Эз чусмы радейтöмныс

[ A+ ] /[ A- ]

 Июль сизимöд лунö, буретш Иван лун пасйигöн, семья да муслунлöн лун паныдö Дереваннöйса юралысь Елена Васильевна Булышева кыпыда пасйис пыдди пуктана Иван Иванович да Вера Александровна Ульныровъясöс, висьталiс шоныд кывъяс да козьналiс «За любовь и верность» медаль.
Иван Иванович да Вера Александровна тыр-бура да ладöн олöны нин 54 во.

 Айловлöн батьыс Иван Николаевич уджавлiс колхозса председательöн Шöръягын, сэнi жö олiсны и мамыс Анна Ивановна да Галина чойыс. Донса школаын кöкъямыс класс помалöм бöрын Иван лэччис велöдчыны Сыктывкарö трактористö. Бöрынджык бать-мамыс локтiсны овны Дереваннöйö. 1966-69-öд воясö Иван Иванович служитiс Казахстанын, видзис граница. Армияысь локтöм бöрын том зонлы мамыс чорыда шуис гöтрасьны. Иванлöн сэки нин вöлi вежöрас пыдö пуксьöма том ань, Дереваннöйысь жö Вера ныв. Öттшöтш мамыскöд и мунiсны корасьны.

 Шоныда паныдалiсны мама-пиаöс Александр Николаевич да Уляния Афанасьевна Тюрнинъяслöн семья, Вера Александровналöн бать-мамыс да чой-вокъясыс. Югыд нюма, топыд тэчаса зон да тöлка ныв, сибыд сиктса ань пыр и вöрзьöдiсны сьöлöмъяснысö öта-мöдныслысь.
Кык вежон мысти нин гижсисны. Вöлi январ 1970-öд во. Ас рöдвужкöд гажсö пасйöм бöрын том гозъяöс эз повзьöд ывлаын швачöдчысь пашляк да чизыр-йиджана тöв, мöд луннас и мöдöдчисны вöла-доддяöн Лун Покаö, пасйыны выль семьялысь чужöм. Чукöрмис ыджыд рöдвуж, пызаныс чегис ас вöлöгаöн.

Дереваннöйö бергöдчöм бöрын водзö колiс мöвпавны семьялöн олöм йылысь. Гозъя овмöдчисны верöсыслöн бать-мам ордас. Иван Иванович пырис уджавны СПЛАВö, Вера Александровна велöдчис учётчикö да вöзйысис сэтчö жö. Бöрти верöсыс вуджис лесопунктö. Бур уджысь нывбабалы да айловлы козьналiсны уна грамота да аттьöалана гижöдъяс. Иван Ивановичлы республикасянь сетiсны «За работу без аварий 3 степени» пас.

 Зiль гозъя век кытчöдз вермисны видзисны скöт да пуктiсны турун. Градвыв пуктасъяс вöдитöны öнöдз на. Вера Александровна шань да сибыд нывбаба радейтö быдтыны дзоридзьяс. Öшинь улыс быд гожöм пöртмасьö яръюгыд рöмъясöн. Иван Ивановичöс, кыдз коми мужичöйöс, ичöтсянь кыскис вöр-ва. Нэмсö кыйсис-вöралiс. Öнi на лэччывлö Эжва дорö кыйны чери да дэльöдыштны нырсö чöскыд пöльтысь тöврунас.

 Коми сикт-грездъясад пыр сьывлiсны. Радейтiсны сьывны и Иван Ивановичлöн бать-мамыс. Сьылан сямыс вуджис и айловлы. Мужичöй дыр петкöдчис «Парма шыяс» котырын. Мича юргысь сьыланкывъясöн котырыскöд кытшовтiсны став матысса районъясысь сикт-посёлокъяс. Öнi на, кор гортаныс чукöрмылö ыджыд рöдвуж, Иван Иванович налысь сьöлöмнысö шонтылö коми да роч сьыланкывъясöн.

 Гозъя быдтiсны да ыджыд олöмö воськовтöдiсны ныла-пиаöс. Александр Иванович Ульныров пиыс олö Кулöмдiнын, уджалö полицияын, öнi шойччöг вылын нин, но уджысь оз орöдчи. Галина Ивановна Ульнырова олö Сыктывкарын, уджалö республикаса бурдöдчанiнын старшöй медсестраöн. Бокын олысь челядь оз вунöдны чужанiн. Тшöкыда олöма йöзöс видлiны волывлöны и нёль внук-внучка, ыджыд бать да мам, пöль-пöчöн шуысьяс, сьöлöмнысö шонтö и öти правнучка. Ыджыд керка сэки торйöн нин лолö югыдöн да гажаöн.

 Ыджыд олöм вöлöк вуджöмöн, сьöкыдлунъяс венöмöн, олöмыслы нимкодясьöмöн, уджсö повтöг вöчöмöн, ас гöгöрныс йöзсö пыдди пуктöмöн Иван Иванович да Вера Александровналöн эз чусмы аслыспöлöс радейтöмыс да öта-мöдныс вöсна тöждысьöмыс, а водзö на зумыдмö, сöвмö, нималö асланыс быдтасъяс да сиктса йöз водзын. Мед и водзö паськалас да рöдмас нэм джынысь унджык кад сайын кöдзöм тусьныс.
Татьяна Чувьюрова.
Снимокъяс Ульныровъяслöн чукöртöмысь.

Комментарии:

Добавить комментарий

Свежий выпуск: 7 февраля

Осторожно — мошенники!