Анна Алексеевна Паршукова ичöтсяньыс кöсйис лоны ветеринарöн, бать-мам вылö видзöдöмöн тöждысис пемöсъяс вöсна. Олiсны скöтöн, отсасис гидын, мамыслысь велöдчис лысьтыны мöс, петкöдiс куйöд, гожöмын öттшöтш пуктiс турун. Сьöкыд удж эз повзьöд нылöс. Öкмыс класс бöрын мунiс велöдчыны республикаса видз-му овмöс техникумö.

 — Хирургия да паталогоанатомия урокъяс вылын велöдiм пемöсъяслысь пытшкöссö. Чипан, порсьлысь вундавлiм да видлалiм сьöлöм, тыяс, вöрк, туялiм, велöдчим тöдмавны висьöмсö. Эпизоотология урок вылын велöдiм вир-яйö висьмöданторъяслöн веськалöм да кыдзи бурдöдчыны наысь. Зоотехния урок вылын висьталiсны пемöсъяслы сёян-юанторъяс да верданног йылысь. Нёль во колис зэв öдйö. Техникумбердса пемöсъясöс бурдöданiнын дежуритiм врач-ветеринаркöд, пон да каньяслы вöчалiм уколъяс, — висьталiс ныв.

Коймöд во велöдчигöн нывъёртыскöд ветлiс практика вылö Сыктыв районса «Межадор» овмöслöн фермаö. Аскиа специалистъяс туйдысь-велöдыськöд куим тöлысь чöж видзöдiсны матö 900 юр мöсъяслöн дзоньвидзалун бöрся.

 Диплом босьтöм бöрын кольччис Сыктывкарö. Но сиктса нылöс кыскис чужанiн. Январын бергöдчис районö да пырис уджавны пемöсъясöс бурдöдан станцияö. Том специалист ыджыд сяма бурдöдысьяскöд ветлöдлö район пасьта. Корлiсны нин бурдöдны и пон, и мöс, и кöзаöс.

 Неважöн Мысын бать-мам дорас гöсьтитiгöн войнас корисны отсавны вайсьыны мöслы. Кукйыс мамыслöн кынöмас куйлiс лёка, колiс отсыштны. Медводдзаысь на пö веськалiс татшöмыс.

Öнi йöзлöн олöмö нин пырис гортын видзны черепаха, хомяк, ёжик, гортса кролик да лунвывса мукöдпöлöс ичöт пемöсъясöс. Колiгöн и найöс ветеринар вермас бурдöдны. Уджыштöм да сям содтöмöн Анна Алексеевна кöсйö велöдчыны пемöсъясöс бурдöдысь врачö.

 Татьяна Чувьюрова.

 Снимок Анна Паршуковалöн.