Матыстчö тувсовъя медводдза гаж – аньяслöн лун. Окота пасйыштны найöс, кодъяс уджалöны, водзмöстчöны, нимöдöны ас сиктнымöс, мед танi олöм эз кус, а сöвмис водзö.
Диана Алексеевна Гребенюкöс тöдöны оз сöмын Ручын да районын, весиг республикаын да Россияын. Нимöдiс мича коми кывнымöс. Чужтö мам кыв дiнö муслун, велöдö челядьöс, кодъяс тöдöмлунöн горалöны и республикаын. Тайö аньыслöн нимыс юркарын почёт пöв вылын.
Вежавидзысь, век нюммунöма, кужö ышöдны, котыртны ас гöгöрыс библиотекаса уджалысь Екатерина Михайловна Адамова. Век мыйкö мöвпыштö, выльторъясöн чуймöдö, велöдö челядьöс. Со нывка да зонкаяскöд мунöны олöма йöз дорö, то сöстöммöдöны казьтылан пас дор. Удитö сиктсаяскöд петкöдчыны и культура керкаын. Сылы эскöны сиктса йöз, со и бöрйисны депутатöн.
Миян выль сиктса юралысь Екатерина Николаевна Попова: том, кыпыд, кужö сёрнитны йöзкöд. Ышöдiс сиктсаясöс да ачыс миянкöд ветлiс «Пожöма яг» турбазаö ордйысьöмъяс вылö. Тшöкыда кежавлö культура керкаö, тöдмалö тöжд-могъяс, ачыс петкöдчö ворсöмъясын, КВН-ын. Тöдчö, мый став сьöлöмнас сикт да йöз вöсна.
Надежда Михайловна Подюкова сы мында во нин гажöдö да лöсьöдö концертъяс, рытпукъяс, кыпöдö ставнымöс петавны вöр-ваö, ворсöмъясö да ордйысьöмъясö. Ручын гажа олöмыс кутчысьö дзик сы вылын. Миянкöд сикт вöсна и спортын. Сылöн водзмöстчöмöн ми, «Сударушка» котырын сьылысьяс, ветлiм уна сикт-грездö, унакöд тöдмасим, унатор аддзылiм.
Сиктлöн сöвмöмö уна вын пуктö и Анна Ильинична Адамова. 22 во нин юрнуöдö олöмаяслöн Ручса котырöн. Быд керкаö нин пыравлiс, тöдö став олысьыслысь тöжд-могъяс. И век йöзкöд, век дась отсавны.
Елизавета Ивановна Ульнырова 96 арöснад мыйсö сöмын эз аддзыв, вуджис став сьöкыдсö, а век восьса сьöлöма, нюмъялысь чужöма, керка öдзöсыс восьса ставлы. А öд уджавлiс лун и вой, мед озырмöдны ас сикт, мед кокньыдджыка овсис йöзыслы.
Тамара Николаевна Попова дыр кад чöж вöлi Ручса совхозлöн катыд юкöнын скöт картаын бригадирöн, кывкутiс и удж, и уджалысьяс, и сюрукъяс вöсна, мед ас кадö вайöма турун, вердöма-идралöма-лысьтöма. Кадöн эз артасьлы, лун и вой коллявлiс сэнi.
Лариса Владимировна Расова овмöдчöминса администрацияын уджалö специалистöн. Кöть кор он пыр, кывзас быд шыöдчысьöс, отсалас. Ставнысö чолöмалас гажъяс дырйи, оз вунöд и олöмаясöс. Олö сиктлöн тöжд-могъясöн.
Уна водзмöстчысь да шань Ручса аньöс на позьö пас-йыштны праздник водзын. Эмöсь и век лоöны ас бöрсяньныс нуöдысьяс, водзмöстчысьяс, кодъяс олöны оз сöмын талунъя, но и аскиа олöмöн, орччöн олысьяслöн тöждöн.
Екатерина Ульнырова.
Руч.