Эрдöдiс сьöм ылöдöм

[ A+ ] /[ A- ]

Кулöмдiнын аттьöалiсны банкын уджалысь аньöс йöзöс бöбйöдлысьясысь видзöмысь.

Россияса пытшкöс делöяс министерстволöн Кулöмдiн районса юкöнö воис юöр, мый дзик öнi, вермö лоны, нывбабаöс телепон пыр ылöдлöны мошенникъяс.

Кулöмдiнса ань сулалiс ас вынöн могмöдчан жырйын банкомат дорын да сёрнитiс телепон пыр. Банкса уджалысь Н.В.Удоратиналы шыбитчис синмö нывбабалöн повзьöм чужöмыс. Шемöсмöм ань банкоматысь дасьтысис «босьтны» сьöм. Н.В.Удоратина юалiс нывбабалысь, оз-ö ков сылы отсöг? Нöшта юалiс, оз-ö сылы звöнитчыны мошенникъяс? Но нывбаба нинöм эз вочавидз, бöрыньтiс вöзйöм отсöг да петiс банкысь. Аньлöн асьсö тешкодя кутöмыс шензьöдiс банкын уджалысьöс, да сiйö дзик пыр юöртiс полицияö тайö лоöмтор йывсьыс. Погона йöзлы гражданка висьталiс, мый сылы звöнитiс мужичöй, висьтасис ФСБ-ын уджалысьöн да юöртiс, мый нывбабалöн банкын куйлысь тшöт кузя вöчсисны гöгöрвотöм операцияяс. Тадзи ылöдчöмöн шышъяс кöсйисны кыскыны нывбабалöн тшöт вылысь Россияса Сбербанкысь кредитöн босьтöм сьöм — 490 сюрс шайт. Пöръясьысьясöн сьöм «каттьöм» банкса сюсь уджалысь да полицияса сотрудник ас кадö удитiсны сувтöдны.

2023-öд вося кык тöлысьöн Россияса МВД-лöн Кулöмдiн районса юкöнöн пасйöма нин 11 сьöм ылöдöм! Став сьöмсö кö öтлаöдöмöн артавны, мошенникъяслы вуджöдöма нин 2 286 614 шайт.
Дасьтiс Ария Напалкова.

Комментарии:

Добавить комментарий

Свежий выпуск: 28 марта

Осторожно — мошенники!