Марина Дёминалы тайö велöдчан воыс озыр кыпыд лоöмторъясöн. Петкöдчис «Том «Войвыв кодзув» конкурсын, аслас уджнас сёрнитiс Удораын нималана гижысь Альберт Егорович Ванеевлöн тшупöда паслы сиöм конференция вылын, Сыктывкарса коми культура шöринын «Польчиса Макар Дёмин» туясьöмöн, корлiсны да сёрнитiс «Юрган» передачалöн «Танi ми олам» петасын.

 Марина сöстöм коми кывъя Великопольеысь. Ичöт классъясын велöдчис чужанiнас, а сэсся Ярашъюса школаын. Öкмысöд классын бöрйис коми кывйысь экзамен, кöть эськö коми кыв, кыдзи чужан кыв, эз велöдны. Тöдöмлунсö донъялiсны «5» вылö. Туйдысь-велöдысьнас вöлi Марина Альбертовна Шебырева. Водзö Помöсдiнса школа. 11 классын вермис коми литератураысь республикаса олимпиадаын. Гижис пöльыслöн, сиктса крестьянинлöн, кодi нималiс бур уджöн, бура гудöкасьлiс, шыладнас пальöдлiс йöзыслысь шогсö, олан туй йылысь, Коми литература велöдысь Ольга Владимировна Шебырева казялiс, кыдз ныв радейтö мам кывсö, пыдди пуктö коми йöзлысь оласногсö, да вöзйис мунны Сыктыкарса университетö, босьтны коми кыв велöдысьлысь специальносьт да бергöдчыны Помöсдiнса школаö, кутам пö виччысьны.

 И со коймöд во нин унверситетлöн гуманитарнöй наукаяс институтын. «Войвыв кодзув» журнал быд во нуöдö конкурс, Марина пырöдчис сöмын тайö велöдчан воын. Ышöдiс Елена Васильевна Остапова кураторыс. Кафедраысь босьтiс кыз небöг, кытчö йитöма уна «Войвыв кодзув» журнал. 1973-öд восяысь и аддзис Серафим Алексеевич Поповлысь «Зiль вöлi, помнита батьö» кывбур, дзик пö быттьö менам Филипп Евлогиевич бать йылысь. Колiс снимайтны видео вылö. Унаысь видлiс. Лыддис öтчыд, мöдысь, коймöдысь. Кöнкö да лыддис гусьöнджык, нораджык, гораджыка, вежис лыддянногсö. И босьтiс коймöд места.

 Пырöдчö коми культура шöринын мунысь нуöданторъясö, радейтö лыддьысьны. Марина — коми кывлысь мич тöдысь ныв.

 Марина Дадашова.
 Снимок Татьяна Прошевалöн.