1998–öд воын Россияса президентлöн 120 номера индöдöн вöлi урчитöма «Мамъяслысь лун», миян странаса став мамöс нимöдöм могысь гажлунлысь кадпас. Сiйöс пасйöны ноябрлöн бöръя шойччан лунö. Таво тайö праздникыс лоö ноябр 30 лунö. Эн вунöдöй чолöмавны ассьыныд мамъястö!
Чужан горт да муса мам, кодi век жалитыштас, шуас мыйкö мелiöс, шаньöс: менам шондi, кöчиль, муспоз. И ми тшöтш кутам ыдждöдлыны найöс. Мамукыд – тайö енэж, югöр, миян шудлун, мойд, нюм, мелiлун, медся бурыс.

Медмуса мамлы, Лидия Николаевна Ногиевалы дасьтöны концерт Саша да Славик пияныс. Лидия Николаевна Ногиева да Степан Александрович Третьяковлöн шуда семьяын нёль челядь: Геннадий, Саша, Славик да Маша нылыс.

Лидия Николаевна, сiдзкö, уна челядя мам. Чужис сiйö Кулöмдiнын, но 12 арöссянь олiс да велöдчис Пожöгдiнын Минадора Ивановна Сенькина ыджыд мам дорас. Бабыс сiйöс велöдiс кысьыны, пусьыны, соласьны, бура вöчны кипом удж. Позьö нимкодясьны зарни кияса аньлöн кипомысь петöм мичаторъясöн.

Верöс сайö петiс 28 арöсын. Степан Александровичкöд найö öтлаынöсь нин кызь нёль во, да Лидия Николаевна ошкö, мый сылöн медбур верöсыс. Радейтö челядьсö да гöтырсö, быдторйö велöдö ныв-писö, киподтуя, век накöд öтлаын. Шойччан лунъяссö коллялöны öтлаын жö: ветлöны тшакла, вотöсла, чери кыйны. Асланыс машинаöн тöвзьылiсны Пузлаö, видзöдлыны мусьыс петысь вабус (фонтан) вылö да Асыввожö.
Верöсыскöд да челядьыскöд чери кыйны ветлö тшöтш и Лидия Николаевна.
– Ми кыйсям вугыр шатинъяс вылö. Шедас кö кельчи да ёкыш, юква вылö, чöсмасьыштны пражитöмöн, миянлы тырмас, – висьтасис ань.

Дерт, гортгöгöрса уджсö öтлаын жö бергöдöны. Вöчöны пельняньяс, пелькöдчöны, пуктöны турун, дöзьöритöны пемöсъясöс. Видзöны 10 ыж, 9 чипан да куим кролик. Таво öшинювсьыс вотiсны öкмысдас литра öмидз. Вишня, сэтöр, клубника – быдторйыс быдмö град йöрас. Картупельсö челядьыс асьныс жö пуктöны, нетшкöны ёг, босьтöны вилаöн, мед этшаджык дойдавны пуктассö. Ичöтсяньыс кö челядьтö велöдан – сэсся сэтшöм уджачöсь и быдмасны.

Челядьыс ёна кывзысьöны бать-мамыслысь. Геннадийлы 19 арöс нин, сiйö олö Ижевскын. Сашалы 13 арöс, сiйö велöдчö сизимöд классын, Славиклы 11, сiйö – витöд классын, Машалы куим арöс на. Öтув найö и пасйöны гажлунъяс. Челядьлöн чужан лун – медрадейтана гажыс. На дорö век воöны ёртъясыс. Со и мамлöн лун кежлö Саша да Славик сьывнысö ветлöны Пожöгса культура керкаö да Пожöгдiнса клубö. Нимкодьыд мамыдлы. Таво пияныс зонкаяслöн нёль морта ансамбльöн ветлiсны «Василёк» вылö. Сьылiсны «Кöч» сьыланкыв да босьтiсны коймöд места. Машук, дерт, дасьтiс жö козин мамыслы. Таысь ыджыд шудыс му вылас сэсся оз и ков.

Чолöмалам мамукъясöс Мамъяслöн лунöн! Мед олöмас тiянкöд орччöнöсь пыр лоöны радейтысь, гöгöpвоысь, сьöлöм гажöдысь да лов личöдысь, долыдмöдысь да отсöг сетысь медрадейтана матысса йöз! Мед жö тiян ловсьöлöмын пыр ыджыдалö муслун, семьяаныд – öтамöдöс гöгöрвоöм! Мед збыльмас тiян став гуся кöсйöмныд! Ён дзоньвидзалун, шуд да быд бурсö! Додь тыр шуд да ноп тыр радлун! Муса мамъяс, ми тiянöс радейтам.
Жанна Сизева.
Снимокъяс Лидия Ногиевалöн.