Йöз, кодъяс гижöмöн вермöны петкöдлыны вöрвалысь мичлунсö да асланыс сьöлöмкылöмъяснысö, – збыльысь аслыспöлöсöсь. Öд этша прöстö мöвпавны, кывны да сёрнитны – колö нöшта и мичаа петкöдлыны ассьыд мöвпъястö бумага вылö. А тайö строкаясыс кö пöрöны кывбуръясö, могыс лоö нöшта сьöкыдджык, öд колö кутчысьны рифмаö да размерö. Ылöдз абу быдöнлы тайö сетöма.

 Татшöмъяс лыдö пырö Бадьёльйылын чужöм Вениамин Витальевич Уляшев. Быдмис уна челядя семьяын. Вöлі сизимöд кагаöн. Челядьдырйиыс на босьтчис гижны коми кыв вылын кывбуръяс. Гöтрасьöм бöрас олö Діасёръяын. Уджаліс садйын ломтысьысьöн, пилорамаын рабочöйöн. Öні вуграсьö, вöралö да вотчö. Мария гöтырыскöд быдтісны Анна нылöс. Гижан ловбиыс эз эновтлы сійöс некор. Чукöрмис нин кывбуръяса некымын тетрадь. «Овлö, строкаяс чужöны виччысьтöг, кор вöрын либö ю дорын. Абу кö сьöрысь ручка, сэки зіля помнитны и не вунöдны. А кор гортö воа, пыр жö гижа», – тадзи, паныдасигöн, висьтавліс ачыс ассикас енбиа поэт.

 Вениамин Витальевичлöн кывбуръясыс йöзöдсьылісны «Парма гор» газетын.

 Кулöмдін районлöн 95 во тырöмлы сиöм самодеятельнöй гижысьяслöн районса конкурслöн «Роч кыв вылын поэзия» нимпасын вермис «Ветер» кывбурöн.

 Неважöн воліс библиотекаö да вайис ассьыс дзик на неважöн «чужöм» «Мый мен колö?» кывбур.

Мый мен колö?
А мый мен колö? Да оз и уна.
Мед сямöй волö кöть öтчыд луннас.
А оз кö люкась, то видла выльысь,
Мед сöмын олöм да вылöм йылысь.

А мый мен колö? Да оз жö этша.
Мед эбöс кольö жö кульны эжа.
Мед ыдждö муöй, да кöйдыс бырö,
А синмöй паськалас коркö дырöн.

А мый мен колö? Да оз и уна,
Кор тшак да вотöсла вöрö муна.
Да мый кöть лöсяла кымöр весьтö,
И бара тыасям ме да песьтер.

А мый мен колö? Да оз жö этша.
Мед йöз кö корасны, эськöн эшта.
Мед ёна лымъявтöдз самöй дуксьö,
И эм кö пöтка, мед сиö дзугсьö.

А мый войнас да вöтöн волö,
Мед, шуам, война, да бытьысь колö.
И мед оз кывсьы, ме шöпка гусьöн,
Да вот тай том йöзыс уна усьö.
Елена Курочкина.
Дiясёръя.
Снимок вылын: Вениамин Витальевич Уляшев.