Республикаын паськыда нималана гижысь В.Е.Напалков аслас гöтырыскöд, Наталья Васильевнакöд, олö юркарын. Но пыр кыскис чужан Джеджим грездас. Ньöбис сэтысь керка, дзоньталiс да 17-öд во нин гожйöны сэнi гöтырыскöд. Виктор Егорович да Наталья Васильевна зiльöны быдногыс отсавны Джеджимса олысьяслы. Аслас керкаын восьтiсны музей да библиотека, быд волiгöн вайöны челядьлы гöснеч.
— Миян вöлi мöвп — кыпöдны библиотека да музей улö торъя керка, — висьталiс Н.В.Напалкова. — И ыджыд кöсйöмным районса юралысь Д.А.Шатохин отсöгöн збыльмас. Стрöйба улö вичмöдiсны му, «Монди СЛПК» да районса администрация сетiсны сьöм, чуктöдiм и ассьыным чöжöм. Подулыс дась нин, калибруйтöм керъясысь керка кыпöдасны ноябрын.
Октябр 15 лунö Кулöмдiнса вичкоысь вежа ай Александр вежöдiс стрöйбалысь подувсö. Та дырйи вöлiны районса юралысь Д.А.Шатохин, Н.В.Напалкова да Джеджимса олысьяс.