Улыс Вочса школаын рöсада быдтöны биология да химия классъяслöн джаджъяс вылын, тшöтш и мукöд классъясса öшиньяс вылын. Пуктiсны да видзöдiсны-донъялiсны свеклöлысь да морковлысь кöйдысъяс чужöм бöрся.

– Морков да свеклöлысь некымын сорт муö сюйим стöч 100 тусь. Ловзис 90 процентысь унджык. Сiдзкö, градъяс воссьöм бöрын буретш татшöм сортъяс позьö пуктыны, урожай воас бур, – юксис агроклассöн юрнуöдысь Ольга Андреевна Лютоева.

Нöшта видлiгмоз фосфор, азот да мукöд элементъяс содталöмöн киськалiсны рöсада, тöдмалiсны, позьö-ö торкны вынсьöданторлысь вöдитчанногсö. Öгуреч, помидор, баклажан рöсадаяс сотчисны, косьмисны да кулiсны. Пуктiсны выльысь. Татшöм опытъяс отсалöны нывкаяслы да зонкаяслы аддзыны да гöгöрвоны тырмытöмторъяс, велöдчыны колананог вöдитчыны быдсяма вынсьöданторнас. Таысь кындзи вöчлiсны и асьныс сорас. Ваö кöтöдiсны апельсин кор, лук да чипан кольк кыш, чай заварка да мукöдтор. Артмöмторнас киськалiсны быдмöгъяссö.

Сёрнитчисны Улыс Вочса олöмаяслöн котырöн веськöдлысь Татьяна Анатольевна Кузнецовакöд, да «Агроклассысь» позьö ньöбны дзоридзьяслысь рöсада. Тулыс помын наöн мичмöдасны Великöй Отечественнöй война вылын усьöмаяслысь пас дор. Чукöрмöм сьöм вылас ветеран котыр да велöдчысьяс локтан велöдчан воын нуöдасны Победалы сиöм урокъяс.

Нöшта февральсянь сентябр помöдз Улыс Вочса школаын 5-11–öд класса велöдчысьяс олöмö пöртöны «Зарни зыр» премия. Сэтчö ас кöсйöм серти вермöны пырöдчыны став нывка да зонкаыс. Быдöн чукöртöны сiдз шусяна агрочасъяс – отсасьöны градъяс вылын, дöзьöритöны пуктасъяс да с.в. Балаöн юрнуöдысь челядьлысь уджсö пасъялö торъя журналö, быд час тайö öти балл. Арнас видз-му овмöсын уджалысьяслöн лун кежлö сиöм гаж дырйи вöчасны кывкöртöд, кöнi дас сюрс шайт вичмас медся уна час уджалысьлы, сизим сюрс – мöдöн лоысьлы да вит сюрс коймöд места босьтысьлы. А сiдзжö ставныслы вичмас аттьöалан гижöд да козин.
Татьяна Чувьюрова.
Снимокъяс Ольга Лютоевалöн.