Донысь Василий Нехорошев неважöн на воис армияысь. Батьыс моз жö эз пов служитöмысь, мунiс окотапырысь. Сiдз артмис, мый ая-пиа служитicны Ярославль обласьтын, сöмын торъя часьтъясын. Николай Васильевич квайт тöлысь велöдчис веськöдлыны бронетранспортёрöн. Сы бöрын веськалiс Чечняын мунысь медводдза война вылö. Салдатъяс новлöдлiсны быдсикас груз, колльöдiсны да дöзьöритiсны машинаяслысь колонна. Öтчыд Николай Васильевичöс лыйисны, да сiйö сьöкыда контузитчис. Енмыс видзис, да гортö воис ловъяöн. Öнi ciйö боевöй тышъясса ветеран.
Василий пиыс тшöтш веськалiс Ярославль обласьтö, сöмын кöрт туй войскаö. Писö колльöдiгöн бать шуис: «Кутчысь лöсьыда, некодлы эн сетчы, служит бура». Батьлöн кывъясыс отсалiсны, да Василий служитiс кывкутöмöн. Вит тöлысь чöж том морт служитысьяскöд öттшöтш лыддис складын куйлысь öружие — автомат, пистолет, граната, ракетница, каска да мукöдтор. Та бöрын Василий бергöдiс техникакöд йитчöм уджъяс, дöзьöритiс машинаяса парк.
Декабр 8-öд лунö во служба бöрын Василий бöр воис чужанiнö. Гортö пырöм бöрын бать ёна кутлiс писö да нимкодясис сы вöсна.
Василий оз на тöд, кöнi да кодöн кутас уджавны водзö. Сылы öнi 19 арöс. Артмас кö, эм ыджыд кöсйöм лоны кусöдчысьöн. Том мортлы окота отсасьны йöзлы, öд пöжар вайö уна шог. Выль во ая-пиа паныдаласны öтлаын.
Гижöд да снимок Артур Гарновлöн.