöмдiнса öтиöд номера сад петкöдлiс «Сера курöг», коймöд номера сад — «Дзизгысь-дзазгысь гут» мойд, «Шондi» сад — «Пывсян», Югыдъягса «Мойд» сад — «Нерсьысь баля» теш да с.в. Ичöтъяс бур артистъяс моз лöсьыда кутчысисны сцена вылын, мичаа сёрнитiсны да сьылiсны. Бура ворсiсны и мамъяс. Мойдлöн геройяслы мича паськöм вöчöмаöсь ас киясöн. Верстьö и челядь видзöдiсны да кыв-зiсны петкöдчöмъяссö ловшытöг. Жюри быдöнöс донъялiс вылö: Кулöмдiнса «Нюм» садйöс джуджыд сюрöса мойд петкöдлöмысь, öтиöд номера садйöс — мича шыладысь да паськöмысь, коймöд номера садйöс — ёртасьöмöн ворсöмысь, Югыдъягса садйöс — важ коми оласногö кутчысьöмысь да с.в. Бур сiйö, мый челядь сёрнитiсны сöстöм коми кывйöн. Кулöмдiнса «Гулюпи» садйын найöс велöдöны коми программа серти да гöгöрвоана, но öд Югыдъягса да Кебанъёльса зонпосни, дерт жö, унджыкыс рочöсь. Сiдзкö, ёна уджалiсны та вылын.

— Кулöмдiн районсаяс бара на шензьöдiсны ме-нö, — висьталiс республикаысь школаöдзса велöдöмлöн лабораторияöн веськöдлысь Зоя Васильевна Остапова. — Челядьлысь татшöм ыджыд гажсö нуöдiсны республикаын медводз. Детсадсалöн ворсöмъясын петкöд-чöм — зэв ыджыд вермöм.
Верстьöлы и ичöтлы сiйö сетiс дипломъяс да козинъяс, тшöтш и Югыдъягса öтиöд номера садлы ас вöчöм чачаясöн выставка вылын петкöдчöмысь. Пöся аттьöалiс велöдан управлениеса методист Наталья Николаевна Нестероваöс, кодi котыртiс тайö гажсö, да сетiс сылы аттьöалана гижöд. Пасйис, мый ыджыд гаж сыкöд видзöдiсны и Сыктыв, Сыктывдiн да Кöрткерöс районъясса садъясысь воспитательяс, кодъяс челядьлысь петкöдчöмсö донъялiсны зэв бура.
— Челядьлöн сцена вылö петöм — ыджыд кыпыдтор, — ошкис республикаысь шылада-драма театрса артистка Елена Чувьюрова. — Аттьö верстьöлы, мый уджалiсны ыджыд кывкутöмöн. Чайта, челядь пиысь кодкö да коркö лоас артистöн.
Гаж помын З.В.Остапова, садса уджалысьяс дорö шыöдчöмöн, содтiс:
— Радейтöй чужан кыв. Кутам ёртасьны тiянкöд, мед дасьтыны «Чолöм, дзолюк!» телепередачаяс.  Öнiя петкöдчöмысь лöсьöдам видеоролик да козьналам став петкöдчысьлы.
Галина НЕСТЕРОВА.
Авторлöн снимокъяс вылын: Кулöмдiнса  «Гулюпи» садса челяд; «Нюм» садсаяс.