Октябр 13-öд лунö юркарын нимöдiсны видз-му овмöсын медся бур уджалысьясöс, тшöтш и миян районын зiльысьясöс. Министерстволöн почёт пöв вылö пасйисны Анастасия Ревокатовна Яроваöс, Николай Васильевич Паршуковöс, Михаил Васильевич Игнатовöс, республикалöн почёт пöв вылö — Эдуард Васильевич Тимушевöс, Николай Васильевич Паршуковöс нöшта республикаса юралысьлöн аттьöалан гижöдöн.

Анастасия Ревокатовна Ярова видз-му овмöс юкöнöн веськöдлö 12 во, ставнас уджалö 42 во нин.

2012-2023-öд воясын видз-му овмöс юкöнö пуктöма 360 миллион шайт. Кыпалiсны 1300 скöт юрлы картаяс. «Помöсдiн» кооперативын лэптiсны да выльмöдiсны 240 да 200 скöт юрлы фермаяс, «Пожöг» кооперативын 200 юрлы ферма да 50 юрлы кукань видзанiн. Воссис 410 скöт юрлы семьяöн кыпöдöм кöкъямыс ферма. Тайö Е.Е.Тарабукина, Е.Е.Епов, Т.А.Гурбанова, С.А.Тимушев, Н.В.Паршуков, Е.А.Кузнецова да Г.А.Китаев крестьянин овмöс кутысьяслöн. Выльмöдiсны «Помöсдiн» кооперативлысь йöлысь вöлöга вöчанiн, лöсьöдыштiсны и «Пожöглысь». Кольöм воын йöлысь вöлöга вöчанiн воссис Кулöмдiнын. Районын куим начкысянiн, воссис и яйысь вöлöга вöчанiн.

Дас воöн видз-му овмöс юкöнын зiльысьяс босьтiсны 30 трактор, 23 машина, 280 бур скöт юр, техника дорö 100-ысь унджык пысалан оборудование.

Ыджыд пай пуктiсны муяс бурмöдöмö, вужвыйöн дзоньталiсны видзьяс да муяс «Помöсдiн» да «Пожöг» кооперативъяс, Е.Е.Тарабукина да Г.А.Китаев фермеръяс.

Таво öкмыс тöлысьöн «Пожöг» да «Помöсдiн» кооперативъяс кольöм воын серти содтысисны 52 скöт юрöн, да талун тайö овмöсъясын 655 юр. 16 юрöн содiс и лысьтан мöсъяслöн лыдыс, да талун кежлö 350 юр. Öкмыс тöлысьöн лысьтiсны 1109 тонна йöв, кольöм вося тайö жö кад серти 36 процентöн унджык. Öти мöслысь шöркодя лысьтiсны 3051 килограмм йöв, содтысисны 30 процентöн.
Анастасия Ревокатовналöн водзмöстчöмöн миян районса видз-му овмöс юкöн республикаын пыр медся буръяс лыдын, уджö босьтчысьяс да уна во нин овмöс кутысьяс, кооперативъяс пырöдчöны конкурсъясö да шедöдöны грантъяс.

 Николай Васильевич Паршуков фермеравны босьтчис 2015-öд воын. Сыöдз Тимшерын эз вöв видз-му овмöс либö крестьянин овмöс кутысь. Олысьяс ёнджыкасö зiльöны вöр пöрöдысьяс да вöчысьяс дорын.

Николай Васильевич овмöсöн кужöмöн веськöдлысь, сöвмис-паськöдчис. Эмöсь кöрым заптан техника, кык трактор, груз новлöдлан кык машина, 37 гырысь скöт юр, скöт картаяслöн ыдждаыс 100 квадрата метраысь унджык. Кольöм воын вöчис 47 тонна йöв, 15 процентöн унджык воддза воысь, быдтiс-тшöгöдiс яй вылö 2,6 тонна скöт да гортса лэбач, унджык 15 да 53 процентöн.

Скöтöн содтысьöм да налы оланiн бурмöдöм могысь 2021-öд воын пырöдчис видз-му овмöс министерствоöн котыртöм гранта конкурсö. 50 юрлы скöт карта воссис кольöм воын.

Йöв, рысь, нöк, вый да сыр вöчö Надежда Ивановна гöтырыс, иналöны Тимшерын да Лопъювадын. Олысьясöс могмöдöны во гöгöр чöж. Гожöмын, кор посёлокö локтöны студентъяс да отпускö посёлокын чужысьяс да бокиö овмöдчысьяс, вöлöга вылö йöв оз лишав, вузалöны сöмын йöв. «Тимшер» овмöдчöминын олö 1,5-ысь унджык морт, да оз ставныслы тырмы прöдукцияыс. Йöв вöчöм да вöлöгаöн содтысьöм могысь августын босьтiс оборудование. Фермер вöлöга вöчанiнсö мöвпалö кыпöдны неылын ферма дорас. Лоас позянлун вöлöга вылас босьтны сертификат, да могмöдны сад да школа, а сiдзжö инавны лавкаясö.

 Михаил Васильевич Игнатов школа помалöм бöрын пырис Помöсдiнса совхозлöн Скöрöдумса юкöнö тракторист-машинистöн. Öтилаын уджалö 30 воысь дырджык нин. Зiль да кывкутысь морт. Кадöн оз артась, вöчö быд удж. Сяммö дзоньтавны быд техника, «ловзьöдiс» уна во сайын жугавлöм немечьясöн вöчöм техника.
Гожöмын заптö кöрым, тöлын сiйöс ваялö скöт картаö. Бура тöждысьö техника вöсна, тöдö сылысь гуг и бан, пыр и дзоньталас колiгöн.
Сiйöс пыдди пуктöны öтлаын уджалысьяс, унаысь нин пасйылiсны почёт грамотаöн, тшöтш и видз-му овмöс республикаса министерствосянь.

Эдуард Васильевич Тимушев видз-му овмöсын 16 арöссянь нин. «Усть-Куломская» кооперативын вöчö да иналö йöв, эм и аслас вузасянiн. Кооператив йöлысь вöчö вит сикас вöлöга. Инасьö зэв бура оз сöмын районын, радейтöны и мукöд районса да карса олысьяс. Воддза воын ас овмöсъясысь босьтiсны 130, кольöм воын — 145 тонна йöв. Эдуард Васильевич сюсь да киподтуя морт, пыр и казялас да дзоньталас оборудованиелысь жугалöминъяс. Водз асывсянь, овлö и шойччан лунъястöг, машинаöн петö туйö, чукöртö сикт-грездъясын овмöсъяслысь йöв. Кооперативöн вöчöм вöлöгасö разöдö Кулöмдiнса да Сыктывкарса бюджет учреждениеясö, а сiдзжö вузясянiнъясö. Бура тöждысьö техника вöсна. Йöв лэдзöмöн пыр жö мыськалö-сöстöммöдö цистернасö. Уна вося бур уджысь Эдуард Васильевичöс пасйисны аттьöалан гижöдöн районса администрациясянь, почёт грамотаöн видз-му овмöс министерствосянь.

Марина Дадашова.
Видз-му овмöс юкöнлöн снимокъяс вылын: Анастасия Ревокатовна Ярова, Николай Васильевич Паршуков, Михаил Васильевич Игнатов, Эдуард Васильевич Тимушев.