Со и Кулöмдiнö воис ар. Тайö гöгöрвоöдö, мый ми кутам пасйыны садса уджалысьяслысь лун. Талун кöсъя тiянöс, дона лыддьысьысьяс, тöдмöдны зэв бур воспитателькöд – Ольга Анатольевна Исламовакöд. Ачыс Ольга Анатольевна Носимысь, олö Кулöмдiнын. Наталья Васильевна Лодыгина пöчыс тшöтш уджавлiс челядькöд Носимса школаын 1947–öд восянь 1980–öд воöдз.

– Мунi пöчлöн кок туйöд, – пасйис Ольга Анатольевна. – Дзолядырсянь аддзывлi, кыдзи сiйö тöждысис челядь вöсна, гöгöрвоис найöс, велöдiс бур вылö.

И 2000–öд воын Ольга Анатольевна мунiс велöдчыны Сыктывкарса мöдöд номера педагогическöй колледжö, а сэсся – Коми государственнöй пединститутö. Велöдчис «Преподаватель дошкольной педагогики и психологии» юкöнын, а 2003–öд восянь 2008–öд воöдз сэсся уджалiс воспитательöн Сыктывкарса 93–öд номера садйын.

– Сiдзжö удитi уджыштны 1,5 во Усинскын, – нюмдыштiс Ольга Анатольевна. – Но сьöлöм корис менö бöр аслам чужанiнö.
Ассьыс сьöлöмсö Ольга Анатольевна кывзiс и локтiс бöр Кулöмдiнö. Танi сiйö аддзис ассьыс шудлунсö – петiс верöс сайö и чужтiс кага. Öнi Марина нылыслы 11 арöс нин. Шудлун аддзис и уджын. 2006–öд восянь Ольга Анатольевна зiльö «Нюм» садйын.

– Уджавны меным танi зэв сьöлöм серти, – сёрнитiгмоз тöдчöдiс Ольга Анатольевна. – Уджалан котырыс бур, шань йöз. Танi 22 во нин. 2008–öд воын педкöдчылi «Воспитатель года» конкурсын, босьтлi коймöд места. Öнi век на пырöдчылам челядькöд и ачым районса и республикаса конкурсъясö. Менсьым уджöс пасйисны велöдан управлениесянь да министерствосянь почёт грамотаясöн. Ме аттьöала ассьым пöчöс, кодi дзолядырсянь меным век вöлi примерöн. Челядьыдкöд уджыд кöть и сьöкыд, сöмын колö кужны сибöдчынылöсьöдчыны на дорö. На вöсна колö тöждысьны, гöгöрвоны найöс, налысь майшасьöмъяссö да ышöдны найöс бур вылö. Меным уджын отсалö уна воöн шедöдöм сямöй. Ёнджыкасö велöда ворсiгмоз, мед быд кагаöс позис кужны кыскыны тöдмавны мыйкö выльтор. И гöлöстö вежлалан, и сёрнитанногтö, мед кылiсны челядьыд, но ёнджыкасö театр отсöгöн, мый медся нин радейтöны найö. Налы колö вниманньö, сёрнитны сьöлöмсяньыд, мый мый а челядьыд пыр дасьöсь сёрнитнытö, сöмын колö кужны найöс кывзыны. Зэв ыджыд кывкутöм челядь вöсна, налöн дзоньвидзанлун вöсна, – кывкöрталiс ань.

Ольга Анатольевна мöвпалö и водзö уджавны челядькöд, öд ассьым сьöлöмöс пö ме сетi налы, тöдчöдiс сiйö. А ми сиам сылы дзоньвидзанлун, терпенньö и мед бура дыр на сiйö тöждысяс быдмысь зонпосни вöсна.
Наталья Гилева.
Снимок Ольга Исламовалöн.