Студентъяскöд аддзысьлöм

[ A+ ] /[ A- ]

Гожöм — тайö и каникулъяс, да чужанiнö локтöны студентъяс. Дiасёръяысь республика велöдчанiнъясын тöдöмлун босьтö 15 том морт, кыкöн республикаысь бокиын. Посёлокса клуб да библиотека котыртiсны школа аскиа помалысьяс да студетъяс костын аддзысьлöм. Волiсны Сыктывкарса госуниверситетлöн йöз кыв велöдан факультетысь Иван Карманов, Пётр Великий нима Санкт-Петербургса политехническöй университетлöн информатика да артасян техника факультетысь Сергей Курочкин, Сыктывкарса политехническöй техникумысь Кирилл Стяжкин да 20-öд номера училищеысь Данил Болдырев.
Висьталiсны, кыдзи найö бöрйисны велöдчанiнъяс. Пасйисны, мый колö аддзыны ёртъясöс да овны öтвылысь. И колö нывъяслы да зонъяслы талун нин водзмöстчыны, ёртасьны, тадзи лоö кокниджык пырöдчыны студентъяслöн олöмö. Сергей Курочкин висьталiс, мый буретш налöн группаысь кыкöн шыбитiсны велöдчöм, эз кöсйыны ли эз сяммыны овны котырын да. Иван Карманов серти, колö велавны-путьмыны уджавны индöдтöг, тöдöмлун босьтан университетын ли училищеын ли. Да гöгöрвоны, мыйла тэ велöдчан, пуктыны ас водзад мог. Мортыд век корсьö асьсö олöмас. Позьö и 40 арöсын вежны олöмтö, босьтны выль профессия да збыльмöдны мöвпыштöмтортö. Некор абу сёр.
Аддзысьлiгöн видлалiм, мый медтöдчанаыс уджсикас бöрйигöн.
Кöсъя — тайö мый ме радейта, мый меным сьöлöм серти.
Верма — тайö мый менам вынъяс да сям серти.
Колö — тайö мый колö меным ачымöс олöмын аддзöм могысь.
Сёрнитiсны, нöшта юасис-ны студентъяслысь. Юалiсны и тайö аддзысьлöмсö котыртысьяслысь, сьöлöм серти-ö миян удж да мыйла бöрйим сiйöс.
— Да, збыльысь сьöлöм серти. Ловным кыпалö, кор мыйкö мöвпыштам-лöсьöдам да збыльмöдам сiйöс, — вочавидзим ми.
Уджсикас бöрйöм — тайö мортлöн олöмын медся тöдчанаыс. Кöть кутшöмöс он бöрйы, век ковмасны велöдчöмöн босьтöм тöдöмлуныс да сямыс. А велöдчыны позьö век. Та вöсна талун нин колö бöрйыны, ёна лыддьысьны, чöжны сям да тöдöмлун. Асьтö видлыны уна сикас туйвизьын. Кыдзи öти сюсь морт шулiс: «Медым эн сорсьы, колö сям. Мед вöлi сям, колö öшибитчывны».
Татшöм восьса да бур сёрниысь, чайтсьö, быдöн аслыс коланасö сюркнялiс пель саяс. А, гашкö, и гöгöрвоис, кутшöм уджсикас бöрйыны сылы.
Елена Курочкина.
Снимок гижысьлöн.

Комментарии:

Добавить комментарий

Свежий выпуск: 20 июня

Осторожно — мошенники!