Смолянкаысь Наталья Ляшенко мичмöдö öшинь увсö лымйысь мича вöчöмторъясöн. Выль во бöрын ань заводитiс лöсьöдны лымйысь ыджыд тигрöс да сы пыдди артмис куйлысь ыджыд кань. Февраль 23-öд лун кежлö Наталья Владимировна дасьтiс лымйысь ыджыд танк. Артмис дзик збыль техника кодь. Вöчöма порсьöс, кодöс колö на мавтны. Март 8-öд лун кежлö «юрсö лэптiсны мича дзоридзьяс». Та кындзи лым сывтöдз мöвпалö вöчны ва вылын уялысь юсьясöс. Наталья ставсö вöчалö сьöлöмсянь, мöвпъясö сетчöмöн, зыр да кияс отсöгöн. Оз пов, мый лым сылас да ставыс бырас. Öнi пö синмыд радлö, челядь нимкодясьöны, и тайö бур.

Танк дорö тшöкыда волывлöны ворсны челядь. Снимайтчöм могысь Наталья Владимировна корлiс Смолянкаысь танкöвöй войскаын служитысь Дмитрий Булышевлысь шлёмсö. Пушка пыдди ань пуктöма пожöмысь потш. Вöчöма ставсö, кыдзи колö танклы. Татшöм мича вöчöмторъясысь Югыдъягса юралысь Александр Викторович Лодыгин козьналiс Наталья Ляшенколы фоторамкаяс.
Наталья — енбиа морт. Гортас вöчалöма быдсяма вöлöгаысь уна мичаторъяс. Аддзö кад и горт гöгöрса уджъяс, и челядь да творчество вылö.
Артур Гарнов.
Гижысьлöн снимок вылын Наталья Ляшенко.