Талунъя лист бокын выль ним, Григорий Степанович Шебырев, ас районысь, уналы тöдса, коркö уджавлiс Кулöмдiнын военнöй комиссарöн, а сэсся республикаса военкоматын. Гöтырыс, Нина Григорьевна, вöлi райбольничаын терапевтöн. Г.С.Шебырев öнi олö
Сыктывкарын. Редакцияö ыстiс аслас олöмысь вель уна казьтывлöм. Талун йöзöдам медводдза висьтасьöм.
Вöльнöй сьвет вылас менам петсьöма юльын, турун пуктан кадö. Мамöс зэвтöма видз вылын да ковмöма котöртны гортö. Некодлы абу висьталöма. Торйöдчöма мекöд ыж гидын. А кор нин пыртöма керкаö рузумöн гартыштöм ёкмыльсö, чойяслы шуöма: со пö вайи тiянлы дзоля вок, видзантор, радейтöй да лелькуйтöй дитяöс. Да бöр мунöма видз вылö. Тадз ме сöльнитчи сизим челядя семьяö, ставлы лои медмусаöн… Школа помалiм кызь öтиöн да колим öта-мöдлы пыр кежлö чой-вок кодьöн. Нöшта на, ми лоим чужанiнын шöр школа медводдза помалысьясöн. Тайö ыджыд шуд. Выпускнöй рыт вылын ёртъяс восьтiсны гуся мöвпнысö водзö туй йылысь. Нывъяс унджыкöн кöсйисны лоны велöдысьясöн да сэтчö и сетчисны Александра Лужикова, Ия Шебырева, Агния Попова, Янина Чарнецкая, Капитолина Шебырева, Анна Шахова, Зина Шахова. Нина Калинина первой вöлi вузасьысьöн, а сэсся олöмсö йитiс школакöд жö да пенсия вылö петтöдзыс зiлис челядь пöвстын. Пыдди пуктана велöдысьöн да Помöсдiнын водзмöстчысь аньöн öнiöдз нималö Редция Попова. Буръяссьыс бур доярка Юлия Шахова öс мöдöдлiсны Москваö ВДНХ вылö. Янина Лажанева велöдчис зоотехникö да уна во уджалiс Югыдтыдорса зверофермаын. Михаил Шахов, Феликс Мартюшев да ме пырим Сыктывкарса ремесленнöй училищеö, кöнi велöдiсны связьын уджалысьясöс. Ставöн бöр локтiм ас районö. Но бöрынджык олöмыс менö веськöдiс бöрйыны мöд туй: лои военнöйöн. Казьтышттöг ог вермы кольны мукöд зонъясöс. Володя Федоров, Василий Дёмин, Ревокат да Елизар Шахов вокъяс, Алексей Мартюшев помалiсны вылыс да шöр тшупöда велöдчанiнъяс, нэмыс бура уджалiсны. Эз бара янöдны асьнысö ни бать-мамнысö. А шуны кö гораджыка, тшöтшъяяс пöвстысь некод эз юсьы ни эз шöйт уджтöг. Таысь мем зэв любö.

Григорий Шебырев.

Ставнас лыддьöй ноябр 23-öд лунся газетысь.

Снимокъяс Редция Поповалöн
да Евгения Шаховалöн чукöртöмъясысь.

Дасьтiс Нина БУТКИНА.