Анна Григорьевна Уляшева эз бöрыньт, кор 2017-öд воын вöзйисны веськöдлыны «Помöсдiн» кооперативлöн Скöрöдумса фермаöн. Видз-му овмöсын зiльысьяс оз тöдлыны шойччан да праздник лунъяс, но уджыс пö сьöлöм серти. Водз асыв, абу на и вит час, а лысьтысьысьяскöд тшöтш тэрмасьö нин удж вылö.

 Талун налöн фермаын 200 скöт юр, 112-ыс мöс. Вит лысьтысьысь, öти кукань видзысь, öти войся дежуритысь, öти оператор да тракторöн кöрым разöдысь. Вужвыйöн дзоньталöм бöрын татчö пырисны 2015-öд воын. Вевтсö вежигöн лöсьöдiсны йывсö, код пыр картаö пырö югыд, луншöр лунын оз ков öзтыны би. Лысьтысьысьяс оз нин вöдитчыны флягаясöн да ведраясöн. Йöв провод мунö мöсъяс весьттi, лысьтысян аппаратсянь йöв веськалö сэтчö да сы кузя и мунö торъя жырйö сiдз шусяна танкерö. Сэтысь кооперативлöн машина нуö йöлысь вöлöга вöчанiнö. Да и кöрымтö, сенаж да силос, пыртö техника, ачыс и посньöдлö да разöдö сюрукъяслы. Сöмын турунсö сеталöны асьныс лысьтысьысьяс, сiйö пö посньöдлыны оз позь. Тракторнас веськöдлö Андрей Александрович Курочкин верöсыс.

 Ань торъя журналö пасъялö, уна-ö лысьтöны, уна-ö кöрым сетны сюрукъяслы, чужöм куканьясöс. Тырсьöдчöны тшöтш и искусственнöя, мед мöсъяс вайсисны во гöгöр чöж.

 — Ковмас кö сувтла и лысьтысьны, и кукань видзны. Фермаас мый уджыс эм, ставсö кужа вöчны. Челядьдырйи котравлi Бадьёльйывса фермаö мам дорö, кодi видзлiс куканьясöс. Гожöмъясын пуктылiм турун, идравлiм град выв пуктасъяс. Школа бöрын корлывлiсны отпуск кадö, да вежлi лысьтысьысьясöс. Менам вит челядь. Аркадий гожöмын отсасис пастуклы. Кöсйö батьыс моз лоны механизаторöн, сиктад тайö зэв колана удж. Чолöмала миян кооперативын да видз-му овмöсъясын зiльысьясöс удж кузя праздникöн, сиа дзоньвидзалун, семьяясын лада олöм, — кывкöртiс Анна Григорьевна.
Марина Дадашова.
Снимок Ольга Уляшевалöн.