— Эм кытчö веськöдчыны, öд танi водзтi совхозлöн Донса юкöнын видзлiсны 400 скöт юрöдз. Ковмас уджавны, содтысьны и меным, да чайта 100 мöслы талун восьтöм скöт карта абу бöръя. Öнiя кадся югыд да кыпыд фермаын лöсьыд лоас миян сюрукъяслы, бöрö кольö кипом удж, да кокни лоас и уджалысьяслы. Ыджыд аттьö видз-му овмöс министерстволы да районса администрациялы меö эскöмысь да отсалöмысь, — пемöсъяслы выль юрсюянiн восьтiгöн ассьыс ловкылöмъяссö эз дзеб крестьянин овмöс кутысь Сергей Алексеевич Тимушев. 

Республикаын да районын тайö зэв тöдчана лоöмтор. Нöшта 100 юрлы да лöсялö локтан воын республикалöн 100 вося тшупöда паслы. Да и воссис сiйö öшлöн матыстчысь во водзын. 

— Талун збыльысь праздник. Сергей Алексеевич зэв водзмöстчысь да нырччысь морт. Нимкодь, мый сьöкыд во вылö видзöдтöг, збыльмöдiс мöвпыштöмторсö. Министерство отсалiс грантöн. Ас сиктсаясöс могмöдiс уджöн, сiдзкö кокниа бергöдчасны налöн семьяясыс, — пасйис республикаын выльöн индöм видз-му овмöс министр Денис Владимирович Шаронов. 

И збыльысь, крестьянин овмöс кутысь зэв водзмöстчысь морт. Олö районлöн да чужанiныслöн талунъя да аскиа лунöн да тöжд-могъясöн. Абу сöмын Донын, но и районын фермеръяс пиын сылöн медся ыджыд овмöс. Сы отсöгöн 2011-öд воын Кулöмдiнын котыртчис вузалысь-ньöбысь, вöчысь-иналысь «Усть-Куломский» кооператив, кодöн веськöдлiс Алексей Иванович батьыс, а уджсö котыртiс да вöчис Сергей Алексеевич. Тадзи найö отсалiсны ас овмöсъяслы инавны яй. Босьтчöмсянь пыр отсалiсны районса администрация да видз-му овмöс юкöн. 2012-öд восянь крестьянин овмöс кутны босьтчис ачыс. Нырччысь морт балаöн пырöдчис видз-му овмöс министерствоöн котыртöм гранта конкурсö да вермис. Вичмöдöм сьöм вылö районын медводзаöн ньöбис кöдзыдысь повтöм да яя герефорд куканьясöс, трактор. Овмöссö лöсьöдiс Донын. Содтысис скöт юр лыдöн. Майбыр, Валентина Николаевна мамыс ветеринар, зэв дыр уджалiс совхозлöн Донса юкöнын, да сiйö и тöждысьö пемöсъяслöн дзоньвидзалун вöсна… 
Марина Дадашова. 
Водзö лыддьöй декабр 24-öд лунся газетысь.