Ылi 2010-öд воын Анна Ильинична Адамова (сэки веськöдлiс олöмаяслöн котырöн) корис кайлыны Кулöмдiнын мунысь ветеранъяслöн сьылан фестиваль вылö. А бöрсö локтiгöн и гарыштiс, вот мукöд сиктысь пö эмöсь гижысьяс, став вöчöмторсö «районкаад» гижасны, а миян та ыджда Руч сикт, и некод оз пасйышт олöм-вылöмнымöс. Сэки нинöм эг шу, а сэсся, кор кутi ветлöдлыны культура керкалöн «Сударушка» сьылан котырö, öтчыд пукси и гижи. Мöдöдi полöмöн, быттьö весиг ручсаяс водзын яндзим вöлi, со пö вышитчö, «писатель» лоöма. А кор гоз-мöд морт шуисны, мый зэв мичаа пö гижöмыд, сьöлöмсянь лыддим, да быттьö кыткö личалiс. А сэсся и «Парма горсянь» звöнитлiсны, быттьö ышöдiсны, и со колис уна-уна во, а меным окота гижны, кыдз мый олö Руч сиктыс, бур йöзыс, сикт гöгöрса мичлун йылысь, «Сударушка» котыр йылысь, челядькöд öтув ворсöмъяс, походъяс йылысь. Олам, сiдзкö эм мый йылысь тöдмöдны газет лыддьысьясöс, район пасьта олысьясöс. Öд и ачым радейта лыддьыны, дерт, медводз аслам муса Керчомъя да Кекур йылысь, сэсся вöр-ва, мукöд ветеранъяслöн олöм йылысь. Кроссвордъяс-юржугланторъяс кажитчöны и.

Менам эм зэв бур да шань нывъёрт (а чужис аньыс январ 2-öд лунö), кодлы чужан лун кежлас вöча бур козин, гижöда во джын кежлö «Парма гор» вылö. И кыкнаннымлы зэв любö.

 А гижнытö велöдiсны школаын, зэв бур да тöлка велöдысьяс, коми кыв да литератураысь Анна Андреевна Кочанова, роч кыв да литератураысь Ия Ивановна Лютоева. Мамук, Ольга Александровна Воробьёва, кодi ичöтдырйи ывлаö петалiгöн тшöктывлiс мича, лöсялана да стöч кывъясöн висьтавны пу да миянöс кытшалысь гöгöртас йылысь, гортö пырöмöн казявны керка пытшлысь аслыспöлöслунсö, то вокъяслысь олан русö. Меным вöлi кажитчö «мойднысö».

А «районкалы» сиа уна лыддьысьысьöс, лоны нöшта на интереснöйöн, дерт, жö став бурсö.
Екатерина Ульнырова.
Снимок гижысьлöн.