Антонина Ивановна Гуляевалы Дереваннöй лоис мöд чужанiнöн, танi олö 70 во нин. Ачыс Марий республикаса Логинцы грездысь. Пыр уджалiс лесничöйöн, ставнас 37 во. Ань чужис февраль 28-öд лунö, регыд пасъяс 90 арöс. Бур вежöра, пыр на кысьö тэрыб чуньяснас. Роч морт оз сёрнит комиöн, но бура гöгöрвоö, пыр на судзöдö да лыддьö «Парма гор» газет.

16 арöсын петiс бать-мам борд улысь кузь туйö, мунiс велöдчыны Чебаркульса вöр школаö, сiйöс помалöм бöрын поездöн воöдчис Княжпогостöдз. Лавкаын син улас усис сакар — тайö вöлi чуймöдантор. Нывкалöн быдмигас, война кадö, юмовтор вöлi ыджыд козинöн. Сэк нин том ныв мöвпыштiс, Комиыд — озыр, кольчча татчö овны, танi и йöзыс аслыспöлöс сибыдöсь.

 Вöр видзан республикаса министерствосянь том специалистöс ыстiсны Дереваннöйса лесничествоö, могмöдiсны оланiнöн. Антонина Ивановна пыр жö босьтчис уджавны лесничöйлы отсасьысьöн, кад кольöм бöрын пуктiсны лесничöйöн.

 Дереваннöйысь жö аддзис муса зонмöс — Борис Андреевич Гуляевöс. Медводдза аддзысьлiгöн коми зон роч нывлы козьналiс открытка, кытчö шмонитiгмоз гижис «Моей будущей жене от будущего мужа». Сэк весиг нимсö на мусмöм нывлысь эз тöд. Сiдз и артмис, збыльмис гижöмыс. Гозъялöн чужисны ныла-пиа. Быдтысигöн кыпöдiсны ыджыд керка.

 Лесничöйöн зiлигöн велöдчысьяслы нуöдлiс кружок — велöдiс пуктыны пуяс, радейтны вöр, öтув вöчлiсны быдсяма научнöй опытъяс. Босьтчылiс районын кöдзны и тупу, та йылысь гижлiс балаяс да ыстылiс Москваö. Нывкаяс да зонкаяс окотапырысь пырöдчылiсны уджö. Челядькöд ветлiсны Москваö, сэнi налысь уджсö пасйисны ВДНХ выставкаын. 1974-öд воын Антонина Ивановнаöс корлiсны Петрозаводскö аньяслöн слёт вылö, сэки сiйö республикаын öтнас вöлi нывбаба лесничöйöн.

 Бур уджысь Антонина Ивановна Гуляеваöс пасйылiсны юбилейнöй медальясöн, почёт грамотаясöн.
Олöма мортлысь сьöлöмсö шонтöны вит внук-внучка, дас правнук-правнучка да öти пра-правнук.

 Татьяна Чувьюрова.

 Снимок Антонина Гуляевалöн.