И бергöдчис ловйöн

Февраль 14-öд лунö лоис 41 во, кыдз Паспомысь Валерий Вячеславович Волков öтлаын служитысьясыскöд бронетранспортёръяслöн колоннаöн пырис Афганистанö.

Служитны босьтiсны 1982-öд воын. Веськалiс пограничникъяслöн войскаö Казахстанö. Сэнi велöдчис гранатомётчикö. Велöдчöм бöрын командир вöзйис мунны Афганистанö, вöтлыны сэтысь моджахедъясöс. Айлов эз бöрыньт, кöсйысис. Медводз веськалiс Киргизияö. Ош карын чукöртiсны ставнысö да водзö нуисны Туркменияö, водзö Афганистанö. Сэнi служитöм вöлi государстволöн гусяторйöн. Та вöсна бытьысь колiс вежны форма, пограничниклысь погон аскöд босьтöм йылысь и сёрниыс эз мун. Каракум пустынятi вуджисны граница.

— Андхой карын паныдасим чалмаа мужичöйяскöд да паранджаа нывбабаяскöд. Ме таöдз татшöм паськöма йöзсö эг на аддзыв. Афганистанса Герат провинцияса карын, вöлöмкö, олан кадсö лыддьöны мöд ног. Миян сэки вöлi 1983-öд во, а налöн 1362-öд. Йöзыс олiсны быттьö шöр нэмъясса кадын. Сёйысь керкаяс, би ни ва. Овмöдiсны ыж картаö. Гöгöр куйöд, лёк дук. Весалiм, мый ки улö сюрис, вольсалiм, лоис казарма кодьöн. Чайтсис, олöмыс бергöдчис ёна бöрö, — казьтылiс вöвлöм салдат.

Валерий Вячеславовичлöн взводлöн медшöр могыс вöлi — видзны Афганистан пыр биару мунан труба. Афганистанын войыс дзурс пемыд, сэки и моджахедъяс либö мöд ног духъяс верблюдъясöн нулiсны взрывчаткаяс. Салдатъяс кыйöдлiсны да бырöдлiсны найöс, луннас кык-куим бронетранспортёрöн корсьлiсны дзебсянiн. Машинаяс гöгöр кодйылiсны кöлеса судтаыс гуранъяс. Тайö колiс, медым моджахедъяс эз вермыны лыйны кöлесаясö. Окоп кодйылiсны и аслыныс, да лун и вой кыйöдлiсны.

Öтчыд, засадаын вежсьöм бöрын, мунiсны нин часьтö. Сöмын вуджисны биару труба, пасьмунiс басмачьясöн муö дзебöм мина. Бöръя машинаыс кыптiс сынöдö да бöр ляскысис увлань юрöн. Валерий Вячеславович пукалiс медводдза машинаас, видзöдiс туй бöрся, грымöбтöмлöн гыыс весиг юрсьыс нöбöдiс каскасö. Мойвиис, ставныс колисны ловйöн.

Мöдысь, дембель водзын нин, ыстiсны бырöдны моджахедъяслысь гöравывса базасö. Пöдтiсны ставнысö. Но вертолётъяс дыр эз локны босьтны найöс. Бырис сёян-юан, кык лун мысти воис жö отсöг.
Афганистанысь петiс 1984-öд вося июльын. Басмачьясысь дорйöмысь мужичöйлы урчитлiсны сетны «Красная звезда» орден, «За отвагу», «За боевые заслуги» медальяс. Но наградаяс эз и вичмыны повтöм пограничниклы. Кыдз Валерий Вячеславович шуис — бур, мый бергöдчис ловйöн.
Татьяна Чувьюрова.
Снимок гижысьлöн.