55 во сайын декабр 12–öд лунö öти гöрöдö сöльнитчисны Екатерина Васильевна да Юрий Александрович Тарабукинъяс. Быттьö öнi на тöдмасисны, а Людмила нылыс важöн нин жбырнитiс шуда позйысь, быдмисны да семьитчисны нин внук-внучка, эм кык правнучка.

Юрий Александрович Ыджыд Кужйысь. Кöкъямысöд классын велöдчис Кулöмдiнса школаын, олiс кывтыдын вöвлöм лесхозлöн керкакöд орччöн интернатын. Матын олiс Екатерина. Сэки и тöдмасисны, сэсся коставлiсны.

 Том морт велöдчис Сыктывкарын электромеханикö, сэсся куим во армия. Бергöдчис, да бара паныдасисны Екатеринакöд. Ныв КБО-сянь вурсьысьö велöдчис Ставропольын да уджалiс нин. Сэсся эз нин торйöдчывны, гижсисны сöмын во мысти. Кöлысь ворсiсны и Кулöмдiнын, и Ыджыд Кужйын. Зятьöс пöся вочалiсны гöтырлöн, моньöс верöслöн бать-мамныс. Юрий Александрович зарни кияса, сяммис вöчны быдтор. Зэв пельк, зiль, вежавидзысь Екатерина Васильевна. Эз индавны, нырсö эз сюйны томъяслöн олöмö. Гозъя öтлаын нин отсасисны асланыс бать-мамныслы.

Юрий Александрович медводз босьтöм специальносьт серти уджалiс жилкомхозын. Нёль во веськöдлiс кусöдчысьяслöн часьтöн. Сэсся пырис КБО-ö, 18 во зiлис «Верхне-Вычегодский» леспромхозын электрикöн да аккумуляторщикöн. Вöр овмöс киссьöмöн мунiс витöд номера ПМК-ö, и бара жилкомхозö. Екатерина Васильевна во и уджалiс КБО-ын. Век на казьтывлö, кыдзи вурöм платтьö, сарафан да костюмöн петкöдчис районса культура керкаын. Сэки технолог Людмила Алексеевна Белоголова журналъясысь корсис моднöй паськöм, КБО-ын и вурисны, организацияясысь бöрйисны мича да статя нывъясöс, кодъяслы колiс тшапа ветлыны сцена вылын. Асланыс уджаланiнсянь вöзйисны Екатериналы. Йöзыс пö вöлi зал тырыс, видзöдысьяс-донъялысьяс ньöбалiсны сьöлöм выланыс воöм паськöм.

 Буретш банкö корсисны кассирöс да вöзйисны Екатерина Васильевналы. Эз бöрыньт. Лавкаясысь, предприятие-организацияясысь сьöм вайлiсны мешöкъясöн. Бумага и кöрт сьöмсö колiс лыддьыны öдйö да сорсьытöг, нöшта ки помысь. Банкысь сьöм босьтлiсны и удждон вылö. Банкъясын уджалысьяс пöвстын квайтысь шедöдлiс «Медбур кассир» ним. Сюсь уджалысьöс индiсны кассаöн веськöдлысьöн, сэсся касса юкöнса начальникöн. Банклöн нимыс вежласьлiс, но могыс вöлi öти.

Гозъя важöн нин шойччöг вылынöсь. Водзтi тшöкыда шыöдчылiсны Екатерина Васильевна дорö, вурсян машинаöн чинталiс-векньöдiс паськöм. Юрий Александровичöс и öнi на корлöны нюжöдны-вежны би провод, дзоньтавны бисянь уджалысь приборъяс. Тöв и гожöм тюръялö велосипедöн, вотчыны да корöсьла тöвзьылö мотоциклöн.

 – Колö бурöн овны ставныскöд. Пыдди-пуктыны öта-мöдтö, кывзыны да кывны, мунны воча. Видзны асьтö, оз ков пинясьны да скöравны. Сэки и кутан кывны асьтö шудаöн да коланаöн, – юксисны гозъя öтув олöмын медтöдчанаторнас.
Марина Дадашова.
Снимок гижысьлöн.