Енби пестысь

Пожöг вожын он кыв рочасьöм, танi сёрнитöны сöстöм коми кывйöн. Мам кыв сöвмöдöны садсянь. Кекурса нывкаяс да зонкаяс Ирина Дмитриевна Шахова воспитателькöд енбиалунöн дзирдалöны оз сöмын районын, но и республикаын. Вермысьяс лыдын «Василёчек» районса конкурсын, «Шуда челядьдыр» республикаса фестивальын. Петкöдчöны «Чолöм, дзолюк» уджтаслöн «Олам Комиын — сёрнитам комиöн», «Ми некор ог вунöдöй тiянöс», «Ми серпасалам шондi», «Миян шуда челядьдыр», «Мамуклы ме сиа» петасъясын да мукöдлаын. Коми кывбуръяссö корсьö небöгъясысь, сьыланкывъяссö роч вылысь вуджöдiс да гижис садйын водзтi шылад велöдысь Нина Александровна Мартюшева, талун тайöс вöчö шылад велöдысь Кристина Юрьевна Шварлис. Челядькöд пырöдчисны да вермисны и «Добрая дорога детства» районса, «Безопасность глазами детей» районса да республикаса конкурсъясын.

2014-öд воын Ирина Дмитриевна Сыктывкарса педучилище помалöм бöрын öтлаын велöдчысьяскöд мунiс Сыктывкарса университетö, шуисны лоны логопедъясöн. Сдайтiс экзаменъяс, öти сайын карысь корсис удж. Но сьöлöмыс кыскис чужанiнас, Кекурö. Буретш садйö колiс воспитатель. И кольччис.

— Сентябрын звöнитiс нывъёртöй, став пиысь пö öтнад вермин пырны университетö. Мукöдыс велöдчисны вештысьöмöн. Збыльвылас ме сэки «пöтi» нин велöдчöмсьыс, кöсйи уджавны. Сiдзкö, тайö колiс водзö олöмын, велöдчи уджысь орöдчывтöг, — казьтылiс Ирина Дмитриевна.

Медводдза уджалан воын садйын вöлi во да джын арöссянь сизимöдз 26 челядь. Юрас кутчысьлiс, кыдзи öти кадö та мындаыслы сетны тöдöмлун. Öд практика вылын уджалiс сöмын öти арлыда челядя группаын, а танi öтпырйö вит арлыда. Кыдз шуласны, синмыд пö полö, а киыд вöчö. Öтлаын уджалысьяс да бать-мам отсöгöн венiс став сьöкыдсö. Кöть и сьöкыд, но бурыс сыын, мый гырысьяс вылö видзöдöмöн водз сöвмöны дзоляясыс. Ошкис бать-мамъяссö, и отсасьöны, и пырöдчöны садйöн нуöдан быд уджö.

Талун садйö котралö 11 нывка да зонка. Таво локтiс кык дзолюк, школаöдзса арлыдаыс куим кага. Волывлöны ставныс, кöть и эмöсь уджавтöм бать-мам, гортын пöль-пöч, сöмын пö висьöмъясыд падмöдлöны. Ирина Дмитриевна содтöд тöдöмлун босьтöм могысь видзöдö вебинаръяс, дистанционнöя кыпöдö сям быдсикас курсъяс вылын, ветлö семинаръяс вылö. И уджö пыр пыртö выльтор.
Марина Дадашова.
Снимок
Ирина Шаховалöн чукöртöмысь.