Ельдöг латинскöй кывйын Lactаrius resimus. Нимсö сетiсны татшöмöс, сы вöсна мый топыд, крепыд, «грузнöй». Мукöдъяс шуöны артмис пö «гроздь» кывйысь котырöн быдмöм вöснаыс. Овлö еджыд, сьöд да кольквиж. Роч челядьлы, мед юрас кывйыс коляс, ме шуа, мися, под елью растёт (ель — дöг). Ок и дзебсясьнытö радейтö козъяс улад. Ачыс, дерт, ёна жö и чöскыд. Рыттыввыв муясын сійöс пö лыддьöны сёйтöм тшакöн, да ми тöдам, мый налöн став бурыс лёкöн лыддьысьö. Миян Киев Русьсянь на медбур тшакöн ельдöгтö шуöны, «Тшакъяслöн сарöн». А Коми муад ставöн радейтöны сійöс. Таво ельдöгыд петiс уна. Быд во вöрас тшакыд быдмö 300 тонна гöгöр. Таво буракö кык пöв унджык. Кулöмдін район зэв озыр ельдöгнад. Муртса и пырыштлан вöрас, а вель уна нин сюрас. Но колö тöдны местаяссö, кöні найö радейтöны поздысьны. Сійö öд сар, быдлаö оз петав. Мыйысь жö сійöс донъялöны? Тайö тшакас 32 процент белок, яйысь да чериа сёянысь унджык! С, В1, В2, D да B12 витаминъяс, естественнöй антибиотик, вир-яйлы колана бактерияяс. Абу уна калорияыс тайö сёянын, 100 граммын 16 килокаллорий. Постнöй сёян. Отсалö бурдöдны, кор чукöрмисны изъяс, депрессия, неврозъяс, атеросклероз да давление, сакарысь висьöм.

 Гижысьяс ёна жö радейтöны гижны ельдöг йылысь. Школаын на велöдчигöн на йылысь ме лыддьывлі XIX шöрын олысь С.Т.Аксаковлысь «Детские годы Багрова-внука» гижöдысь. Республикаса народнöй поэт Надежда Мирошниченко «Полёт невозвратимый» небöгын йöзöдіс ельдöг йылысь кывбур:

 «Грузди-грузди… Потому и грустно,
Что вкуснее нету ничего.
Не ходите, девки, в лес по грузди,
Чтоб от дома вас не увело».

 Чöскыда солавны ельдöгсö менö велöдісны бать-мам. Куим лун чöж быд асыв-рыт ме вежлала васö кöтöдöм ельдöгъясысь. Öти килограмм ельдöг вылö ковмас 50 грамм сов. Ог вунöд вылысас пуктыны чеснöк. Мукöдыс содтöны сьöд сэтöр коръяс, вишня, хрен, укроп, тупу коръяс. Вылысас мед век вöлі сола ваыс. Тöлысь мысти ельдöг сёян дась. Видзны колö кöдзыдінын, вит градус шоныд либö муртса кöдзыдджыкинын. Чöсмасьöй!

Жанна СИЗЕВА.