Гым да чардби

Гожöмыд оз овлы гым-чардтöг. Найö öтвылысь вермöны вайны ыджыд ускöттьö. Татшöм тöвнырыд оз сöмын кок йывсьыс уськöд, но и жуглö да пöрöдö вужнас пуяс, нетшкö керка вевтъяс, орйöдлö би сутуга. Татшöм поводдя дырйиыс, весиг, шöйöвошан. Талун ми сернитам, кыдзи кутны асьтö, медым не сюрны татшöм неминучаас.

Гым шы кылö кö ылынкодь на, колö тэрыба мунны гортлань. Котöртны оз ков, чардбиыс вермас лыйны мортö. Гортö воöм бöрын кусöдöй став электроприборсö. Чардалiгöн энö матыстчöй öшиньлань да шонтан батарея дорö. Оз позь ломтыны пач: чардбиыд радейтö шоныд ин да öдйö вермас лыйыштны.

Гымыс кö суис ывлаын, корсьöй саймовтчанiн. Но энö бöрйöй öткöн сулалысь пуяс. Наö тшöкыдджыка и лыйö гымыс. Энö ветлöй би сутуга увтi да пöвйысь кыпöдöм стрöйбаяс дортi. Зэпсьыд перйöй кöртторъяс, зонттö пуктöй муас, медым киыд вöлi куш. Тöдöй, гымалiгöн оз позь сёрнитны телепон пыр.

Гымыс кö суис машинаöн мунiгöн, бурджык лоö сувтны. Топыда пöдлалöй öшинь да öдзöс, кусöдöй машина. А кутiс кö ёна чардавны велосипед, мотоцикл либö тракторöн мунiгöн, быть ковмас сувтны да корсьны дзебсянiн.

Гымыс кö суис ю дорын купайтчигöн либö чери кыйигöн, быть колö эновтчыны тайö уджысь. Чардби тшöкыда лыйö берегö, а ваыд кыскö ас дорас гым ньöвтö, вермас и мортöс дойдавны. Мунöй ю дорысь ылöджык.

Чард кындзи овлö и сiдз шусяна шаровöй молния, кодi вермас пырны форточкатi, розеткатi да весиг пач трубатi. Казялан кö керка жырйын öзйысь шар, дугды вöрны, киястö нюжöд водзланьыд. Оз ков бергöдчыны сылань мышкöн. Мукöд босьтöны кианыс кутшöмкö кöрттор либö гöлик да заводитöны вöтлыны кортöм биа гöсьтьöс. Тадзи вöчны оз ков! Видлöй надзöникöн восьтыны öшинь, сылань шарыд и веськöдчас. Суис кö неминуча, и морт доймис чардысь, пыр жö корöй öдйö сетан отсöг. Водтöдöй мыш вылас дв вöчöй искуственнöй дыхание. Кöтöдыштöй юрсö кöдзыд ваöн, вевттьöй эшкынöн.

Биысь видзчысян служба да войтырöс доръян республикаса управлениеысь

шöр специалист Инесса Трусагина