Алина Липина Кулöмдiнса шöр школаын ичöт классъясса нывкаяскöд да зонкаяскöд сёрнитiгкежлö дасьтысигöн мöвпъяснас бергöдчылiс аслас челядьдырся кадас. Надежда Ивановна Липина ыджыд мамыс вöлi медсестраöн, зiлис Пётр Иванович Игнатов хирургкöд да тшöкыда висьтавлiс аслас удж йылысь. Садйö, а сэсся школаö ветлысь внучкасö пыр корис овны шаня. Öд вильшасигöн, тэрмасигöн, ышмигöн да йöткасигöн верман усьны да доймавны, вермас чегны ки либö кок. Сэки сöмын врач отсалас. Вайöдлiс пример, кыдз инас öшйывтöм зонкалысь гипсöн кардъявлiсны чегöм коксö, да сiйö тöлысь пукалiс гортас. Ни школаö, ни гуляйтны. Челядьлы терпитмöн, кор вурöны доймöминсö. Корис и бура пасьтасьны ывлаö петiгöн, оз ков пыр жö пöрччысьны шондi мыччысьöмöн да шондöдöмöн. Тулысыд öд öдйö кыйö. Висьман кö пукав гортад, бурдöдчы врачлöн тшöктöм серти. Öд ёртъясыдкöд аддзысьлiгöн вермасны висьмыны и найö, и мукöд. И пыр тöдчöдлiс, бурдöдысьыдлöн уджыс кутшöм колана да тöдчана.

Алина мунiс ыджыд мамыслöн кок туйöд, Кулöмдiнса школаын öкмыс класс помалöм бöрын пырис Сыктывкарса медколледжö. Велöдчис бура, öкмысöд классас пыдiсянь велöдiс химия да биология, тайö предметъяссö и бöрйис экзамен сдайтöм вылö. Пыр аттьöалö Ольга Васильевна Ямщикова да Екатерина Михайловна Попова велöдысьяссö, кодъяс сетiсны бур тöдöмлунъяс, да найö отсалöны водзö велöдчöмын.

Кокниа пырис медколледжö, мöдöд во велöдчö медсестраö. Медводдза практикаыс вöлi кольöм вося ноябрын республикаса кардиология шöринын. Сэнi куйлöны сьöлöм, сьöлöмсöн висьöмъясöн. Ёнджыкасö бергöдiсны бумага удж. Тöвся практика вылас вöзйысис Кулöмдiнö. Туйдысьнас индiсны шöр бурдöдчанiнысь дзоньвидзалун жырын уджалысь фельдшер Кристина Леонидовна Рассыхаеваöс. Ветлiсны школаö, Алина ичöт классъясса велöдчысьяслы висьталiс ывлаын, гортын, школаын доймалöмъясысь, тшöтш и ОРВИ да гриппысь видзчысьöм йылысь.

Поликлиникаын видзöдiс да велöдчис вöчны ЭКГ. Диспансеризация нуöдiгöн Кристина Леонидовнакöд предприятиеорганизацияясö ветлiгöн уджалысьяслы вöчис ЭКГ, мерайтiс давление, сьöктасö, тушасö. Велöдчыны колö куим во. Госпрактика вылö тшöтш кöсйö волыны шöр бурдöдчанiнö.

Прöст кадö, кыдз и школаын, медколледжын ворсö волейболысь. Бур кывъясöн казьтылiс Александр Михайлович Соколовский велöдысьсö, кодi туйдiс ворсны волейболысь, ышöдiс петкöдчыны ордйысьöмъясын.

– Нöшта кытчöкö пырöдчыны кадыс абу. Колö велöдчыны, мед лоны бур специалистöн. Öнi школа помалысьяс буретш бöрйöны, кытчö мунны водзö. Бöрйöй аскиа уджтö сьöлöм сертинытö, мый радейтанныд, мый тiянлы лöсялö, кутшöм специалистъяс колöны районлы. Сэки кокни лоö велöдчыны, сы бöрын и уджавны, – тöдчöдiс Алина.
Марина Дадашова.
Снимок Анастасия Козловалöн.